Hundango Ndo

◼ Eskê awafango tënë alingbi ti sara kua mingi na Internet ti fa tënë wala ti sara étude na mbeni zo so ayeke na kodoro-wande?

Ambeni ita asara kua na Internet ti wara a-étude na yâ ti akodoro so a kanga lege na kusala ti e dä wala na ando so awafango tënë ayeke dä gi kete. Ti ambeni ita, ala wara ye ti nzoni na pekoni. Ye oko, tongana awafango tënë ayeke tokua e-mail wala ala yeke sara lisoro na lege ti Internet na azo so ala hinga ala ape, a yeke ga na kpale. (Bâ Kusala ti Royaume, ti juillet 2007, l. 6.) Atâa so ala ye ti ndu bê ti azo ti nzoni bê na tënë ti Royaume, mara ti alisoro tongaso alingbi ti sara si mbeni ita asara songo na asioni kamarade, même na a-apostat (1 aCor. 1:19-25; aCol. 2:8). Nga, na yâ ti akodoro so a kanga lege na kusala ti e, akota zo ti kodoro ni apeut ti gi ti hinga alisoro so azo ayeke sara na lege ti Internet wala na téléphone na ye so alingbi ti ga na kpale na ndo ti aita ti ndo ni. Tongaso, a lingbi awafango tënë ague pëpe na ndo ti Internet ti gi azo ti kodoro-wande ti fa tënë na ala.

Tongana e fa tënë na alege kue so azi si e tingbi na mbeni zo so alondo na mbeni kodoro-wande, a lingbi e tara pëpe ti gi ti maï nzara ti tënë ni na yâ ti bê ti lo na ngoi so lo kiri na kodoro ti lo awe; e lingbi ti sara ni gi tongana filiale ti kodoro ni la ahunda ti sara tongaso. Me, e lingbi ti fa na lo tongana nyen la lo lingbi ti sara kua na site jw.org ti wara ambeni sango wala tongana nyen la lo lingbi ti wara filiale ti kodoro so lo yeke dä. E lingbi nga ti tene na lo ti gue na Da ti Royaume so ayeke nduru na lo. Ti tâ tënë ni, na yâ ti ambeni kodoro aDa ti Royaume ayeke dä ape. Tongana lo ye ti tene mbeni wafango tënë ti ndo so lo yeke dä ague abâ lo, a lingbi e sû mbeti na lê ti formulaire Veuillez suivre l’intérêt (S-43) na e mû ni na secrétaire ti tene lo tokua ni na lege ti site jw.org. Filiale so ayeke bâ ndo na ndo ti kua ti fango tënë na yâ ti kodoro ti zo ni so la ahinga aye so ayeke si na yâ ti kodoro ni, gi filiale ni la alingbi biani ti mû maboko na zo ni na lege ti yingo.—Bâ Kusala ti Royaume ti juin 2014, l. 7, nga na Kusala ti Royaume ti novembre 2011, l. 2.

Tongana e yeke sara vizite na mbeni zo si lo hon na mbeni kodoro nde wala e yeke sara étude na mbeni zo so ayeke na kodoro-wande na lege ti Internet, e doit ti sara ye alingbi na tënë so a fa na yâ ti paragraphe so ayeke na nduzu ge so. Me, e lingbi ti ngbâ ti sara si nzara ti tënë ni amaï na yâ ti bê ti zo ni juska lo wara mbeni wafango tënë ti ndo ni si. Ye oko, tongana zo ni ayeke na yâ ti kodoro so a kanga lege na kusala ti e, a lingbi a sara ye na hange mingi na ngoi so a yeke sara lisoro na lo na ndo ti Bible na lege ti lettre, téléphone, wala Internet.—Mat. 10:16.