Tongana nyen ti ngbâ ti fa tënë na wâ?
1 Wâ so Apollos ayeke na ni lani na yâ fango tënë alingbi ti dabe e na wâ so ambeni mba ti e Chrétien ayeke na ni laso na yâ fango tënë (Kus. 18:24-28). Ye oko, Bible awa e kue: “I zia bê ti i anze pëpe na sarango kusala; yingo ti i aza nzoni.” (aRom. 12:11). Ye wa alingbi ti mû maboko na e ti wara wâ na yâ fango tënë nga ti ngbâ ti bata ni?
2 Hingango ye amû na e wâ: Na peko ti so Jésus asi na ambeni disciple ti lo use, na “Lo fa na ala nda ti tënë ni na ndo kue so Mbeti ti Nzapa asara tënë ti Lo”, ala tene: “Tongana Lo yeke sara tënë na e na lege kâ, . . . bê ti e ayeke tongana wâ pëpe?” (Luc 24:27, 32). Legeoko nga, bê ti e ayeke na kota ngia pëpe tongana e kono hingango ye ti e na ndo Tënë ti Nzapa? Biani, hingango ye asara si mabe ti e akpengba. A-Romain 10:17 atene: “Mabe aga na lege ti mango tënë.” Tongana e zia bê ti e kue na azendo ti Jéhovah, e lingbi pëpe ti zia ti sara tënë ti aye so e manda.—Ps. 145:7; Kus. 4:20.
3 E lingbi pëpe ti ngbâ gi na ndo ti hingango ye so e yeke na ni laso ti tene ndoye ti e na mbage ti Jéhovah nga wâ ti e na yâ fango tënë angbâ ti za ngangu. A lingbi e ngbâ ti kono hingango ye ti e na ndo tâ tënë nga ti maï ndoye ti e na mbage ti Jéhovah. Tongana e sara tongaso pëpe, yeke yeke kusala so e yeke sara ni ngbanga ti lo alingbi ti ga mbeni ye so e yeke sara ni gi tongaso (Apoc. 2:4). Mbeti ti Nzapa awa e ti ‘wu na lege ti hinga Nzapa’, wala ti ngbâ ti kono hingango ye ti e na ndo lo.—aCol. 1:9, 10.
4 Kode ti mandango ye ti e mveni: Tongaso, a yeke nzoni ti tene e bâ kode ti mandango ye ti e mveni nzoni. Na tapande, e lingbi ti sû akamba na gbe ti akiringo tënë ti a-article ti Tour ti Ba Ndo nga ti mû atâ kiringo tënë ni. Me, e yeke diko aversê so a fa atënë ti yâ ni pëpe nga e yeke gbu li na ndo lege so e lingbi ti sara kusala na ni na yâ fini ti e? Ka ti kapa ti dikongo Bible yenga oko oko, e yeke sara ngangu ti gi ambeni tënë na ndo ni tongana dutingo ti e amû lege na e ti sara ni nga ti gbu li na ndo ti aye so e manda dä? (Ps. 77:12, 13; aProv. 2:1-5). So tâ ye ti nzoni si e wara ni tongana e bi bê na ndo Tënë ti Nzapa na e gbu li na ndo ni! (1 Tim. 4:15, 16). Mara ti nzoni mandango ye tongaso ayeke kpengba e na a yeke mû ngangu na e ti duti na “nzara ti sara nzo kusala.”—Tite 2:14.