11 Duti zo so aye kua

TËNË SO AYE TI TENE NYEN?

Azo so aye kua ayeke kpe kua ape. A nzere na ala ti sara kua ngangu ti wara aye so ala bezoin ni nga ti aidé amba ti ala, même si kua ti ala ni aga na ala yango-iri ape.

NGBANGA TI NYEN A YEKE KOTA YE?

Atâa mo ye wala mo ye ape, mo yeke na gbâ ti aye so mo doit ti sara na yâ ti gigi ti mo. So laso azo mingi aye ti sara kua ngangu ape so, tongana mo sara kua ngangu, mo yeke bâ nzoni na pekoni.—Zo-ti-fa-tene 3:13.

“Mbi bâ so tongana zo asara kua ngangu, terê ti lo ayeke nzere mingi. Mara ti nzerengo terê ni so apusu mbi ti ye kua. Tongana mo ye kua mingi ayeke sara si azo ayeke tene nzoni tënë ti mo.”—Reyon.

MAMA-NDIA TI BIBLE: “Mara ti ngangu kua nde nde kue aga na ye ti nzoni.”—aProverbe 14:23.

YE SO MO PEUT TI SARA

Tongana mo ye ti duti mbeni zo so aye kua, sara ye alingbi na awango so ayeke na gbe ni ge so.

Duti na ngia ti manda ti sara kua nzoni. Atâa tongana mo yeke sara kua ti da wala adevoir so a mû na mo na ekole ti sara na yanga-da wala tongana mo yeke sara mbeni senge kua nde, zia li ti mo kue gï na ndö ni. Tongana mo hunzi ni awe, gi ti bâ tongana nyen la mo peut ti sara ni encore nzoni mingi nga hio. Tongana mo hinga ti sara ni, mo yeke ye ande ni mingi.

MAMA-NDIA TI BIBLE: “Mo bâ mbeni zo so ahinga ti sara kua ti lo nzoni? Lo yeke luti na gbele agbia, lo yeke luti na gbele asenge zo pëpe.”—aProverbe 22:29.

Gbu li na ndö ti anzoni ye ti pekoni. Mingi ni, tongana mo sara akua ti mo na lege ni, amba ti mo ayeke bâ nzoni na pekoni. Na tapande, tongana mo sara akua so a mû na mo na yanga-da nzoni, a yeke yapu na ala kua na yanga-da.

MAMA-NDIA TI BIBLE: “Mungo ye na zo aga na ngia mingi ahon warango ye na tïtî zo.”—Kusala 20:35.

Sara kua ahon ti so a hunda na mo. Ahon ti sara gï ye so a hunda na mo awe, tara ti sara ahon ti so a hunda na mo ti sara. Tongana mo sara tongaso, a yeke fa so mo yeke sara kua mingi gï ngbanga ti so a forcé mo ape, me ngbanga ti so mo la mo ye ti sara ni.—Matthieu 5:41.

MAMA-NDIA TI BIBLE: “Nzoni ye so mo sara aduti ye so a gbu mo gbungo na ngangu ti sara ni pëpe, me ye so mo sara na bê ti mo wani.”—Philémon 14.

Hinga limite ti mo. Zo so aye kua ayeke zo ti goigoi ape, me a ye ti tene nga ape so lo yeke zo so asara kua ahon ndö ni. Lo hinga limite ti lo, lo yeke na ngia ti sara kua, me a yeke nzere nga na lo ti wu terê.

MAMA-NDIA TI BIBLE: “Ti wu terê kete ayeke nzoni ahon sarango kua ahon ndö ni nga na tombango peko ti pupu.”—Zo-ti-fa-tene 4:6.