E yeke na amosoro ti ngere ngangu ti kangbi
1 Tënë ti Nzapa asi singo na amosoro ti yingo so e bâ na nene ni mingi (Ps. 12:7; 119:11, 14). Mbeni lâ, Jésus amû atapande mingi ti fa tënë nde nde na ndo ti Royaume, na pekoni lo hunda adisciple: “I mä nda ti tënë so kue awe?” Tongana ala yeda, lo tene na ala: “Teti tënë so, amaître ti ndia kue so aga adisciple ti royaume ti yayu ayeke tongana mveni ti da so alungula fini ye na ye ti giriri na yâ da ti mosoro ti lo.”—Mat. 13:1-52.
2 Atâ tënë ti Bible so e to nda ni ândö ti manda, e lingbi ti bâ ni fadeso tongana angbene mosoro. Na ngbango lakue ti manda ye na ndo ti aye ti Mbeti ti Nzapa so alï mingi, e wara ambeni tâ tënë na yâ ni so ayeke tongana afini mosoro na lê ti e (1 aCor. 2:7). Nga na lege ti “ngbâa be-tâ-zo na ti ndara”, e ga ti hinga fadeso ambeni fini mosoro.—Mat. 24:45, MN.
3 E bâ na nene ni mingi amosoro ti yingo so, ati fini ni na ati ngbene ni. Ye so apusu e ti gi ti manda ye na ti ga awafango Tënë ti Nzapa so akpengba, so na nzobe akangbi na azo atâ tënë ti ngere ngangu so e manda.
4 Bâ tapande ti Jésus: Ti fa tongana nyen so lo bâ amosoro so, Jésus asara kue ti kangbi ni na azo. Même na ngoi so lo nze, lo zia pëpe ti sigigi na amosoro so na yâ ti “gogoro” ti lo.—Jean 4:6-14.
5 Ndoye ti Jésus teti azo so ayeke awanzinga na lege ti yingo apusu lo ti kangbi amosoro so ayeke atâ tënë ti Nzapa so amû fini (Ps. 72:13). Lo sara mawa ti azo so ayeke na nzara ti tënë ti Nzapa na lo to nda ti “fa ye mingi na ala.”—Marc 6:34.
6 Mû tapande ti Jésus: Tongana e bâ na nene ni amosoro so e yeke na ni, tongana Jésus asara giriri, e nga kue e yeke duti nduru ti fa na azo aye ti yingo ti ngere ngangu tâ gi na yâ ti Bible (aProv. 2:1-5). Atâa so na ambeni ngoi e lingbi ti nze, fade e fa na gigi atâ tënë so ayeke na yâ ti Mbeti ti Nzapa na ngia na bê (Marc 6:34). Bango na nene ni amosoro so e yeke na ni ayeke pusu e ti sara ye kue so e lingbi ti sara na yâ ti kusala ni, na gingo lakue ti mû mbage dä mingi.