Chapitre 33
Lo sala si tene ti prophète Esaïe aga taa tene
TONGANA lo ma so aFarizien na azo ti Hérode aleke na be ti ala ti fa lo, Jésus na adisciple ti lo ague na mbage ti ngu ti Galilée. Ka, azo mingi aga na lo, ala londo na Palestine kue na nga na peko ti akatikati ti kodoro so. Jésus alungula kobela ti azo mingi, ni laa ala kue so ayeke na kobela ti ngangu agi lege ti ndu lo.
Tongana azo aga mingi tongaso, Jésus ahunda na adisciple ti lo ti zia ngo ndulu teti lo. Tongana lo gue yongoro kete na tele ti ngu ni, lo kanga lege na azo ti pete lo. Lo lingbi duti na ya ngo na ti fa ye na azo ni, wala lo gue na mbeni ndo na yanga ti ngu ni ti mu maboko na azo so ayeke ka.
Disciple Matthieu afa so kusala ti Jésus asala “si tene so prophète Esaïe atene” aga taa tene. Na pekoni lo fa tene ti prophétie so Jésus asala si a ga taa tene, a yeke so:
“Baa! Wakua ti mbi so mbi soro lo, lo so mbi ndoyee lo mingi, lo so âme ti mbi awara ngia na ya lo! Fade mbi zia yingo ti mbi na ndo lo, na fade lo sala tene ti fango ngbanga na amara. Fade lo papa wala lo dekongo pepee, fade zo ama yanga ti lo na lege ti kodoro pepee. Pele so asigigi na ya ti ngu na so asuru awe, fade lo doro pepee, na meche so kete wa ayeke da, fade lo mingo pepee, juska lo sala si fango ngbanga ti mbilimbili ahon na ngangu. Biani, fade amara azia beku ti ala na iri ti lo.”
Jésus ayeke biani wakua so Nzapa andoyee lo mingi na Lo wara ngia na ya lo. Lo fa polele ye so ayeke taa mbilimbili, ye so atene ti akotara ti anzapa ti wataka ahonde ni. Biani, teti so ala fa nda ti ndia ti Nzapa na lege ni pepee, aFarizien amu maboko pepee même na zo ti kobela na la ti sabbat! Tongana lo fa polele ye so ayeke mbilimbili ti Nzapa, Jésus azi azo so na gbe ti kungba ti atene ti akotara so ayeke mbilimbili pepee, ndani laa, amokonzi ti vorongo nzapa agi lege ti fa lo.
‘Fade lo papa wala lo dekongo pepee si zo ama yanga ti lo na lege ti kodoro pepee.’ So aye ti tene nyen? Biani, tongana Jésus alungula kobela ti azo, lo ‘wa ala mingi ti fa tene ti lo na azo pepee’. Lo ye pepee si asala tene ti lo mingi na ndo alege wala tene ni aga nde tongana ahon na yanga ti mbeni zo ti si na me ti mbeni.
Na mbeni mbage, Jésus aga na tene ti lo ti mu ngangu na azo so ahaka ala na pele so asigigi na ya ti ngu, so abaa, na adoro ni na gere. Ala kpa meche ti lin so guru asigigi da, so aga ndulu ti mingo tanga ti wa ni. Jésus afuti pepee pele so adoro ni wala lo mingo pepee meche ti lin so wa angba da kete kete. Nde na so, yeeke yeeke nga na ndoyee lo hinga ti yaa na nduzu azo ti taa-be-ti-molenge. Jésus ayeke biani lo so amara alingbi zia beku ti ala na lo! Matthieu 12:15-21; Marc 3:7-12; Esaïe 42:1-4.
▪ Tongana nyen si Jésus afa ye so ayeke taa mbilimbili, na lo papa wala lo dekongo na ndo akota lege pepee?
▪ Azo wa si akpa pele so asigigi na ya ti ngu so adoro ni na meche ti lin? Jésus asala ye na mbage ti ala tongana nyen?