A fa tënë ti Royaume ni a sara ngu 100 awe!
1. A sara nduru na ngu ngbangbo oko awe, na lege wa a pusu awakua ti Jéhovah lani ti fa tënë mingi?
1 “Ala bâ nzoni, Gbia ni akomande! Ala yeke awatokua ti lo. Tongaso ala fa, ala fa, ala fa tënë ti Gbia ni na Royaume ti lo.” Na lege ti apendere tënë so ita Joseph Rutherford atene asara nduru na ngu ngbangbo oko awe, awakua ti Jéhovah akiri awara ngangu lani ti fa tënë ti Royaume na ando kue. A yeke nga ye so e yeke sara laso la. Legeoko tongana ti akozo Chrétien, e yeke fa nzoni tënë ti Royaume “na création kue so ayeke na gbe ti yayu”. (Col. 1:23). Tongana e kiri ti bâ aye so e sara na yâ ti angu ngbangbo oko so ahon, aye wa la e sara ti fa tënë ti Royaume ti Nzapa? Tongana nyen la e lingbi ti ngbâ ti fa tënë ti Royaume ni na ngoi so e ga nduru na ngu ngbangbo oko so Royaume ti Nzapa ato nda ti komande awe?
2. Tongana nyen la ambeti ti e ayeke gboto lê mingi na ndo ti Royaume ti Nzapa?
2 Zia e kiri ti bâ aye so asi lani: A sara angu mingi awe la ambeti ti e ayeke gboto lê na ndo ti Royaume ti Nzapa. Ngbene ye na ngu 1939, kota li ti tënë ti périodique ti e so azo ahinga ni mingi ayeke: Tour ti Ba Ndo Afa Tene ti Royaume ti Jéhovah. Périodique so ayeke sara tënë fani mingi na ndo ti Royaume nga na aye so lo yeke sara ande. Réveillez-vous! ayeke nga périodique so ayeke gboto lê na ndo ti Royaume ti Nzapa tongana oko yorö ti akpale ti azo. A yeke biani na lege ni ti tene apériodique use so ayeke ambeti so a kiri pekoni nga a kangbi ni mingi na yâ ti dunia kue!—Apoc. 14:6.
3. Ambeni kode wa la e sara kua na ni ti fa na tënë ti Royaume?
3 Awakua ti Jéhovah asara kua na akode nde nde ti fa na tënë ti Royaume. Na tongo nda ni, e yeke sara kua lani na a-oto so a zia haut-parleur dä, akuasinga ti radio, nga na amachine so a pika ni si azo amä adiskur. Akode so amû maboko na e ti fa nzoni tënë na azo mingi na ngoi so awafango tënë ayeke lani mingi pëpe (Ps. 19:5). Na yâ ti angu so ahon ade ti ninga ape, e sigigi na asango na ndo ti jw.org, ye so amû lege na e ti fa tënë ti Royaume na azo kutu mingi même na azo so ayeke na yâ ti akodoro so akanga lege na kusala ti e dä.
4. Ambeni kode nde wa e yeke sara kua na ni na fango tënë?
4 Awakua ti Jéhovah ayeke mû nga mbage na yâ ti ambeni kode ti fango tënë so ayeke nde ti fa tënë ti Royaume na ndo kue. Na tapande, na tongo nda ti ngu 1995, e kono yâ ti kusala ti e ti fango tënë da na da na fango tënë na yâ ti aparc, nga na ando ti dengo buze. Ade ti ninga ape, e leke ti fa tënë na ndo so azo ayeke dä mingi na yâ ti akota gbata na yâ ti dunia kue. Na ndo ni, mingi ti acongrégation ayeke mû mbage na fango tënë na ando so azo ayeke dä mingi na yâ ti territoire ti ala na ziango ambeti ni na ndo ti apoussette nga na atable ti tene azo so ayeke hon abâ ni hio. Me, fango tënë da na da la angbâ lakue kozo kode so e yeke fa na tënë.—Kus. 20:20.
5. Alege wa ayeke zi ande na mingi ti e na fini ngu ti kusala so?
5 Pensé na aye so ayeke na devant: Na tongo nda ti fini ngu ti kusala ti nze ti septembre, mingi ti aita ayeke mû ande kua ti pionnier permanent. Mo kue mo yeke mû ande mbage dä? Tongana a yeke ngangu, mo lingbi ti mû kua ti pionnier auxiliaire ngoi na ngoi? Atâa mo lingbi ti mû kua ti pionnier wala pëpe, Jéhovah ayeke iri ande tënë nzoni na ndo ti angangu kue so mo yeke sara ti mû mbage mingi na fango tënë ti Royaume.—Mal. 3:10.
6. Ngbanga ti nyen la nze ti octobre ti ngu 2014 ayeke duti ti lo nde?
6 Nze ti octobre ti ngu 2014 ayeke duti ande ngu 100 ti komandema ti Royaume ti Nzapa. A yeke ni la, Tour ti Ba Ndo ti kangbingo ni ti nze ni so ayeke gboto lê gi na ndo ti Royaume ti Nzapa. Zia e sara ngangu ti kangbi ni ande na azo mingi. Na ngoi so e yeke pensé na aye so ayeke na devant, zia e oko oko kue e ngbâ ti “fa nzoni tënë ti royaume ti Nzapa” na azo kue so ayeke ye ande dä ti mä ni.—Kus. 8:12.