“Ga na peko ti mbi”
1 Fini ti azo mingi aluti gi na ndo ti aye so ayeke mû ngia na bê ti ala, ye oko, fani mingi ala yeke na ngia pëpe. Nde na so, Jésus awa amba ti lo ti duti nduru ti mû ye na ambeni zo si ala wara tâ ngia (Kus. 20:35). Lo tene: “Tongana mbeni zo aye ti ga na peko ti Mbi, a lingbi lo ke tere ti lo mveni . . . na lo ga na peko ti Mbi.” (Marc 8:34). Gbanzingo ye na tere ahunda ye mingi ahon gi ti tene zo ake ngoi na ngoi ti sara ambeni ye so anzere na lo. Ye so aye ti tene lâ oko oko, e sara ye so anzere na lê ti e pëpe, me ye so anzere na lê ti Jéhovah.—aRom. 14:8; 15:3.
2 Bâ tapande ti bazengele Paul. Lo zia lani ti tomba peko ti aye so agbu bê ti lo na lo mû tere ti lo kue ti sara si aye ti Royaume ague na li ni ndali ti so lo bâ “a yeke nzoni ahon ti hinga Christ Jésus”. (aPhil. 3:7, 8). Lo tene: “Fade mbi yeke na ngia ti mû ye ti mbi, na ti mû mbi mveni” ti sara kusala teti ambeni zo (2 aCor. 12:15). A yeke nzoni e oko oko e hunda tere ti e: ‘Tongana nyen si mbi yeke sara kusala na ngoi ti mbi, ngangu ti mbi, akode ti mbi na amosoro ti mbi? Mbi yeke zia bê ti mbi kue gi na ndo gingo aye ti mbi mveni wala mbi yeke gi ti nzere na lê ti Jéhovah?’
3 Alege so azi na e ti mû ye: Ngu oko oko, aTémoin ti Jéhovah ayeke mû angbonga ahon ngbundangbu oko ti fa tënë ti Royaume so ayeke sö fini ti azo. Na yâ ti akongregation, amaseka nga na akangba ayeke sara akusala nde nde so ayeke nzoni ndali ti amba ti ala. A yeke sara nga akusala mingi ndali ti nzoni tambelango ti akota bungbi nga ala yeke leke ada ndali ti kusala ti Jéhovah na ala yeke bata ni. Nga, bi bê na ndo mungo maboko ti aita so ayeke na yâ ti aKomite so ayeke bâ lege ti songo na ada-nganga nga na aBungbi ti aita so ayeke gue na yâ ada-nganga ti bâ aita so ayeke na kobela. A yeke ndoye la apusu ala ti sara aye so kue. Amara ti bibe ti gbanzingo ye na tere tongaso ayeke mbeni deba nzoni teti sewa ti aita kue!—Ps. 110:3.
4 Ambeni ngoi so e lingbi ti mû maboko na alege nde nde ayeke na ngoi so mbeni kota kpale wala mbeni ye ti ngangu asi hio. Mingi ni, e lingbi gi ti bâ so mbeni ita ti e ayeke na bezoin ti tene a mû maboko na lo wala a wa lo (aProv. 17:17). Tongana e yeke mû tere ti e ti sara kusala teti amba ti e nga ti sara si aye ti Royaume ague na li ni, e yeke mû tapande ti Jésus (aPhil. 2:5-8). Zia e sara ngangu ti ngbâ lakue ti sara ni.