Mbeni cabine téléphonique ndali ti mandango Bible

Daiane ayeke mbeni Témoin ti Jéhovah na Brésil so ayeke fa tënë mingi. Mbeni lâ, na temps so lo yeke fa tënë na lege ti téléphone, lo causé na mbeni couple na tënë ni anzere na ala. Ala tene na Daiane so ala yeke quitté ti gue na mbeni kete kodro so ayo so wâ ti courant wala Internet ayeke dä ape. Na ndö ni, mbeni Témoin ti Jéhovah ayeke kâ ape. Ti tene ala ngbâ ti continué lisoro ni na ndö ti Bible, acouple ni amû numéro ti mbeni cabine téléphonique ti kete kodro ni na Daiane, nga ala ota kue amä terê na ndö ti lango so ala peut ti sara na lisoro ni nga na l’heure ni.

Asi na lango ni so, Daiane airi ndo na cabine ni na acouple ni arépondre. Na yâ ti yenga use, Daiane asara lisoro na ala na ndö ti Bible fani ota na lege ti téléphone.

Ambeni ngoi na pekoni, tongana Daiane airi acouple ni, ala répondre ape. Me, Daiane adécouragé ape nga lo ngbâ ti iri ndo na cabine ni fani ota na yâ ti yenga oko, na lo yeke causé na zo so arépondre na appel ni. Ye ti pekoni ayeke so, Daiane akomanse lani ti manda Bible na gbâ ti azo so ayeke na yâ ti kete kodro ni.

Mbeni lâ, na temps so Daiane na koli ti lo ayeke manda Bible na mbeni maseka-koli na lege ti téléphone na cabine ni, mbeni kota zo ti eglize so ayeke na yâ ti kete kodro ni amä lisoro ni. Lo luti na terê ti maseka-koli ni tongaso si lo mä tënë ni nzoni. Na pekoni, kota zo ti eglize ni ahunda ti tene lo causé na Daiane nga na koli ti lo. Tënë so lo mä anzere na lo mingi na lo yeda ti manda Bible.

Tongana ngoi ayeke hon, Daiane na koli ti lo awara lege ti manda Bible na azo omene na yâ ti kete kodro ni grâce na cabine téléphonique ni, so kota zo ti eglize ni ayeke nga na popo ni. Cabine ni amû nga lege na ambeni zo so ayeke manda Bible ti suivre abungbi. Mbeni oko na popo ti ala aleke mbeni banc ti tene ala duti dä na temps so ala yeke sara étude.

So Daiane na koli ti lo awara lege ti fa tënë ti Royaume na azo na yâ kete kodro ni, anzere na ala mingi. Daiane atene: “Jéhovah apeut ti sara si mbeni zo amä nzoni tënë, même si lo yeke na mbeni ndo so ayo mingi.”