Bible atene nyen na ndö ti mungo ye na zo?
Kiringo tënë ti Bible
Bible ahunda na e ti mû ye na zo na bê ti e wani nga na nzoni bibe. Bible afa so mungo ye na zo ayeke ga na ye ti nzoni na zo so awara ni me nga na zo so amû ye ni (aProverbe 11:25; Luc 6:38). Jésus atene: “Mungo ye na zo aga na ngia mingi ahon warango ye na tïtî zo.”—Kusala 20:35.
Na ngoi wa la Nzapa ayeke yeda na ye so e mû na mbeni zo?
A yeke nzere na Nzapa mingi tongana e mû ye na zo na bê ti e wani. Bible atene: “Zia zo oko oko asara tongana ti so lo leke na bê ti lo ti sara, na vundu na bê pëpe wala a gbu lo gbungo na ngangu pëpe, ndali ti so Nzapa andoye zo so amû ye na ngia.”—2 aCorinthien 9:7.
Azo so ayeke na yâ ti “bungbi ti Nzapa” so Nzapa ayeda na ni ayeke mû ye na zo na bê ti ala wani (Jacques 1:27, kete tënë na gbe ni). Tongana mbeni zo, na bê ti lo wani, amû ye na mbeni zo so ayeke na yâ ti bezoin, lo yeke sara kua maboko na maboko na Nzapa la, na Nzapa abâ ye so lo sara so tongana bon la lo sara na ni so (aProverbe 19:17). Bible afa so tongana mbeni zo amû ye na mba ti lo, Nzapa wani la ayeke kiri na ni na lo.—Luc 14:12-14.
Na ngoi wa la Nzapa ayeke yeda na ni ape?
Tongana mo mû ye ni na mbeni bibe so ayeke na lege ni ape. Na tapande:
Ti tene azo agonda mo.—Matthieu 6:2.
Ti tene mo wara mbeni ye na pekoni.—Luc 14:12-14.
Ti tene Nzapa abâ mo na nzoni lê nga lo mû na mo fini ti lakue lakue.—Kusala 8:20.
Tongana mo mû ye na zo ni ti tene lo sara na ambeni ye so Nzapa aye ni ape. Na tapande, a yeke na lege ni ape ti mû nginza na mbeni zo ti sara na ajeu ti nginza wala ti vo na mbangi wala ti tene lo nyon na sämba ahon ndö ni (1 aCorinthien 6:9, 10; 2 aCorinthien 7:1). A yeke na lege ni nga ape ti mû ye na mbeni zo so aye ti sara kua ape, atâa so lo yeke na ngangu ti sara kua ti bâ lege ti abezoin ti lo wani.—2 aThessalonicien 3:10.
Tongana e mû ye na azo ahon ndö ni na e grisa ti bâ lege ti abezoin ti azo ti sewa ti e. Bible atene so a lingbi mokonzi ti sewa abâ lege ti abezoin ti azo ti sewa ti lo (1 Timothée 5:8). A yeke duti ande na lege ni ape ti tene mbeni mokonzi ti sewa amû ye mingi na azo, me azo ti sewa ti lo ayeke bâ pasi. Nga, Jésus ake sarango ye ti azo so ake ti bâ lege ti ababâ na amama ti ala so aga mbakoro awe, so atene amosoro ti ala ayeke mbeni “matabisi so a zia ni nde awe ti mû na Nzapa.”—Marc 7:9-13.