E sala kusala na apériodique ti kangbi nzo tënë na azo
1 Bazengele Paul aye lani ti kangbi nzo tënë na azo (1 aCor. 9:23). Laso, aTémoin ti Jéhovah ayeke nga na ngia ti sala legeoko na mbage ti azo kue. Mbeni oko ti akpengba gbakuru so e yeke sala na kua laso ayeke Tour ti Ba Ndo na Réveillez-vous! Anzoni lege ti kangbingo apériodique so ayeke fango tënë da na da nga na yâ ti amagazin. Tongaso, a hunda ti tene alege ti kangbingo apériodique so aduti lakue mbeni mbage ti Lango ti apériodique. A lingbi akongregation aleke mbeni kapa ti Lango ti apériodique lakue, mbeni lango so a zia ni nde ti fa tënë na apériodique. Ti akongregation mingi, kite ayeke pëpe so ti soro ambeni samedi ayeke tâ nzoni. Tongaso, zia kongregation oko oko azia na sese ambeni lango so ayeke nde wala alakui teti fango tënë na apériodique: da na da, na yâ ti amagazin, na ndo ti alege nga na azo so e zia lakue apériodique na ala. Me na ndo ye so, ye nyen mo wafango tënë mo lingbi ti sala si kangbingo apériodique ague na li ni?
2 Kozo ye ti sala ayeke ti duti ndulu ti fa ye na yâ Tour ti Ba Ndo na Réveillez-vous! Diko ambeti ni kozoni si. Na dikongo article oko oko, hunda tele ti mo: ‘Zo wa tënë so alingbi ti nzere na lo?’ Bi bê ti mo na ndo mbeni kete tënë so mo lingbi ti tene na yâ article ni ti pusu zo ti diko ni. Na mbage, nde na mungo mbage lakue na Lango ti apériodique, ngbanga ti nyen ti mû pëpe apériodique na tele ti mo na tongaso mo gbu lege kue so azi ti kangbi ni na azo? Ngbanga ti nyen ti kangbi ni pëpe tongana mo yeke gue na mbeni ndo, mo gue ti vo ye, mo sala lisoro na amba ti mo wakua, na azo ti tele ti da ti mo, na akamarade ti mo ti ekole wala na awafango mbeti?
3 Use ye ti sala ayeke ti sala tënë mingi pëpe. Mbeni ndulu tënë, so andu bê ti zo ayeke tâ nzoni lege ti kangbi apériodique. E gi ti kangbi ambeti mingi. Gi ala oko ayeke “sala tënë” ande. Ambeni wafango tënë abâ so a yeke nzoni ti soro mbeni tënë oko na yâ article ni, ti sala tënë kete, na ti fa mbeti ni. Teti ye so, a yeke wara awango so alingbi na yâ encadré “Ye ti tene na ndo apériodique”. Gi na ngoi so ala si na maboko ti azo awe, apériodique ni alingbi ti “sala tënë” na ambeni zo, nde na lo so amû ni na maboko ti mo. Na Irlande, mbeni maseka ti kota da-mbeti adiko Tour ti Ba Ndo ti 1 septembre 1991 so mbeni Témoin amû na babâ ti lo. Gi so lo hunzi ti diko mbeti ni, lo pika singa na aTémoin na ndo numéro so ayeke na yâ buku ti azo so ayeke na téléphone. Fade fade, maseka-wali so ato nda ti manda Bible, na lo wara batême na juillet 1993, na kota bungbi ti district “Fango ye ti Nzapa”. Tongaso, zia e sala si apériodique alï na yâ da ti azo, ndo so ala lingbi ti “sala tënë” na azo! Mbeni surveillant so ague na ndo nde nde amû ndulu wango so: “I sigigi na apériodique ni na yâ bozo ti i.” Biani, atâa ye so mo tene agbu bê ti zo ni pëpe, peut-être apendere foto ti ndo ni alingbi ande ti sala kua na place ti mo.
4 Ota wango ni ayeke ti hinga ti sala ye alingbi na dutingo ti zo oko oko. (Bâ 1 aCorinthien 9:19-23.) Leke ambeni ndulu tënë ti tene. Bata na li ti mo mbeni article so alingbi na akoli, mbeni teti awali. Ti apendere, mo lingbi ti sala tënë na ndo article “Les jeunes s’interrogent . . .” Nga, gbian yâ ti aye alingbi na dutingo ti zo na ngoi so mo yeke mû mbage ti mo na kangbingo apériodique. Na ndo Lango ti apériodique, mo lingbi ti bâ so fango tënë ti lakui amû nzoni lege mingi ti kangbi apériodique da na da.
5 Osio wango ni ayeke ti zia mbeni ye na gbele mo. Na tapande, awafango tënë alingbi ti leke ti zia apériodique 10 nze na nze, alingbi na ye so asi na ala; apionnier alingbi ti zia 90 nze na nze. Tâ tënë, ambeni wafango tënë alingbi ti zia apériodique mingi nze na nze, na tongaso ala yeke zia na gbele ala mbeni wungo so ayeke mingi ahon so. Ye oko, teti kpale ti seni, ndo so ala fa tënë dä wala ndali ti mbeni tënë nde, ambeni alingbi ti zia ambeti mingi pëpe. Me kusala ti ala ayeke na oko ngele na lê ti Jéhovah (Mat. 13:23; Luc 21:3, 4). Kota ye ni ayeke ti zia mbeni ye na gbele mo.
6 Nzo tënë ti Royaume ti Nzapa ayeke nzoni tënë so azo alingbi ti mä teti dengo bê nga na salut ti ala ti lakue lakue. Na tapande ti Paul, zia e leke na bê ti e ti sala kua na apériodique ti e ti ‘mû Tene-nzoni’ na azo ti tâ be-ti-molenge na e mû mbage ti tâ tënë ti Royaume.—1 aThes. 2:8.