AKPALE AHON NDÖ TI DUNIA

4 | Bata beku ti mo

NDANI SO A YEKE KOTA YE

Gingo bê na ndö ti akpale ti dunia apeut ti sara ngangu na ndö ti azo nga asara ala vundu. Mingi ti azo so akpale ni so asi na ala abâ so mbeni beku ayeke dä ape. Ala yeke sara ye tongana nyen?

Ambeni ake même ti gbu li na ndö ti gigi ti kekereke.
Ti ambeni, ala yeke nyon sämba wala mbangi tongaso si ala pensé ape na ndö ti akpale ti ala.
Na ambeni atene so ayeke bien ti kui ahon ti ngbâ na fini nga ala pensé ti fâ terê ti ala.

Ye so mo doit ti hinga

Ambeni kpale so mo tingbi na ni apeut ti duti gï teti kete ngoi na a peut ti changé na mbeni lege so mo ku terê ti mo na ni ape.
Même si tongana situation ti mo ni achangé ape, ambeni ye ayeke dä so mo peut ti sara ti aidé mo ti gbu ngangu.
Bible amû mbeni nzoni beku so akpale ti azo ayeke hunzi ande biani biani.

Ye so mo peut ti sara fadeso

Bible atene: “Ala gi bê ti ala lâ oko pëpe ngbanga ti kekereke, ndali ti so kekereke ayeke ande na agingo bê ti lo wani. Akpale ti lango oko oko alingbi na lango ni.”—Matthieu 6:34.

Ti gi bê na ndö ti kekereke, a yeke sara si mo peut ti sara ape aye so mo bezoin ti sara ni laso.

Ti gi bê na ndö ti asenge senge ye so apeut ti si ape ayeke ga gï na mo agingo bê na asara si mo yeke na beku ape ndali ti pendere gigi ti kekereke.

E SO MO PEUT TI SARA: Ambeni wango

DUTI NA NZONI BANGO NDO

Bible atene: “Ti zo so ayeke bâ pasi, alango ti lo kue ayeke gï sioni, me zo so bê ti lo ayeke na ngia ayeke lakue na yâ ti matanga.” (aProverbe 15:15). Tongana mo yeke zia bê ti mo mingi na ndö akpale ni, a peut ti sara si mo bâ so mbeni solution ayeke dä ape. Me, nzoni bango ndo apeut ti aidé mo ti gbu li na ndö ti aye so mo peut ti sara ti leke na kpale ni.

Limité ngoi so mo yeke mû ti mä na asango.
Na hunzingo ti lango oko oko, gbu li na ndö ti aye use wala ota so mo peut ti kiri singila ndali ni.
Sara na mbeti aye so mo bezoin ti sara na yâ ti lango ni. Ti kangbi yâ ti akota kua so mo yeke na ni kete kete, a yeke sara si mo yeke bâ ande aye ti peko ti effort so mo sara na yâ ti lango ni.

GI MUNGO MABOKO

Bible atene: “Zo so azi terê ti lo yamba na azo . . . lo ke ndara kue ti sara ye ti nzoni.” (aProverbe 18:1). Mo peut ti sigi na yâ ti mbeni dû so alï mingi mo oko ape, me na lege ti aide ti mbeni zo, mo peut ti sigi dä.

Hunda na azo ti sewa ti mo wala akamarade ti mo ti mû maboko na mo.
Mo nga kue, gi ambeni lege so mo peut ti mû maboko na ala. Ti sara aye ndali ti ambeni zo ayeke aidé mo ti duti na nzoni bango na ndö ti akpale ti mo wani.
Tongana mo yeke na beku ape nga mo pensé so ayeke bien ti ngbâ na fini ape, gi ti gue ti bâ mbeni docteur. Parfois, tongana mbeni zo ayeke na sentiment ti fâ terê ti lo ayeke signe ti mbeni kpale ti seni, na tapande, ye tongana dépression. Mingi ti azo awara aide na lege ti traitement so ala wara.a

a Zingo na lango! so afa pëpe mbeni mbilimbili kode ti kaïngo na kobela.

Bible amû mbeni nzoni beku

Mbeni zo ti sungo psaume atene lani na yâ ti sambela ti lo na Nzapa atene: “Tënë ti mo ayeke lampe ndali ti gere ti mbi na ayeke lumière ndali ti lege ti mbi.” (Psaume 119:105). Bâ tongana nyen la Bible ayeke tongaso.

Tongana e tambela na bï, mbeni lampe ayeke aidé e ti hinga ndo so e yeke tambela dä. Legeoko nga, Bible ayeke na apendere wango ti ndara so apeut ti fa lege na e na temps so e bezoin ti mû mbeni kpengba desizion.

Tongana lumière aza na ndö ti lege so e tambela dä apeut ti sara si e bâ ndo ayo na devant ti e. Legeoko nga, Bible afa na e so mbeni beku ndali ti nzoni gigi ti kekereke ayeke dä.

Bible ayeke mbeni buku so ayeke nzoni-kue so afa gï pëpe mbaï ti azo na tongo nda ni; me a mû nga na e mbeni nzoni beku ndali ti gigi ti kekereke. Bible ayeke kiri tënë na ahunda so:

1.

Tongana nyen la pasi ato nda ni?: Bible atene so “na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.”—aRomain 5:12.

2.

Ngbanga ti nyen la azo apeut ape ti leke akpale ti e?: Bible atene so “zo so ayeke tambela, a yeke même na lo wani ti fa lege na gere ti lo pëpe.” (Jérémie 10:23). Akpale so ayeke na yâ ti dunia afa so tënë ti Bible so ayeke tâ tënë.

3.

Nyen la Nzapa ayeke sara ande ti hunzi na akpale ti e?: Bible atene so “Lo yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.”—Apocalypse 21:4.