Chapitre 15
Kozo ye ti kpene so Jésus asala
A SALA gi lango oko wala use so André, Pierre, Jean, Philippe, Nathanaël, na peut-être Jacques aga akozo disciple ti Jésus. Fadeso, ala yeke gue na sese ti Galilée, so adu ala kue na ya ni. Ala ye ti gue na Cana, kodoro so adu Nathanaël da. Cana ayeke na ndo ti ahoto, ndulu na Nazareth, ndo so Jésus akono da. A hiri ala na matanga ti mariage na Cana.
Mama ti Jésus aga nga na matanga ti mariage so. Marie, so ayeke ndeko ti sewa ti ala so amu tele, amu aye ti te na ti nyon na azo mingi so aga na matanga ni. Ni laa so lo baa hio so mbeni ye atia, na lo sala tene ni na Jésus tongaso: “Ala yeke na vin pepee.”
Biani, na lege ti tene so, Marie aye si Jésus asala mbeni ye teti vin ti ala ahunzi awe. Kozoni, Jésus aye ti ma lo pepee, lo tene na lo: “Wali, tene ti mo ayeke na ya tene ti mbi?” Jésus ayeke Gbia so Nzapa ahiri lo, tongaso sewa ti lo wala andeko ti lo alingbi ti fa na lo ye ti sala pepee. Ni laa Marie awara ndara ti zia tene ni na maboko ti molenge ti lo, na lo tene na azo so ayeke mu kobe: “I sala ye kue so lo tene na i.”
Ta ti tene omene, so oko oko alingbi ti mu litre ti ngu bale osio, ayeke na ndo so. Jésus atene na azo so amu kobe: “I zia ngu na ya ta so a si.” Awakua azia ngu da a si juska na yanga ni. Na pekoni, Jésus atene na ala: “Fadeso i to mbeni, i gue na ni na mokonzi ti matanga.”
Pendere ti vin ni asala si be ti mokonzi ti matanga ni ado na ngia, lo hinga pepee so asala vin na lege ti ye ti kpene. Lo hiri koli so asala mariage na lo tene na lo: “Azo kue amu vin ti nzoni kozoni, na tongana azo anyon ni mingi awe, ala mu mbeni vin ti nzoni mingi pepee. Me mo bata vin ti nzoni ahon juska fadeso.”
So ayeke kozo ye ti kpene so Jésus asala, na a sala si mabe ti afini disciple ti lo akpengba. Na pekoni, Jésus na mama ti lo na aita ti lo, mama oko, ague na adisciple ti lo na kodoro ti Capernaüm so ayeke ndulu na kota ngu ti Galilée. Jean 2:1-12.
▪ Lawa na ngoi so Jésus afa tene asala matanga ti mariage ti Cana?
▪ Ngbanga ti nyen Jésus ake ti ma yanga ti mama ti lo?
▪ Ye ti kpene wa si Jésus asala, na a sala kusala ti nyen na ndo ambeni zo?