Sara si a-étude so e yeke sara na lege ti téléphone wala na lutingo na nduzu ague na li ni

1. Ngbanga ti nyen e yeke sara étude na azo?

¹ So kota ngia si e yeke na ni ti to nda ti manda Bible na zo! Ye oko, ti wara mbeni zo so ayeke na nzara ti manda Bible ayeke gi tongo nda ti ye. E yeke sara étude na zo ti mû maboko na lo ti ga mbeni tâ disciple ti Christ (Mat. 28:19, 20). Nyen la alingbi ti mû maboko na e ti sara ye so?

2. Tongana e yeke sara étude na lege ti téléphone wala na lutingo na nduzu, e yeke sara ni tongana nyen? Ngbanga ti nyen a yeke lë lengo?

² Azo so ayeke na ye mingi ti sara: Laso azo ayeke na aye mingi ti sara ni. Na ambeni ndo, azo mingi ayeda pëpe ti mû ngbonga oko kue ti duti ti sara étude. Ti mû maboko na mara ti azo tongaso, a wa e ti to nda ti étude nga ti ngbâ ti sara ni gi na lutingo na nduzu wala na lege ti téléphone. Na tongo nda ni, a yeke nzoni mara ti étude tongaso aduti nduru na peut-être e lingbi ti bâ gi mbeni kete wungo ti aversê na ngoi so e yeke bâ paragraphe oko wala use ti mbeni mbeti tongana Bible afa. So tâ ye ti gonda so fadeso aita mingi ayeke sara étude na azo gi na lutingo na nduzu wala na lege ti téléphone!

3. Ngbanga ti nyen a yeke nzoni ti gi ti kono wungo ti angbonga so e yeke mû ti manda na Bible na zo na lutingo na nduzu?

³ Ye oko, a lingbi e manda ye na azo na lutingo na nduzu na e ngbâ gi na ndo so awe? Ên-ën. Atâa so lege ti ndara ayeke ti mû ngoi ti zo ni mingi pëpe, wango soa e wara atene: “Tongana gere ti étude ni aluti nzoni awe, na zo ni ayeke na nzara ti manda Bible, mo lingbi ti zia mbeni ngoi na ndo ti so mo yeke mû ni ti manda na ye na zo ni.” A yeke kota ye biani. Zia e mû mbeni tapande: Mbeni molenge so ange na nzara, na tongo nda ni lo lingbi ti te ye gi kete kete juska lo kiri lo wara nzara ti te ye mingi. Me, e yeke ku pëpe ti tene lo kiri lo wara ngangu ti lo kue na lo kono nzoni tongana lo ngbâ ti te ye lakue gi kete kete. Legeoko nga, mbeni wamandango Bible ayeke na bezoin ti mbeni étude so asara ni na lege ti mbeni nzoni programme nga lakue lakue ti tene lo ga mbeni wakua ti Nzapa so ayeke biazo.​—aHéb. 5:13, 14.

4. Aye ti nzoni wa aga na lege ti a-étude so e duti si e sara ni?

⁴ A-étude so e duti si e sara ni: A yeke nzoni mingi ti sara étude na mbeni zo na mbeni ndo so azo ayeke dä mingi pëpe, so ti tene na da ti zo ni wala na mbeni ndo so alingbi. Ye so ayeke sara si mandango ye ni ayapu nga a mû lege na wamandango ye ni ti gbu nda ti Tënë ti Nzapa (Mat. 13:23). A yeke mû nga lege na wafango ye ni ti leke atënë ni si a lingbi na dutingo ti wamandango ye ni. Na ndo ni, ti zia mbeni ngoi na ndo ti so e yeke mû ti manda na ye na zo ni ayeke mû lege na ala ti hasa yâ ti Tënë ti Nzapa si a lingbi ti kpengba mabe ti lo.​—aRom. 10:17.

5. Ye wa mo lingbi ti sara si mbeni étude so mo yeke luti na nduzu ti sara ni aga mbeni étude so mo duti si mo sara ni?

⁵ Ye wa mo lingbi ti sara si mbeni étude so mo yeke luti na nduzu ti sara aga mbeni étude so mo yeke duti si mo sara? Na peko ti anduru étude so mo sara na zo ni fani mingi, mo lingbi ti hunda na zo ni wala lo yeda ti manda ye ni a ninga kete, na fa na lo wungo ti ngoi ni. Wala na kode, mo lingbi peut-être ti hunda lo: “Mo yeke na ngoi laso ti tene e duti e sara lisoro na ndo tënë so?” wala “Mo yeke na ngoi oke laso ti mû ti tene e sara lisoro na ndo tënë so?” Tongana lo yeda ti sara étude ni a ninga pëpe, ngbâ lakue ti sara étude ni gi nduru na lutingo na nduzu. Na mbeni ngoi so alingbi, kiri mo hunda zo ni.

6. Ye wa e zia na gbele e na ngoi so e yeke fa tënë? Tongana nyen si awango so a mû na yâ ti article so alingbi ti mû maboko na e ti wara ni?

⁶ Na ngoi so e ngbâ ti gi azo so alingbi, zia e girisa lâ oko pëpe nda ni so e yeke to nda ti a-étude na e yeke ngbâ ti sara ni. Ye so e zia na gbele e ayeke ti mû maboko na azo ti nzoni bê ti mû tere ti ala na Jéhovah na ti ga awakua ti lo so awara batême. Zia lo iri deba nzoni na ndo ngangu so e yeke sara na yâ kusala ti lo na ngoi so e yeke gi ti wara ye so e zia na gbele e.​—2 Tim. 4:5.

[Kete tënë na gbe ni]