Lege azi na e ti sepela Jéhovah mingi
1. Fini lekengo ye wa la ayeke mû maboko na e ti ‘sepela Jéhovah na bê ti e kue’?
1 Na nze ti mars so ahon, a leke mbeni fini ye so amû lege na awafango tënë ti mû kua ti pionnier auxiliaire ti sara l’heure 30 na nze ti mars na avril wala na ngoi ti vizite ti surveillant ti circonscription. Tongana vizite ti surveillant ti circonscription ato nda ni na yenga so nze ni ahunzi na ni si alï yâ ti mbeni fini nze, awafango tënë so aye ti mû kua ti pionnier auxiliaire teti l’heure 30 alingbi ti soro nze oko na popo ni. Na ngoi ni so apionnier auxiliaire kue alingbi ti mû mbage na bungbi so surveillant ti circonscription ayeke sara ka na apionnier permanent na apionnier spécial nga ti ngbâ dä juska ahunzi. So aye ti tënë so tongana ayeke ngangu na e ti sara l’heure 50, e lingbi ti ‘sepela Jéhovah na bê ti e kue’ na mungo kua ti pionnier auxiliaire teti l’heure 30 même fani osio na yâ ti ngu oko.—Ps. 109:30; 119:171.
2. Nyen la ayeke nzere mingi na aita so amû kua ti pionnier auxiliaire na ngoi ti vizite ti surveillant ti circonscription?
2 Na ngoi ti vizite ti surveillant ti circonscription: Fadeso aita mingi alingbi ti mû kua ti pionnier auxiliaire na ngoi ti vizite ti surveillant ti circonscription ti kpengba tere na popo ti mba na fango tënë legeoko na lo (aRom. 1:11, 12). Aita so ayeke sara kua si amû kua ti pionnier auxiliaire alingbi peut-être ti leke ti mû congé ti lango oko na yâ ti yenga ni wala ala lingbi ti leke ti fa tënë legeoko na surveillant na samedi wala na dimanche. So tâ ngia la si apionnier auxiliaire ayeke wara ti sara bungbi legeoko na apionnier permanent nga na apionnier spécial!
3. Ngbanga ti nyen Mémorial ayeke mbeni nzoni ngoi ti mungo kua ti pionnier auxiliaire?
3 Na nze ti mars na avril: Aita so awara aye ti nzoni na mungo kua ti pionnier auxiliaire ndali ti nze oko na ngoi ti Mémorial teti l’heure 30, alingbi fadeso ti kono ‘sandaga ti ala ti gonda’ na mungo kua ti pionnier auxiliaire na peko ti tere (aHéb. 13:15). Nze ti mars na avril ayeke anzoni ngoi ti kono yâ ti kusala ti e na mungo kua ti pionnier auxiliaire. Ngu oko oko na anze ni so, e yeke mû mbage na pendere kapa ti tisango azo ti ga na Mémorial. Na ndo ni, teti so aita mingi ayeke kono yâ ti kusala ti ala na ngoi ti Mémorial, e lingbi ti wara pasa ti fa tënë legeoko na aita nde nde. Na peko ti Mémorial, e yeke kiri ti tisa azo ti ga ti mä diskur spécial. Bê ti mo ayeke pusu mo ande ti wara ye ti nzoni na mungo kua ti pionnier auxiliaire na peko ti tere?—Luc 6:45.