Sambela nga na gbungo li ayeke kota ye teti aita so aye fango tënë mingi
1. Nyen la amû lani maboko na Jésus ti tene ye agboto lê ti lo yongoro pëpe na kozo kusala ti lo?
1 Jésus amû ngoi ti lo na lakui ti sava azo ti kobela na ti tomba asioni yingo na tere ti ala. Tongana adisciple ti lo awara lo na ndade ni, ala tene na lo: “Azo kue ayeke gi mo.” Ala hunda na lo mingi ti ngbâ ti sava azo ni na ti tomba asioni yingo ni na tere ti azo. Ye oko, Jésus aye ti tene mbeni ye agboto lê ti lo yongoro pëpe na tere ti kozo kusala ti lo so ayeke fango nzoni tënë. Lo kiri tënë na ala, lo tene: “Zia e gue na mbeni ndo nde. E gue na akete gbata so ayeke nduru ge, tongaso si mbi lingbi nga ti fa tënë kâ, teti a yeke ngbanga ni si mbi ga.” Nyen la amû maboko na Jésus ti zia gi lê ti lo na ndo ti fango tënë? Lo londo lani hio na ndapre ti sambela na ti gbu li ti lo (Marc 1:32-39). Tongana nyen sambela nga na gbungo li alingbi nga ti mû maboko na e ti ga azo so aye fango tënë mingi?
2. Nyen la e lingbi ti gbu li ti e na ndo ni ti mû maboko na e ti ngbâ ti ye fango tënë mingi?
2 E gbu li na ndo ti nyen?: Jésus abâ lani so ‘a sara pasi na azo nga yâ ti ala akangbi kirikiri tongana angasangbaga so ayeke na berger pëpe.’ (Mat. 9:36). Legeoko nga laso, azo ayeke na bezoin ti nzoni tënë mingi na e lingbi ti gbu li ti e na ndo ni. Ngoi so e yeke dä ayeke ngoi ti sara ye hio hio, a lingbi e gbu li ti e na ndo ni (1 aCor. 7:29). E lingbi ti gbu li ti e na ndo ti akusala ti Jéhovah nga na asarango ye ti lo, pasa so e yeke na ni ti duti Témoin ti Jéhovah nga na akpengba mosoro ti yingo so e manda na yâ ti Bible, so mingi ti azo ti yâ ti territoire ti e ahinga ni pëpe.—Ps. 77:12-14; És. 43:10-12; Mat. 13:52.
3. Na angoi wa la e lingbi ti gbu li ti e?
3 E gbu li na ngoi wa?: Tongana ti so Jésus asara lani, ambeni ita ayeke londo hio na ndapre na ngoi so ndo adë. Ambeni abâ ti ala so a yeke nzoni ti gbu li na bï kozoni si ala lango (Gen. 24:63). Atâa aye ayeke mingi na yâ ti programme ti e, e lingbi ti wara ngoi ti gbu li. Ambeni ita ayeke gbu li ti ala na ngoi so ala yeke na yâ ti bus wala na yâ ti taxi. Ambeni ayeke mû ngoi so na place ti kua a zia ni ti te na ye ti gbu li ti ala. Aita mingi abâ so ti gbu li même gi teti kete ngoi kozo si ala gue na fango tënë amû maboko na ala ti fa tënë na ngia nga na mbeto pëpe.
4. Ngbanga ti nyen a yeke nzoni ti gbu li?
4 Gbungo li nga na sambela ayeke sara si e yeke duti na nzara mingi ti sara na Jéhovah, ayeke mû maboko na e ti bâ vorongo so e yeke voro na Jéhovah tongana ye so ayeke kota mingi na yâ ti fini ti e nga ayeke sara si yanga so e mû ti ngbâ ti fa tënë akiri ti kpengba mingi. Jésus, so ayeke Mokonzi so Nzapa azia lo na ndo ti fango tënë, awara ye ti nzoni na lege ti gbungo li. E nga kue e lingbi ti wara ye ti nzoni dä.