Fa so mo bi bê na zo ni: Ne zo ni
1 Bible atene: “L’Eternel asi na grâce”. (Ps. 145:8). Atâa so Jéhovah ayeke Gbia ti dunia kue, lo yeke sara ye na nzobe, na bingo bê nga na nengo tere na mbage ti e awasiokpari (Gen. 13:14; 19:18-21, 29). E lingbi ti sara si fango tënë ti e akiri anzere mingi tongana e haka peko ti Nzapa ti e so ayeke ne zo (aCol. 4:6). Ye so andu ye mingi ahon gi ti ne zo wala ti yekia lo na yâ sarango tënë ti e.
2 Na da na da: E lingbi ti sara nyen tongana e si na da ti mbeni zo na mbeni ngoi so alingbi na lo pëpe wala lo yeke na akua mingi ti sarango ni? E yeke fa so e mû dutingo ti zo ni na nene ni tongana e fa tënë gi nduru wala e leke ti kiri ti bâ lo na mbeni ngoi nde. Tongana mbeni zo ake ti mû mbeti ti e, e yeke fa nzobe na lege so e yeke gi pëpe ti gbu lo na ngangu ti mû ni. Ti bi bê na azo ayeke pusu e ti ne ndo ti ala, na tapande na lege so e yeke kanga yanga ti gbagba ni na peko ti e nga e yeke fa na amolenge ti e ti sara tongaso. A yeke nzoni ti sara kue si azo so ayeke hon hongo na lege abâ pëpe ambeti so e zia na peko ti mbeni zo na yanga-da ti lo. Biani, ti ne amba ti e ayeke pusu e ti sara ye na mbage ti ala legeoko tongana ti so e ye ala sara na mbage ti e.—Luc 6:31.
3 Na ndo ti lege: Na ngoi so e yeke fa tënë na ndo ti lege, e yeke fa so e ne zo tongana e kanga lege pëpe na azo so ayeke hon wala e bungbi tere pëpe na gbele ando ti dengo buze. E yeke mû dutingo ti amba ti e na nene ni tongana e fa tënë gi na azo so ayeke na ngoi kete ahon ti fa tënë na azo so ayeke na ngoi pëpe. Na ambeni ngoi, e yeke na bezoin ti sara tënë na kota go tongana aye ayeke toto ngangu na ndo so e yeke dä. Ye oko, a lingbi e sara ni na nengo tere si e gboto lê ti azo na ndo ti e pëpe.—Mat. 12:19.
4 Na lege ti téléphone: Ti bi bê na azo ayeke pusu e ti fa tënë na lege ti téléphone na ando so ayeke kpô. E yeke fa so e yeke na anzoni sarango ye tongana e fa tere ti e hio na zo ni nga nda ni so e iri lo. Tongana e zia téléphone ni nduru na yanga ti e na e sara tënë na mbeni go so adë bê ti zo, a yeke mû lege na e ti kpengba azo na lege ti alisoro so aluti na ndo Bible (1 aCor. 14:8, 9). Na sarango ye na nzobe, na bingo bê nga na nengo tere na alege nde nde so kue, e yeke mû tapande ti Nzapa ti e so ane zo, Jéhovah.