Zo wa la tënë ni alingbi ti ndu bê ti lo?
1. Tongana e yeke diko Tour ti Ba Ndo na Réveillez-vous! nyen la a lingbi e bâ ni nzoni, na ngbanga ti nyen?
1 A leke Tour ti Ba Ndo na Réveillez-vous! alingbi na bezoin ti azo na ndo ti sese kue. Ni la, a-article ni ayeke sara tënë na ndo ti aye nde nde. Tongana e yeke diko article oko oko, a lingbi e bâ mbilimbili zo wa la tënë ni alingbi ti ndu bê ti lo, na pekoni zia e sara kue ti mû ni na zo so tënë ni anzere na lo.
2. Atënë wa so ayeke na yâ ti apériodique ni alingbi ti ndu bê ti azo?
2 Tour ti Ba Ndo so asigigi ade ti ninga pëpe asara tënë na ndo ti mbeni tënë ti Bible so mo na mbeni mba ti mo ti place ti kua asara lisoro na ndo ni awe? Mbeni article so asara tënë na ndo ti sewa so alingbi ti mû maboko na ambeni zo na yâ ti sewa ayeke dä? Mo hinga mbeni zo so ayeke leke tere ti voyagé na mbeni kodoro so mbeni Réveillez-vous! asara tënë na ndo ni awe? Mbeni oko ti apériodique ni asara mbeni tënë so andu dengo buze wala andokua ti letäa so ayeke na yâ ti territoire ti mo? Na tapande, mbeni périodique so asara tënë ti akota kpale so ambakoro ayeke tingbi ka na ni, alingbi ti ndu bê ti azo so ayeke bata ambakoro. Mbeni périodique so asara tënë ti azo so akpe ndia pëpe alingbi ti ndu bê ti azo so ayeke bâ tënë ti ndia ti kodoro.
3. Fa mbeni ye so asi so afa nene ti mungo apériodique mbilimbili na azo so e bâ so ambeni tënë ti yâ ni alingbi ti ndu bê ti ala.
3 Aye ti pekoni: Na peko ti so ala wara Réveillez-vous! ti octobre 2011 so ayeke: “Faites de vos enfants des adultes responsables,” mbeni ita-koli na wali ti lo so ayeke na Afrique du Sud apika singa na a-ekole 25 so ayeke na yâ ti territoire ti congrégation ti ala. Azo 22 amû ambeti ni na ala kangbi ni na azo so ala yeke fa mbeti na ala. Mbeni ita-koli na wali ti lo so ayeke na yâ ti kodoro ni ayeke nga na mara ti bibe so na ala kangbi ambeti na a-ekole so ayeke na yâ ti territoire ti ala. Ambeni wafango mbeti na yâ ti oko ti a-ekole ni amû desizion ti sara kua na apériodique ti fa na mbeti na yâ ti ekole ti ala yenga oko oko. Koli na wali ni afa peko ti ye so na surveillant ti circonscription, ni la na pekoni lo wa acongrégation ti circonscription ti lo ti gue na yâ ti a-ekole so ayeke na yâ ti aterritoire ti ala. Azo mingi ahunda na bureau ti filiale ti kiri ti tokua na ala ambeni périodique na ndo ti tënë ni so. Ye so asara si a kiri a pete numero ti périodique so.
4. Ngbanga ti nyen e ye ti kangbi apériodique mingi na azo?
4 Apériodique ti e afa tâ nda ti aye so ayeke si na ndo ti sese laso nga agboto lê na ndo ti Bible nga na Royaume ti Nzapa. Na ndo ti sese kue apériodique ti e la ayeke oko mbeti so ayeke fa “tënë ti salut”. (És. 52:7). Ni la, e ye ti kangbi ni na azo mingi ahon ti kozo. Nzoni lege ti sara ni ayeke ti hunda tere ti e wani: ‘Zo wa la tënë ni alingbi ti ndu bê ti lo?’