Hundango ndo
◼ Afango ye ti Bible wa andu sarango kusala na téléphone portable na ngoi ti bungbi ti aChrétien nga na ngoi ti fango tënë?
“Ngoi ayeke teti ye kue” (Zo-ti. 3:1): Téléphone portable ayeke amû lege na e ti tokua message wala ti sara lisoro na mbeni zo na ngoi kue. Ye oko, na ambeni ngoi portable ti e alingbi ti sara si e zia li ti e kpô pëpe. Na tapande, abungbi ti e ayeke ngoi so e yeke voro Jéhovah, e wara fango ye na lege ti yingo nga e kpengba tere na popo ti e (Deut. 31:12; Ps. 22:23; aRom. 1:11, 12). Ni la, a yeke nzoni e kanga portable ti e tongana e ga na bungbi nga e lingbi ti zi ni ti diko message so e wara na peko ti bungbi ni. Tongana e hinga so a doit ti iri e hio si e zia téléphone ti e na zingo ni, a lingbi e zia ni na vibreur si agboto lê ti zo pëpe.
“Sara ye kue ndali ti nzoni tënë” (1 aCor. 9:23): Na ambeni ngoi, a yeke nzoni ti sara kua na portable na yâ ti kusala ti fango tënë. Na tapande, ita so amû li ni alingbi ti iri aita so ayeke fa tënë na yâ ti territoire ni ti bâ tongana nyen kua ni ayeke tambela. Na ambeni ngoi awafango tënë ayeke sara kua na téléphone ti ala ti iri mbeni zo so asara nzara ti tënë ni wala wamandango Bible ni kozoni si ala gue ti sara vizite na zo ni, mbilimbili tongana lege ti da ti zo ni ayo mingi. Tongana téléphone ayeke na tere ti e na fango tënë, a lingbi e sara ye na ndara si téléphone ni afâ yâ ti lisoro so e sara na zo ni pëpe (2 aCor. 6:3). Na ngoi so e yeke na fango tënë na aita, a yeke nzoni pensé ti e angbâ na ndo ti fango tënë ni nga na ndo ti azo so e na ala e yeke sara kua ni, ahon ti tene e iri mbeni zo wala ti tokua message na mbeni kamarade.
Gi ye so asara nzoni na mba ti mo (1 aCor. 10:24; aPhil. 2:4): E ye lâ oko pëpe ti ga na bungbi ti fango tënë lakue na retard na ti pensé so e lingbi ti iri ndo wala ti sara message na mbeni ita ti fa ndo so a yeke gue ti fa tënë ni dä. Tongana mbeni ita asi na retard, a yeke kiri ti changé yâ ti azo so akangbi ala awe. Biani, ambeni ye so ahon ngangu ti e alingbi ti sara si e si na bungbi ti fango tënë na retard. Me, tongana e sara lakue ngangu ti ga na l’heure, e yeke fa so e ne ye so Jéhovah aleke, ita so amû li ni, nga na amba ti e so aga na bungbi ti fango tënë ni.