Singila teti be-nzoni ti Nzapa
1 Kozoni si lo ga mbeni Chrétien, bazengele Paul akanga lani lege ngangu na guengo na li ni ti Lege ti vorongo ti aChrétien. Ye oko, teti so lo sala ye lani na lege ti hingango ye oko pëpe, a sala be-nzoni na lo. Jéhovah afa na gigi nzobe ti Lo so zo alingbi na ni pëpe, na mungo na Paul kusala ti fa tënë. Paul abâ lani na nene ni kusala so. (Kusala 26:9-18; 1 Tim. 1:12-14). Bê ti kiri singila teti be-nzoni ti Jéhovah apusu lani Paul ti mû tele ti lo kue na yâ kusala ti lo.—2 aCor. 12:15.
2 Na lege ti be-nzoni ti Lo, Nzapa amû nga na e mbeni kusala (2 aCor. 4:1). Na tapande ti Paul, e lingbi ti fa na gigi singila ti e teti be-nzoni so a fa ni na e na salango kue ti mû maboko na ambeni zo ti maï na lege ti yingo. Mbeni oko lege so e lingbi ti sala ni ayeke ti to nda ti manda Bible na azo nga ti ngbâ ti sala ni.
3 Lege ti to nda ti manda Bible na azo: Mbeni lege ti to nda ti amandango Bible na azo ayeke ti gi ti wara ambeni zo so e yeke zia lakue apériodique na tïtî ala. Tongana e yeke sala vizite lakue na mara ti azo tongaso, e yeke hinga nzoni mingi aye so andu bê ti ala. Na pekoni, e lingbi ti mû article ti mbeni oko ti apériodique ni ti to nda ti mbeni mandango Bible si na pekoni e gue na yâ ti brochure Ahunda. Na avizite ti peko, a lingbi ti duti nzoni ti ngbâ ti sala lisoro na yâ ti brochure Ahunda na ngoi so e yeke kiri ti zia apériodique na zo ni.
4 A hunda ti sambela nga ti sala ngangu: Sambela nga na ngangu so e yeke sala na bê kue ayeke maï ande kusala ti e ti fango tënë. Mbeni ita-wali pionnier so ayeke gi na étude oko asambela Jéhovah ti mû na lo a-étude mingi. Lo sala nga ye alingbi na asambela ti lo. Lo gi ti bâ mbilimbili ye so atambela nzoni pëpe na yâ kusala ti lo ti fango tënë, na lo bâ so, lakue tongana lo kiri ti sala vizite na azo, lo yeke hunda ka ti manda Bible na ala pëpe. Lo to nda ti sala tongaso na pekoni lo wara afini étude use.
5 So matabisi si e yeke na ni ti mû mbage ti e na yâ salango si a hinga “Tene-nzoni ti grâce ti Nzapa”! (Kusala 20:24). Zia singila ti e teti be-nzoni ti Nzapa apusu e ti mû maboko na bê kue na ambeni zo ti wara nzoni na lege ti nzobe ti Jéhovah so e lingbi na ni pëpe.