Internet: Zia e hinga agbanda ni!
Mbage 3: Tokuango ambeti na lege ti Internet
1 A yeke na lege ni ti tene zo atokua ambeti ti fa aye so asi na lo wala ti fa abibe ti lo na asewa nga na akamarade ti lo so ayo na lo mingi. Ye oko, a yeke na lege ti ndoye ti kangbi mara ti ambeti so na azo so ahinga pëpe asewa wala akamarade ti e? Wala a yeke nzoni ti tokua ni na ndo ti Internet si azo kue alingbi ti diko ni? A tokua ni na mo ti tene mo sara ni gbani gbani na mo tokua ni kirikiri na azo atâa mo hinga ala wala pëpe? Legeoko nga, tongana mo wara ambeni sango so a ye fade ti tokua na mo pëpe, a yeke na lege ti ndoye ti tokua ni na ambeni zo?
2 Ka tongana atënë ni so e mû ti tokua ni na ambeni zo ayeke tâ ye so asi pëpe? E yeke mû mbage na kangbingo amvene, ni la pëpe? (aProv. 12:19; 21:28; 30:8; aCol. 3:9). Biani, tongana e ‘bata nzoni si e tambela na lege ni, e tambela tongana awabuba pëpe, me tongana awandara’, e yeke gbu li kozo si e sara ye so (aEph. 5:15). E yeke na ngia mingi so a-Annuaire, Tour ti Ba Ndo nga na Réveillez-vous! ti e asi singo na atâ ye so asi so awa e na apusu e ti ngbâ ti tambela na ndo “lege ni”!—Es. 30:20, 21.
3 Mbeni kpale ni ayeke nga dä. Bazengele Paul asara tënë lani na ndo ti ambeni zo lo tene: “Ala manda ti duti senge, na ala tambela kirikiri na yanga ti da nde nde; na ala duti gi senge oko pëpe, me ala ga awatene senge na awandendia nga, na ala tene tënë so a lingbi ala tene pëpe.” (1 Tim. 5:13). Atënë so afa so a yeke na lege ni pëpe ti mû angoi ti e nga na ngangu ti e ti tokua atënë so ayeke senge senge na aita ti e.
4 Bi bê nga na angoi mingi so zo ayeke mû ti diko na gbâ ti ambeti so lo yeke wara na lege ti Internet. Bâ ye so mbeni buku (Data Smog) atene: “Tongana zo ayeke mû ngoi mingi mingi ti tokua na ti diko ambeti so lo wara na lege ti Internet, a yeke mû ngoi ti lo mingi na aga mbeni kungba ahon ti duti mbeni ye so ayeke mû ngia na lo. Lâ oko oko, lo yeke diko nga lo yeke kiri tënë na ambeti so alondo na amba ti lo, akamarade ti lo, afami ti lo, . . . nga azo so aye ti kä na lo aye so lo ye fade ti vo pëpe.” Buku ni akiri atene: “Azo mingi so aye ti wara asango na lege ti Internet ayeke na sioni sarango ye so ayeke ti tokua na azo kue so ala yeke na adresse e-mail ti ala aye kue so ala yeke wara: atënë ti ngia, atënë ti pande na ambeni ye tongaso.”
5 A yeke bâ mara ti ye so na popo ti aita mingi. Ala yeke wara aye tongana atënë ti ngia na ndo ti akusala ti e aChrétien, asuma-tene so na yâ ni afa atënë so a tene aluti na ndo ti atënë ti mabe ti e, atapande so a gboto ni na yâ ti adiskur so e yeke mä na abungbi wala na akota bungbi, aye so asi na fango tënë nga na ambeni ye tongaso so mo bâ a yeke sioni pëpe. Mingi ni, aita ayeke tokua aye so hio na ambeni zo sân ti gi ti bâ wala a lingbi ti zia bê na ni, na ye so asara si a hinga pëpe zo so asigigi na tënë ni kozoni. Ye so alingbi ti gue na e ti hunda tere ti e wala tënë so ayeke tâ tënë biani.—aProv. 22:20, 21.
6 Mara ti atënë so mingi ni ayeke senge senge, ayeke pëpe mara ti anzoni tënë so Paul abi bê na ndo ni tongana lo sû mbeti na Timothée, lo tene: ‘Mo sara na lege ti tapande ti nzo tënë so mo mä na yanga ti mbi, na lege ti mabe na ndoye so ayeke na yâ Christ Jésus.’ (2 Tim. 1:13). “Yanga” so ayeke nzoni-kue, so ayeke atâ tënë so ayeke na yâ ti Bible, ayeke “tapande ti nzo tënë” so aluti mbilimbili na ndo kota li ti tënë ti Bible: Fango na gigi mbilimbili ti kota yanga-ti-komande ti Jéhovah na lege ti Royaume ti lo (Soph. 3:9). A yeke nzoni e sara kue ti mû ngoi nga na ngangu so e yeke na ni ti mû maboko na yanga-ti-komande ti Jéhovah so.