Lê ti mo ayeke bâ ye nzoni?

1. Ti duti na ‘lê so abâ ye nzoni’ aye ti tene nyen?

¹ Ye so lê ti e ayeke luti na ndo ni ayeke sara ka ngangu na ndo ti sarango ye ti e. Atënë ti Jésus so ayeke tâ na lege ni, so lo tene: “Tongana lê ti mo abâ ye nzoni, fade tere ti mo kue ayeke za.” (Mat. 6:22). Tongana lê ti e “abâ ye nzoni” na lege ti yingo, a yeke mû lege na e ti sara ye so Nzapa aye. Tongana e zia Royaume ti Nzapa na kozo ndo, a yeke sara si aye so ayeke kota ye pëpe agboto lê ti e pëpe wala ambeni ye nde alingbi ti kanga lege na kusala ti e pëpe.

2. Nyen la alingbi ti sara si e bâ ye nzoni mbeni pëpe, me nyen la ayeke mû maboko na e?

² A lingbi e bâ asarango ye ti e nzoni: Aye so radio, télé wala Internet ayeke sara nzoni tënë ni nga na aye so amba ti e ayeke na ni alingbi ti buba nzoni bango ndo so e yeke na ni. Kozo ti tene e sara mbeni ye so lâ oko ade e sara ni pëpe wala ti vo mbeni ye so alingbi ti mû ngoi ti e, nginza ti e wala ngangu ti e kue, a yeke nzoni ti “diko ngere ni,” so ti tene e hunda tere ti e, ‘Ye so ayeke sara si kusala so mbi yeke sara na Jéhovah aga nzoni ahon ti kozo wala ayeke kanga lege na ni?’ (Luc 14:28; aPhil. 1:9-11). A yeke nga nzoni ti bâ ngoi na ngoi tongana nyen la e lingbi ti changé ambeni ye na yâ ti kapa ti e si e fa tënë mingi ahon ti kozo.—2 aCor. 13:5; aÉph. 5:10.

3. E manda nyen na ndo ti mbeni ita-wali so achangé ye na yâ ti duti ti lo?

³ Na ngoi so mbeni ita-wali amû kua ti pionnier permanent, lo yeke sara kua ti nginza so amû ngoi ti lo kue, na lo ngbâ ti sara gi kua ni, atâa so tongana lo sara mbeni kua so amû ngoi ti lo kue pëpe, lo lingbi lakue ti wara nginza ti bata na tere ti lo. Na nda ni, lo tene: “Mbeni zo alingbi ti duti ngbâa ti azo use pëpe. Aye so mbi sara nzara ni lani, a lingbi mbi dö ni mbi zia ti tene mbi wara gi ye so mbi yeke na bezoin ni. Mbi ga ti bâ so tongana e azo e vo mbeni ye ti mitele laso, kekereke a ga ngbene ye. Nga, ti ngbâ ti gi ti wara ni ayeke sara si mbi woko kue.” Dutingo ti lo amû lege na lo ti changé ye na yâ ti fini ti lo, na ti wara mbeni kua ti nginza nde so amû lege na lo ti ngbâ ti sara kua ti pionnier.

4. Ngbanga ti nyen a yeke kota ye laso ti ngbâ ti duti na lê so abâ ye nzoni?

⁴ Teti so ngoi ti e ayeke ngoi so a hunda ti sara ye hio asara si a yeke même kota ye mingi ti tene lê ti e angbâ lakue ti bâ ye nzoni. Lango oko oko so ayeke hon ayeke sara si e pusu nduru nduru na hunzingo ti aye ti ngoi so nga e ga nduru na fini dunia ti Nzapa (1 aCor. 7:29, 31). Na ziango lê ti e gi na ndo ti kua ti fango tënë, e lingbi ti sö ande e wani nga na ala so amä e.—1 Tim. 4:16.