Chapitre 18

Jean aga kete, Jésus aga kota

NA PEKO ti Pâque ti ngu 30, Jésus na adisciple ti lo alondo na Jérusalem. Ala kiri na kodoro ti ala na Galilée pepee, me ala gue na sese ti Judée ti mu batême na azo. A sala fadeso ngu oko awe so Jean Wabatizengo zo ayeke sala kusala oko so nga, na adisciple ayeke lakue na tele ti lo.

Biani, Jésus laa si ayeke mu batême na azo lo mveni pepee, me a yeke adisciple ti lo si ayeke mu ni na azo na gbele lo. Nda ti batême ti ala ayeke lege-oko na nda ti batême ti Jean. Biani, aJuif so ayeda ti kamata batême, batême ni ayeke fa ti gbiango be teti siokpari so ala sala na lege ti so ala bata tene ti mbele ti Ndia ti Nzapa pepee. Me, na peko ti londongo ti lo na popo ti awakinda, Jésus afa na adisciple ti lo ti mu na azo mbeni batême so ndani ayeke nde. Batême ti achrétien laso aye ti tene zo amu tele ti lo na Jéhovah Nzapa ti sala na lo.

E yeke na ngoi so Jésus alondo ti sala kusala ti lo. Ataa so zo oko oko asala kusala ti lo na mbage ti lo, Jean na Jésus afa ye na azo na ala mu batême na azo so agbian be ti ala. Ye oko adisciple ti Jean asala kota be na ala dema tele ti ala na lege ti Jésus: “Rabbi, (...) baa, lo yeke mu batême na azo na azo kue ague na lo.”

Jean aduti na mbanda pepee, nde na so lo yeke na ngia ti baa so iri ti Jésus ayeke wu na lo ye si adisciple ti lo, ala nga, aduti na ngia. Lo da be ti ala na tene so: “I yeke i mveni atémoin ti tene so mbi tene awe: Mbi yeke Christ pepee, me Nzapa ato mbi kozoni si lo ga.” Na lo gue na tene ti lo na li ni na pendere tapande so: “Zo so akamata fini-wali ayeke fini-koli. Me ndeko ti fini-koli, so aluti ti ma lo, ayeke na ngia ti ma le-go ti fini-koli ni. Tongaso, ngia ti mbi alingbi kue awe.”

Jean, so ayeke ndeko ti Fini-koli, ayeke na ngia nze omene kozoni tongana lo fa adisciple ti lo na Jésus. Ambeni na popo ti ala awara beku ti ga membre ti bungbi ti fini-wali ti Christ ti yayu, so ayeke bungbi ti achrétien so asa yingo na ndo ala. Jean aye si adisciple ti lo aga nga adisciple ti Jésus, teti kusala ti lo ayeke ti zi lege si kusala ti Christ atambela nzoni. Jean Wabatizengo zo atene na ala: “A yeke ngbanga ti lo ti ga kota, me a yeke ngbanga ti mbi ti ga kete.”

Jean, fini disciple ti Jésus, lo so ayeke kozoni disciple ti Jean Wabatizengo zo, asala tene ti ndo so Jésus alondo da na kota kusala so Lo sala ti so azo, lo tene: “Zo so alondo na nduzu aga lo hon ambeni zo kue. (...) Baba andoyee Molenge ni, na lo zia ye kue na ti ti lo. Zo so ama na be na Molenge ni ayeke na fini ti lakue lakue; me lo so ake yanga ti Molenge ni, fade lo baa fini pepee, me ngonzo ti Nzapa angba na ndo lo.”

Ngoi kete na peko ti so Jean atene kusala ti lo aga kete, gbia Hérode amu yanga ti gbu Jean. Hérode amu Hérodiade, wali ti ita ti lo Philippe. Teti so Jean afa polele na gigi so kusala ti Hérode ayeke sioni, Hérode amu yanga ti bi lo na kanga. Tongana Jésus ama tene ti gbungo Jean, lo londo na sese ti Judée na adisciple ti lo na lo gue na sese ti Galilée. Jean 3:22–4:3; Kusala 19:4; Matthieu 28:19; 2 aCorinthien 11:2; Marc 1:14; 6:17-20.

▪ Batême so amu na gbele Jésus kozoni na londongo ti lo na popo ti awakinda ayeke fa ti nyen? Na batême so amu na peko ti londongo ti lo ayeke fa ti nyen?

▪ Jean afa na gigi tongana nyen so mbito so adisciple ti lo ayeke na ni ayeke na lege ni pepee?

▪ A bi Jean na da ti kanga ndali ti nyen?