Tongana nyen la a yeke formé aTémoin ti Jéhovah ndali ti kua ti ala ti fango tënë?

A ngbâ lakue ti formé aTémoin ti Jéhovah na yâ ti aye kue so ala yeke sara so andu gigi ti ala ti Chrétien, na tapande, kua ti ala ti fango tënë. A yeke kua so Jésus amû lani yanga na adisciple ti lo ti sara ni la, so ti tene, ti fa nzoni tënë ti Royaume ti Nzapa na azo nga ti fa ye na ala (Matthieu 24:14; 28:19, 20). E yeke wara formation ni so na ngoi ti bungbi ti milieu ti yenga, ti akota bungbi ti lango ota nga na ti akota bungbi ti lango oko. A-Témoin ti Jéhovah so ayeke na akua na yâ ti congrégation wala na yâ ti bungbi ti Jéhovah ayeke wara mbeni mbilimbili formation na yâ ti a-ekole so atënë ni aluti na ndö ti Bible.

Na yâ ti article so e yeke bâ:

• Formation wa la aTémoin ti Jéhovah ayeke wara?

• A-ekole ti bungbi ti aTémoin ti Jéhovah

• Aformation ni aluti na ndö ti nyen?

• Eskê aTémoin ti Jéhovah ayeke payé mbeni ye ndali ti aformation ti ala?

• Tongana nyen la aTémoin ti Jéhovah ayeke wara aye ti nzoni na lege ti aformation ti ala?

Formation wa la aTémoin ti Jéhovah ayeke wara?

Abungbi ti congrégation. Yenga oko oko, e yeke sara abungbi use na ando so e yeke voro Nzapa dä, so a iri ni Da ti Royaume. E yeke sara mbeni bungbi ni na milieu ti yenga nga e yeke sara mbeni na nda-yenga. Zo kue apeut ti ga senge nga a yeke ro nginza na titî azo ape.

• Bungbi ti milieu ti yenga. E yeke manda tongana nyen la e peut ti maï akode ti dikongo ye ti e, ti sarango lisoro, ti sarango tënë na lê ti gbâ ti azo, ti fango tënë nga na ti fango ye. E yeke wara formation ni na lege ti adiskur, alisoro, adémonstration nga na avidéo. Formation so ayeke aidé e ti fa atënë ti Bible nzoni mingi na azo nga ti manda Bible na azo so ayeda na tënë ni. Azo kue so ayeke gue na abungbi ayeke wara aye ti nzoni na lege ti formation so. Na ndö ti aye so kue, abungbi ti e ayeke kpengba mabe ti e na Jéhovah nga na ndoye so e yeke na ni na mbage ti lo nga na aita ti e.

• Bungbi ti nda-yenga. E yeke sara bungbi so na ambage use. Kozo ni, a yeke komanse na mbeni diskur so a yeke sara ni mbilimbili ndali ti azo so ayeke aTémoin ape. Use mbage ti bungbi ni, a yeke sarango lisoro na lege ti hundango tënë nga na kiringo tënë so aluti na ndö ti mbeni article ti Tour ti Ba Ndoa ti mandango ni. A-article ni ayeke sara tënë na ndö ti atënë ti Bible nde nde nga na amama-ndia so apeut ti aidé e na yâ ti kua ti e ti fango tënë nga na yâ ti gigi ti e ti lâ oko oko.

Akota bungbi ti lango oko nga na ti lango ota. Ngu oko oko, e yeke sara akota bungbi ota so ayeke bungbi awafango tënë ti acongrégation nde nde. Apendere programme so aluti na ndö ti mbeni mama-tene ti Bible, so na popo ni a yeke wara adiskur, adémonstration, a-interview nga na avidéo. Gï tongana ti abungbi ti congrégation, akota bungbi ti lango oko nga na akota bungbi ti lango ota ayeke aidé e ti manda ye mingi na ndö ti kua ti e ti fango nzoni tënë. Gï tongana ti abungbi ti congrégation, zo kue apeut ti ga senge nga a yeke ro nginza na titî azo ape.

A-ekole ti bungbi ti aTémoin ti Jéhovah

Ti wara ambeni formation ni nde, a yeke invité ambeni Témoin ti Jéhovah ti gue na a-ekole nde nde ti mandango Bible. A yeke a-ekole wa? Nda ti ekole ni ayeke nyen? A yeke sara lango oke? Nga, azo wa la apeut ti sara ni?

Ekole ti apionnier

• Nda ti ekole ni: A yeke ti formé azo so ayeke fa tënë na ngoi kue, so a iri ala apionnier,b ti tene ala fa tënë nga ala fa ye nzoni mingi ahon ti kozo. Na temps ti ekole ni, a yeke sara alisoro, adémonstration, adiskur nga na adevoir.

• A ninga ngoi oke: Lango omene.

• Azo so apeut ti gue na ekole ni: A yeke apionnier permanent so asara ngu oko wala ahon ni la a yeke tisa ala ti gue na ekole ni. Me, ala so asara kua ti pionnier teti angu mingi nga so ahon ngu oku ala gue na ekole ni ape, a peut ti tisa ala ti kiri ti sara ni.

Ekole ti awafango nzoni tënë ti Royaume

• Nda ti ekole ni: A yeke ti formé awakua ti ngoi kue so ayeke na a-expérience awe. A-élève ni ayeke gi ti maï akode ti ala ti fango tënë nga na ti fango ye, nga ala yeke manda Bible na ndö ti atënë so ndani alï mingi. Mingi ti aita so awara diplôme ti ekole ni, a yeke tisa ala ti gue ti fa tënë na ando so bezoin ti awafango tënë ayeke dä mingi.

