Mbi mû mbage na kua so a sara si tâ tënë ti Bible amû ndo

Na peko ti so babâ ti mbi ahunda na mbi fani mingi ti manda Bible, mbi yeda na ni. Li ti mbi akpe lani ti bâ tongana nyen la atënë ti Bible ague oko na atënë so awandara atene. Tongana ngoi ayeke hon, mbi yeke sûr so Bible ayeke tënë ti Nzapa nga so aTémoin ti Jéhovah ayeke fa ye na lege ni nga ala yeke sara ye alingbi na amama-ndia so ayeke na yâ ni. Na ngu 1970, mbi na babâ ti mbi e wara lani batême oko. Ambeni ngu na pekoni, mama ti mbi nga na aita ti mbi ti wali use awara batême.

Ye so agbu bê ti mingi ti amba ti mbi ayeke sarango ngia. Na temps so mbi yeke na ngu 17, mbi komanse ti ye sarango ye ti ala. Me, acouple so amanda Bible na mbi ayeke lani na ngia na yâ ti kua ti ngoi kue nga mbi ye ti sara ye tongana ala. Na temps so mbi yeke na ngu 21, mbi ga pionnier.

Mbi ga ti bâ so kua ti ngoi kue asara si mbi yeke vraiment na ngia na mbi regrétté ngbanga ti nyen la mbi komanse ni lani hio ape. Mbi ye lani mingi ti fa tënë na port ti Göteborg ndali ti so kâ la mbi yeke fa lani tâ tënë na azo ti kodro nde nde so ayeke sara kua na yâ ti abateau.

Na yâ ti angu 50 so ahon, mbi wara pasa ti fa nzoni tënë na groupe ti azo so ayeke tene ayanga ti kodro nde nde. Zia mbi fa na ala tongana nyen la aye ni kue akomanse lani.

Sarango kua na MEPS

Ti tene mbi wara aye so mbi yeke na bezoin ni na yâ ti kua ti pionnier ni, mbi yeke sara kua na ambeni lango tongana mbeni typographe. Na ngoi ni so, fason so azo ayeke imprimé na ambeti achangé. Ahon ti sara kua na ngbene kode ti imprimengo na ambeti, e yeke sara kua na photographie ti tokua atënë nga na a-image na ndö ti papier ni. Mbi manda ti sara kua na machine ti photocomposition so a sigi ade ti ninga ape ti leke na aplaque ti imprimengo na ambeti.

Na ngu 1980, mbi sara mariage na Helene, so ayeke mbeni pionnier permanent, so tongana ti mbi aye ti sara lisoro na azo so alondo na ando nde nde na yâ ti dunia kue nga lo ye ti hinga ye na ndö ti asarango ti ala. Objectif ti e ayeke ti gue na Ekole ti Galaad nga ti ga amissionnaire.

Me, ndali ti so mbi hinga ye na ndö ti typographie, a iri mbi na Helene ti sara kua na Béthel ti Suède. Bungbi ti Jéhovah aye lani ti sara kua na afini technologie ti amélioré fason ti imprimengo ambeti. Tongaso, na ngu 1983, a tokua e na Béthel ti Wallkill na New York ti sara mbeni formation na ndö ti MEPSa (Système électronique de photocomposition multilingue) so aita ngbâ ti sara kua na ndö ni.

Tongana ti so a fa lani na e, MEPS ayeke mbeni gbakuru na ndö ti ordinateur so amû lege ti pika gbâ ti atënë wala agere-mbeti nde nde, ti leke atënë ni nzoni na terê ti afoto ni nga ti tene a composé atënë ni na ndö ti alembeti ni. Kua ti e ayeke ti sara kua na afini tënë ti MEPS ni tongaso si a peut ti imprimé ambeti ti e na gbâ ti ayanga ti kodro. Angu mingi na pekoni, laso, aTémoin ti Jéhovah ayeke fa nzoni tënë na ayanga ti kodro ahon 1000.

Na pekoni, a tokua mbi na Helene na Asie ti tene e zia ambeni yanga ti kodro na ndö ti MEPS. E bâ so ayeke mbeni pasa la e yeke na ni ti aidé ti sara si azo amä nzoni tënë na ambeni yanga ti kodro.

Fason ti sarango ye ti azo ti ndo ni ayeke nde mingi na ti e

Na ngu 1986, mbi na Helene, e gue na Inde. E yeke gi ti sara ye alingbi na fason ti sarango ye ti azo ti ndo ni so ayeke nde na ti e. Na temps so e si na Bombay, so a iri ni fadeso Mumbai, e gi lani bê ti e na ndö ti fini ndo ni. Fason ti sarango ye ti azo ti Suède ayeke tâ nde mingi na ti Inde. Na kozo yenga ni, e ye vraiment ti kiri na kodro ti e.

Na peko ti so yenga oko ahon awe, e use kue e tene même tënë na fin ni, e tene: ‘E ye lakue ti duti amissionnaire. Comme a tokua e na kodro-wande awe, e peut ti dö kua ni ti zia ape. E doit ti adapté na fini ndo ti e ni.’

Tongaso, ahon ti zia kua ni, e décidé ti manda ye kue so e peut ti manda na ndö ti fason so azo ni ayeke vivre na ni so ayeke tâ nde na ti e. So e sara tongaso, a sara si mbi na Helene, e ye Inde mingi. Ti vrai ni, e manda lani ayanga ti kodro use, Gujarati nga na Pendjabi.

