Maï kode ti fango nda ti tënë na azo
1. Tondo wa ti Bible e yeke bâ ni? Ngbanga ti nyen?
1 A wara diskur so bazengele Paul amû na yâ synagogue ti Antioche ti Pisidie na mbeti ti Kusala 13:16-41. Diskur ni so ayeke mbeni nzoni tapande ti fango nda ti tënë na azo. Paul agi ti bâ ndo so azo so amä lo alondo dä nga na atënë ti bê ti ala, na aye so amû lege na lo ti leke fango tënë ti lo si a lingbi na ala. Zia e bâ tondo so, na e gi ti bâ lege so e lingbi ti sara tongana ti Paul na yâ fango tënë ti e.
2. Ye wa e manda na ndo lege so Paul ato nda ti diskur ti lo?
2 Gi atënë so ala mä tere dä: Fango tënë ti Paul aluti lani na ndo kota kusala ti Jésus na yâ ti aye so Nzapa aleke ti sara. Me, lo to nda ti diskur ti lo na ndo ti tënë so pëpe. Lo to nda ni na mbeni tënë so lo na aJuif mingi so amä lo ayeda na ni: a yeke mbaï ti aJuif (Kus. 13:16-22). Legeoko nga, e kue e lingbi ti ndu bê ti azo tongana e sara tënë na ndo ti aye so e na ala e mä tere dä. Ye so aye peut-être ti tene e hunda ambeni tënë na ala na kode, na nga e mä ala na ngoi so ala yeke kiri tënë. Na lege so, e lingbi ti hinga aye so agbu bê ti ala mingi.
3. Ngbanga ti nyen a yeke ngangu lani na awamango Paul ti yeda so Jésus ayeke Messie ti zendo ni?
3 Na sarango lisoro na ndo mbaï ti aJuif, Paul adabe ti awamango lo na ndo zendo ti Nzapa ti yä mbeni Sauveur na lege ti hale ti David. Mingi ti aJuif ayeke ku gango ti mbeni kota walombe ti bira so alingbi ti zi ala na gbe ti yanga-ti-komande ti Rome, na ti sara si mara ti ala aga kota ahon atanga ni kue. Kite ayeke pëpe so ala hinga so amokonzi-nzapa ti aJuif ake tënë ti Jésus, na ala kä lo na azo ti komande ti Rome si na nda ni a fâ lo. Tongana nyen si Paul alingbi ti gue na ala ti yeda so Jésus ayeke Messie ti zendo ni?
4. Tongana nyen si lani, na kode, Paul afa nda ti tënë na aJuif?
4 Leke fango tënë ti mo si a lingbi na azo ni: Teti so Paul ahinga bibe ti awamango lo, lo sara kusala na Mbeti ti Nzapa ti sara lisoro na ndo aye so ala yeda na ni. Na tapande, lo fa Jésus tongana hale ti David na nga tongana lo so Jean Wabatizengo zo asara tënë ti lo. Ti aJuif, Jean ayeke lani mbeni prophète ti Nzapa (Kus. 13:23-25). Paul afa polele so amokonzi ti aJuif ‘asara si tënë [ti aprophète] ni kue aga tâ tënë’ na lege so ala ke Jésus na a fâ ngbanga ti kuâ na li ti lo (Kus. 13:26-28). Na ndo ni, lo fa so ambeni zo abâ Jésus na peko ti londongo ti lo na popo ti akuâ. Lo gboto lê nga na ndo ambage ti Mbeti ti Nzapa so azo mingi ahinga ni, na so aga tâ tënë awe tongana Jésus alondo na kuâ.—Kus. 13:29-37.
5. (a) Tongana nyen si Paul aleke fango tënë ti lo si a lingbi na aGrec so ayeke mä lo? (b) Na lege wa e lingbi ti mû tapande ti Paul tongana e yeke fa tënë na yâ ti territoire ti e?
5 Me, tongana Paul ayeke sara lisoro na aGrec na yâ Aréopage na gbata ti Athènes, lo sara kusala na mbeni kode nde (Kus. 17:22-31). Ye oko, lisoro ni aluti gi na ndo ti oko tënë so lo fa na aJuif, na a sara si kusala ti lo na popo ti aJuif nga na aGrec alë anzoni lengo (Kus. 13:42, 43; 17:34). Laso nga, kusala ti e ti fango tënë alingbi ti lë anzoni lengo tongana e gi mbeni tënë so e na azo e mä tere dä. Na nga, ti bâ ndo so azo so ayeke mä e alondo dä na ti hinga atënë ti bê ti ala ayeke mû maboko na e ti leke fango tënë ti e si a lingbi na ala.