Atënë so i hunda
◼ E lingbi ti tisa mbeni wamandango Bible ti ga na tere ti e na fango tënë teti kete ngoi ti bâ tongana nyen e yeke sara kusala ti e?
Ti bâ ni nzoni, a yeke gi azo so a yeda na ala awe ti ga awafango nzo tënë si alingbi ti sigigi na fango tënë legeoko na aTémoin ti Jéhovah.
Azo ti gigi mingi ayeke ne aTémoin ti Jéhovah ndali ti nzoni kusala ti ala so gi ala oko si ayeke sara ni, so ayeke ‘ti fa tënë na azo si ala ga adisciple’ na ‘ti fa ye na ala’ da na da nga na lege ti mandango Bible na ala (Mat. 28:19, 20). Tongaso, tongana ala bâ mbeni zo na sigingo ni na fango tënë na tere ti mbeni Témoin ti Jéhovah, fade ala yeke tene ti ala nyen? Ala yeke tene ti ala so zo ni nga kue ayeke mbeni wafango tënë wala lo yeke nduru ti ga ni.
Me ambeni ye alingbi ti sara si a zia lege na mbeni zo so ayeke Témoin pëpe ti gue na tere ti mbeni Témoin ti Jéhovah na fango tënë.
Na ambeni ngoi, a-ancien so a mû lege na ala ti sara ni azia lege na mbeni wagosinga, mbeni wafango mbeti wala ambeni zo tongaso ti gue na tere ti mbeni Témoin na ngoi so lo yeke fa tënë da na da si lo bâ tongana nyen aTémoin ayeke sara kusala ti ala ti fango tënë. Me a yeke ye so asi ka lakue lakue pëpe. Tongana a si tongaso, a lingbi yungo bongo ti zo ni nga na sarango ye ti tere ti lo na angoi ni so ague oko na andia ti e. Nga, peut-être Témoin ni alingbi ti bâ so a yeke nzoni ti tene na azo so lo yeke wara ala so zo ni so lo na lo asigigi ayeke mbeni wagosinga wala mbeni wafango mbeti so aye ti hinga tongana nyen e yeke sara kota kusala ti e so Bible ahunda na e ti sara.
Nga, ababâ na mama so ayeke aChrétien ayeke mû amolenge ti ala na tere ti ala ti sigigi na fango tënë même tongana amolenge ni ade kete mingi wala ade a yeda na ala pëpe ti ga awafango tënë. Na sarango tongaso, ababâ na mama ni ayeke zia amolenge ti ala ni gi tongaso pëpe. So amolenge ni asigigi na ala na fango tënë amû lege na ababâ na mama ni, na ngoi so ala yeke “tambela na lege,” ti sara lisoro na amolenge ni na ndo Bible nga na ndo asarango ye ti Nzapa (Deut. 6:4-7). Me so ayeke gi mbeni ye so a hunda na asewa Chrétien ti sara ni, na a yeke nde na ti so mbeni Témoin amû mbeni zo ti gigi na tere ti lo na fango tënë gi ti tene zo ni abâ tongana nyen e yeke sara kusala ti e. Âdu ti fango ye so ababâ wala amama ayeke mû na amolenge ti ala, a yeke leke ala teti ngoi so ala yeke ga ande awafango tënë ti sepela Jéhovah.−Mat. 21:15, 16.
Ka tongana zo ni ayeke zo so mbeni Témoin si ayeke manda Bible na lo, na zo ni ayeke gue na li ni ti ga mbeni disciple? A yeke duti na lege ni ti tene zo ni asara lisoro na afami ti lo, azo ti place ti kua ti lo, avoizin ti lo na ambeni zo nde na ndo ‘akota kusala ti Nzapa’ so lo manda na yâ Mbeti ti Nzapa (Kus. 2:11). Na e yeke na beku so mbeni lâ, fade lo yeke bâ nene ti tene lo ga na tere ti aTémoin ti Jéhovah “ti fa tënë ti Nzapa”.−Kus. 13:5.