Fa na lo ti duti zo so a peut ti sara confiance na lo

TËNË SO AYE TI TENE NYEN?

Tongana mo mû kua na mbeni zo so ayeke zo ti confiance, mo hinga so lo yeke sara ni nzoni nga lo yeke hunzi ni na retard ape.

Mbeni molenge apeut ti manda ti duti zo ti confiance même si lo ngbâ kete mingi. Mbeni mbeti (Parenting Without Borders) atene so tongana amolenge ayeke na ngu oko na nze ota, ala yeke sara ye so babâ na mama ti ala ahunda na ala ti sara. Tongana ala yeke na ngu oko na ndambo, ala ye ti sara ye kue so babâ na mama ti ala ayeke sara. Na yâ ti gbâ ti akodro, ababâ na mama ayeke fa na amolenge, so ngu ti ala yeke na popo ti ngu 5 ti si na ngu 7, tongana nyen ti aidé na akua ti yanga-da. Même si amolenge ni ade kete, ala peut ti manda ti sara gbâ ti akua.

A YEKE KOTA YE TI DUTI ZO TI CONFIANCE

Na ambeni ndo, gbâ ti amaseka ayeke quitté yanga-da ti gue ti vivre ala oko, me na pekoni tongana akpale asi ala yeke kiri na ndö ti Papa na Maman. Ye tongaso asi na ambeni ndali ti so ababâ na mama ti ala afa na ala lâ oko ape tongana nyen ti sara kua na nginza ti ala, ti sara akua ti yanga-da wala ti sara akua so a mû na ala nzoni.

A yeke ndali ni la a yeke bien ti fa na molenge ti mo ti sara ambeni kua laso, tongaso si a-aidé lo na temps so lo kono. Mbeni mbeti (How to Raise an Adult) atene so ababâ na amama adoit ti fa kua na amolenge, ahon ti tene ala la asara ye kue na amolenge ni, tongaso si tongana mbeni lâ amolenge ni aquitté yanga-da ni ala wani apeut ti mû charge ti terê ti ala.

TONGANA NYEN TI FA NA LO TI GA ZO SO A PEUT TI SARA CONFIANCE NA LO?

Mû na lo akua ti sara.

MAMA-NDIA TI BIBLE: “Mara ti ngangu kua nde nde kue aga na ye ti nzoni.”​—aProverbe 14:23.

Akete molenge aye ka mingi ti sara kua na terê ti ababâ na mama ti ala. Tongaso, mo peut ti profité ti mû na ala ambeni kua ti sara na yanga-da.

Ambeni babâ na mama atene so ala ye ka ti mû akua ti yanga-da na amolenge ti ala ape ndali ti so amolenge ni ayeke déjà na gbâ ti adevoir ti ekole ti sara awe.

Me mingi ni, amolenge so ayeke ka na akua na yanga-da ti sara ayeke manda ka mbeti nzoni na ekole, ndali ti so na yanga-da a fa na ala ti sara kua kue so a mû na ala ti sara. Nga, mbeni mbeti (Parenting Without Borders) atene so tongana e zia lege na amolenge ti e ape ti aidé e na temps so ala de kete, ala yeke komanse ti bâ so ti aidé azo ayeke nga kota ye ape. Ala yeke ku fadeso ti tene azo la asara ye na ala.

Tongana amolenge ayeke sara akua lakue lakue na yanga-da, ala yeke manda ti aidé amba ti ala nga ti pensé gï na ala wani ape. Ala yeke bâ so ala kue place ti ala ayeke na yâ ti sewa ni nga so a ku na mbage ti ala ti sara ambeni ye.

Fa na lo so tongana lo sara faute, ye ti pekoni ayeke dä.

MAMA-NDIA TI BIBLE: “Mä wango nga yeda ti tene a fa lege na mo, tongaso si kekereke mo ga zo ti ndara.”​—aProverbe 19:20.

Tongana molenge ti mo asara afaute, na tapande tongana lo buba ye ti mbeni zo na mbana ape, honde tënë ni ape. Lo peut ti sara aye so a hunda ti leke kpale ni, na tapande ti hunda pardon, na peut-être même ti mû mbeni ye na zo ni na place ni.

Tongana amolenge asara faute si ala yeda na ni, ye so ayeke aidé ala

• ti duti azo so ayeke tene tâ tënë

• ti bi tënë ni na li ti mbeni zo ape

• ti kpe ti gi gï araison

• ti hunda pardon