Na bango mo, azo amanda nyen na mbage ti mo?
1. Na bango Jésus, adisciple ti lo amanda nyen na mbage ti lo?
1 Jésus atene: “Ala yô joug ti mbi na ala manda ye na tere ti mbi.” (Mat. 11:29). Ti bâ ni nzoni, Jésus afa ye lani na azo gi na yanga pëpe me lo wani lo zia nzoni tapande ni. Bâ ye so adisciple amanda na bango Jésus. Lo sara ye na nzoni bê nga na ndoye (Mat. 8:1-3; Marc 6:30-34). Lo yeke na tâ be-ti-molenge (Jean 13:2-5). Na ngoi so adisciple ti Jésus amû peko ti lo na fango tënë, ala bâ so lo yeke mbeni ngangu wafango tënë, lo hinga ti fa tâ tënë na amba ti lo (Luc 8:1; 21:37, 38). Tongana amba ti e ayeke bâ e na fango tënë, a yeke sara nyen na ndo ti ala?
2. Tongana nyen nzoni sarango ye ti e na nzoni yungo bongo ti e ayeke sara nzoni na azo so e yeke fa tënë na ala?
2 Azo so e yeke fa tënë na ala: Nzoni yungo bongo ti e, nzoni sarango ye ti e, nga so e yeke bi bê ti e na azo ni alingbi ti sara ye mingi na ndo ti ala (2 aCor. 6:3; aPhil. 1:27). Ala bâ so e yeke sara kusala lakue na Bible. A nzere na ambeni ti bâ so e yeke duti kpo ti mä ala. Zia e bâ lâ oko pëpe anzoni sarango ye so tongana asenge ye, teti a lingbi ti sara si azo adengi mê na tënë so e yeke fa na ala.
3. Ye ti nzoni wa tapande ti e ayeke sara na ndo ti aita ti e?
3 Aita ti e: Bâ nga ye ti nzoni so tapande ti e alingbi ti sara na ndo ti aita ti e. Tongana e ye fango tënë aita ti e nga kue ayeke ye fango tënë. Tongana ti so wen ayeke sara si yanga ti mbeni wen aza, ti leke nzoni mingi atënë so e yeke tene na fango tënë alingbi ti pusu aita ti gi ti maï kode ti ala na fango tënë nga (aProv. 27:17). Tongana e mû nzoni note ti azo so tënë ni agbu bê ti ala na e kiri hio ti bâ ala, a yeke sara si aita ti e aye ande nga ti sara mara ni. Na sarango kusala ti e kue, e yeke sara ye ti nzoni na ndo ti aita ti e.—2 Tim. 4:5.
4. Ngbanga ti nyen a yeke nzoni e gbu li ti e na ndo ti tapande ti e ngoi na ngoi?
4 Mo lingbi ti sara ye so? Ti gi ti bâ wala sarango ye ti mo, tënë ti yanga ti mo nga na tapande ti mo ayeke sara ye ti nzoni na ndo ti amba ti mo. Nzoni tapande ti e ayeke nzere na Jéhovah na ayeke mû lege na e ti tene oko tënë so bazengele Paul atene: “Ala ga azo so asara ye tongana mbi, tongana ti so mbi nga mbi yeke zo so asara ye tongana Christ.”—1 aCor. 11:1.