Na Birmanie

Na ngu 1988, a tokua e na Birmanie mbeni kodro so ayeke na popo ti Chine, Inde nga na Thaïlande. Aye ti poroso asara si wusuwusu asi lani na Birmanie, nga mingi ti ambage ti kodro ni ayeke na gbe ti komandema ti aturugu. Ade a zia lani na yâ ti MEPS ape agere-mbeti so apeut ti sara kua na ni ti sara mbeti na yanga ti kodro ni, nga mbeni logiciel so apeut ti sara ni ayeke dä ape. Tongaso, kota kua so e yeke na ni lani ayeke ti créé afini gere-mbeti nga ti tokua adessin ni na Wallkill, tongaso si a zia ni na yâ ti MEPS.

Na aéroport, Helene ayeke yô lani adessin ni na yâ ti sac à main ti lo. Ndali ti wusuwusu so ayeke na yâ ti kodro ni, atuguru apeut ti arrêté e tongana ala wara na terê ti e ambeti so ayeke na yanga ti Birmanie. Me na temps so a yeke fouillé e, Helene ayô maboko ti lo na nduzu. Zo oko abâ sac à main ni ape.

Na ndö ni, e mû na atraducteur ti Birmanie afini ordinateur portable nga na a-imprimante, na e formé ala na ndö ti MEPS. Mingi ti atraducteur ni ade ti bâ mbeni ordinateur lâ oko ape, me ala ye ti manda ye na ndö ti afini kode ni so. Gï na yâ ti kete ngoi, ala yeke sara kua encore ape na angbene machine ti imprimengo na aye so abezoin mbeni zo ti leke atënë ni na maboko, tongaso si a composé ni na alembeti. Ye so asara si qualité ti ambeti ti e aga nzoni ahon ti kozo.

Na Népal

Na ngu 1991, a tokua mbi na Helene na Népal, mbeni kodro so ayeke na mbage ti sud ti Himalaya. Na temps ni lani, congrégation ayeke gï oko nga ambeti ayeke mingi ape na yanga ti Népal.

Kete na pekoni, a traduire gbâ ti ambeti nga a kangbi ni na yâ ti territoire ni. Laso, aTémoin ti Jéhovah ayeke 3000 tongaso na Népal nga acongrégation ayeke 40 tongaso. Na ngu 2022, azo so aga na dango bê na kuâ ti Christ ahon 7500.

A sigi na mbeni brochure na yanga ti Lahu

Na ngu 1995, amissionnaire so a tokua ala na gbata ti Chiang Mai, na Thaïlande, akomanse ti fa tënë na akete mara so ayeke na li ti ahoto so ayeke tene yanga ti Lahu. Lahu ayeke mbeni kodro so azo so ayeke na mbage ti afrontière ti Chine, Laos, Birmanie, Thaïlande nga na Vietnam la ayeke tene ni. Me, ambeti ayeke na ayanga ti kodro so ni ape.

Mbeni maseka-koli so amissionnaire asara étude na lo atraduire brochure“Voici, je fais toutes choses nouvelles” so ayeke na yanga ti Thaï na Lahu. Na pekoni, lo na ambeni zo ti kete-kodro ti Lahu ni abungbi nginza na ala tokua brochure ni nga na nginza ni na filiale. Na yâ ti lettre so ala sara, ala tene so ala ye ti tene azo kue so ayeke tene yanga ti Lahu ahinga tâ tënë so ayeke na yâ ti brochure ni.

Ambeni ngu na pekoni, mbi na Helene, e wara pasa ti formé atraducteur so ayeke tene yanga ti Lahu ti sara kua na MEPS. Mbeni oko ti atraducteur ni so awara batême ade ti ninga ape ayeke sara kua na antenne ti traduction na Chiang Mai. A-étonné e ti bâ so ayeke lani molenge-koli so atraduire brochure “Voici!” na yanga ti Lahu so la.

Na ngu 1995, mbi na Helene e kiri na Inde, e formé atraducteur ti filiale ni ti tene ala sara kua na MEPS so ayeke mbeni gbakuru so ala bezoin ni ti sara na akua ti ala. Laso, a yeke wara gbâ ti ambeti na ayanga ti kodro nde nde na Inde ti aidé azo ti manda Bible nga ti tene ala gue na li ni ti wara batême.

E wara gbâ ti anzoni ye na yâ ti gigi ti e

Depuis na ngu 1999 la mbi na Helene, e yeke sara kua na filiale ti Grande-Bretagne. E yeke sara kua na yâ ti équipe so ayeke programmé MEPS na kota ndokua ti e. Anzere na e mingi so e fa tënë na azo na Londres na yanga ti Gujarati nga na Pendjabi. Tongana a zia mbeni fini yanga ti kodro na ndö ti jw.org, e yeke gi alege kue ti fa tënë na azo so ayeke tene yanga ti kodro ni so na yâ ti territoire ti e.

Anzere na mbi so na temps so mbi ngbâ maseka, mbi leke lani ti sara ambeni ye na yâ ti kua ti Jéhovah ahon ti mû peko ti amba ti mbi so aye gï ti sara ngia. Desizion so mbi na Helene e mû ti sara kua ti ngoi kue, e regretté ni ape. Anzere na e so e gue na akodro ahon 30, nga e bâ na lê ti e wani tongana nyen la nzoni tënë asi na amara kue, akete mara kue nga na azo ti ayanga ti kodro kue.—Apocalypse 14:6.