• A ninga ngoi oke: Nze use.

• Azo so apeut ti gue na ekole ni: Apionnier apeut ti gue na ekole ni tongana ala sara ye alingbi na ambeni ye so a hunda, nga tongana dutingo ti ala amû lege na ala ti gue na ando so bezoin ayeke dä.

Ekole ti a-ancien

• Nda ti ekole ni: A yeke aidé a-ancienc ti sara kua ti ala nzoni na yâ ti congrégation, aye tongana fango ye, bango lege ti aita nga ti ndoye Nzapa nga na amba ti ala Chrétien mingi.—1 Pierre 5:2, 3.

• A ninga ngoi oke: Lango oku.

• Azo so apeut ti gue na ekole ni: A yeke a-ancien so a soro ala fini fini nga na a-ancien so ayeke na expérience awe na so ahon ngu oku awe la ala gue na ekole ni ape, a peut ti tisa ala ti kiri ti sara ni.

Ekole ti asurveillant ti circonscription na awali ti ala

• Nda ti ekole ni: A yeke ti formé awakua so ayeke gue na ando nde nde, so a iri ala asurveillant ti circonscription,d ti sara kua ti ala nzoni ahon ti kozo (1 Timothée 5:17). Formation so ayeke aidé nga a-ancien so na awali ti ala ti gbu nda ti atënë ti Nzapa nzoni mingi.

• A ninga ngoi oke: Nze oko.

• Azo so apeut ti gue na ekole ni: A yeke afini surveillant ti circonscription nga na awali ti ala la a yeke tisa ala ti gue na ekole ni, na peko ti so ala sara ngu oko na yâ ti kua ti ala. Na pekoni, tongana lakue ngu oku ahon awe, a yeke kiri ti tisa ala.

Ekole ti Kusala ti Royaume

• Nda ti ekole ni: A yeke aidé a-ancien nga na awakua ti mungo mabokoe ti sara akua ti ala nzoni, nga ti bâ lege ti aye nde nde nga na abezoin ti acongrégation (2 Timothée 3:1). Ngu oko oko, a yeke soro ambeni ngoi ti sara ekole ni.

• A ninga ngoi oke: Yongo ti ngoi ni ayeke nde nde, mingi ni, a yeke lango oko.

• Azo so apeut ti gue na ekole ni: A yeke asurveillant ti circonscription, a-ancien nga na awakua ti mungo maboko.

Ekole ti azo so alï fini fini na Béthel

• Nda ti ekole ni: A yeke ti aidé azo so alï fini fini na Béthelf ti sara kua ti ala nzoni nga ti ndoye Nzapa nga na amba ti ala mingi.

• A ninga ngoi oke: Lango oku na ndambo.

• Azo so apeut ti gue na ekole ni: A yeke afini Béthelite la ayeke sara ekole ni. Abéthelite so asara angu mingi awe so ague lani na ekole ni ahon ngu oku, a lingbi ti tisa ala ti kiri ti sara ekole ni.

Ekole ti Galaad ti Mandango Bible ti Société Watchtower

• Nda ti ekole ni: A yeke ti aidé a-élève ni ti gbu nda ti atënë ti Bible nzoni nga ti aidé ala ti sara ye alingbi na aye so ala manda (1 aThessalonicien 2:13). Aita-koli nga na aita-wali so akpengba na lege ti yingo so ague na Ekole ti Galaad ayeke aidé mingi na yâ ti bungbi ti Jéhovah nga na a-ekole ti mandango Bible na yâ ti dunia kue. A peut ti tokua a-élève ni na yâ ti territoire ti fa tënë, na mbeni filiale, na kodro ti ala wani wala na mbeni kodro nde.

• A ninga ngoi oke: Nze oku.

• Azo so apeut ti gue na ekole ni: Filiale apeut ti hunda na aita so ayeke sara kua ti ngoi kue ti sara demande ni. A yeke sara ekole ni na États-Unis na kota ndo ti mandango ye ti Société Watchtower na gbata ti Patterson, na New York.

Ekole ti amembre ti Komite ti filiale na awali ti ala

• Nda ti ekole ni: A yeke ti formé amembre ti Komite ti filialeg ti bâ ndo na ndö ti akua so a yeke sara na yâ ti mbeni Béthel nga na akua ti bungbi ti Jéhovah na yâ ti kodro ni wala na yâ ti akodro so ayeke na gbe ti filiale ni.

• A ninga ngoi oke: Nze use.

• Azo so apeut ti gue na ekole ni: Kota ndokua ti aTémoin ti Jéhovah ayeke tisa amembre ti Komite ti filiale nga na awali ti ala ti gue na ekole ni. A yeke sara ekole ni na kota ndo ti mandango ye ti Société Watchtower na gbata ti Patterson, na New York.

Aformation ni aluti na ndö ti nyen?

Bible la ayeke lakue kozo mbeti so aformation ti aTémoin ti Jéhovah aluti na ndö ni. E mä na bê so a sû Bible na gbe ti yingo ti Nzapa nga a yeke wara na yâ ni apendere afango ye so andu gigi ti e ti Chrétien kue.—2 Timothée 3:16, 17.

Eskê aTémoin ti Jéhovah ayeke payé mbeni ye ndali ti aformation ti ala?

Ên-ën. Fango ye ni ayeke gï senge senge. A yeke na lege ti a-offrande so azo amû na bê ti ala wani la aTémoin ti Jéhovah ayeke sara na akua ti ala.—2 aCorinthien 9:7.