HUNDA TI AMASEKA
Bible apeut ti aidé mbi tongana nyen?—Use mbage ni: Sara si dikongo Bible anzere na mo
Mbeni molenge-koli so iri ti lo ayeke Will atene: “Tongana mo hinga nzoni fason ti dikongo Bible ape, dikongo ni apeut ti nzere na mo ape.”
Eskê mo ye ti hinga aye so apeut ti sara si dikongo Bible anzere na mo? Mbage so ayeke aidé mo ti hinga ni.
Sara si a duti vrai ye na lê ti mo
Zia terê ti mo kue na yâ ti mbaï ni so mo yeke diko. Mo peut ti tara aye so:
Soro mbeni mbaï ti Bible so mo ye ti hinga ye na ndö ni. Mo peut ti soro mbeni mbaï ti Bible wala mbeni mbage ti Évangile, wala mo peut nga ti soro mbeni mbaï so a sara tënë ni na yâ dikongo Bible so a mä go ti azo ni dä so ayeke na ndö ti site jw.org.
Diko mbaï ni. Mo peut ti diko ni na yâ ti bê ti mo, wala mo peut nga ti diko ni na kota go mo na akamarade ti mo wala na azo ti sewa ti mo. Mbeni zo ni apeut ti duti zo ti fango peko ti tënë ni, na tanga ti azo ni apeut ti duti ti ala azo so a sara tënë ti ala na yâ ti mbaï ni.
Tara ti sara ambeni ye so a fa na gbe ni ge so:
Fa peko ti mbaï ni na lege ti dessin. Sara adessin ni nde nde ti fa tongana nyen la aye ni asi na peko ti terê. Sara akete mbeti na terê ni ti fa aye so asi na yâ ti adessin ni oko oko.
Tongana mo diko ye na ndö ti mbeni zo so ayeke be-ta-zo so Bible asara tënë ti lo, sû anzoni sarango ye ti lo nga na aye so lo sara, na pekoni tingbi ni na atufa so lo wara grâce na aye ni so.
Sara si mbaï ni aga tongana mbeni ye so asi ade ti ninga ape. Fa peko ti mbaï ni na alege nde nde, na sara comme si mo yeke “hunda tënë” na azo ti yâ ti mbaï ni nga na azo so ayeke lani dä si abâ ye ni na lê ti ala.
Tongana mbeni zo na yâ ti mbaï ni amû lani mbeni sioni desizion, tara ti imaginé ye ti peko ni. Na tapande, bâ ye so asi na Pierre so abere lani Jésus (Marc 14:66-72). Tongana nyen la Pierre apeut fade ti kiri tënë na lege ni na hunda ti azo ni?
Tongana mo hinga ti sara ni, leke mbeni scénette ti mo wani so ague oko na mbeni mbaï ti Bible. Fa ye so zo apeut ti manda dä.—aRomain 15:4.
Mo lingbi ti sara si ambaï ti Bible akiri tongana ye so asi ade ti ninga ape!
Gi nda ti ye so mo yeke diko!
Tongana mo bâ anzene nzene tënë ti yâ ti mbaï ni, mo peut ti manda ambeni ye na ndö ti mbaï ni. A lingbi ti si so gï mbeni tënë oko wala use na yâ ni afa na mo aye mingi na ndö ti mbaï ni.
Na tapande, haka Matthieu 28:7 na Marc 16:7.
Ngbanga ti nyen la Marc atene so Jésus ayeke asi na adisciple ti lo nga “na Pierre”?
Ti mû maboko na mo: Marc ayeke lani dä ape na ngoi so aye ni so asi; a yeke Pierre la afa na lo peko ti aye ni.
Gi akiringo tënë ni: Ngbanga ti nyen la a nzere lani na Pierre ti mä so Jésus aye ti kiri ti bâ lo? (Marc 14:66-72). Tongana nyen la Jésus afa na Pierre so ni yeke tâ vrai kamarade ti lo? Tongana nyen la e peut ti mû tapande ti Jésus ti duti mbeni vrai kamarade ndali ti amba ti e?
Tongana mo sara si atënë ti Bible aduti vrai ye na lê ti mo nga mo gi nda ti aye so mo yeke diko so nzoni, dikongo Bible ayeke nzere ande mingi na mo!