Chapitre 77
Tene ti ye ti héritier
AZO AHINGA Jésus ate kobe na da ti mbeni Farizien. Tongaso, azo saki mingi mingi ague na da so ti ku lo ti sigigi. A-Farizien ake Jésus, na ala gi lege ti pusu lo ti tene mbeni tene so ayeke na lege ni pepee. Me, azo ni ayeke na nzala ti ma tene ti lo na ala mu tene ti lo na nenee ni.
Jésus asala tene kozoni na adisciple ti lo, lo tene: “I kpe mama-ti-mapa ti aFarizien so ayeke tene ti ndendia.” Tongana ala baa na ngoi so ala te kobe, lege kue ti vorongo nzapa ti aFarizien asi singo na ndendia. A-Farizien ahonde sioye ti ala na lege ti batango tene ti Nzapa teti le ti zo, me fade a fa ye so na gigi. Jésus atene: “Ye oko so ahonde biani ayeke pepee, teti fade a fa ye so na gigi, na tene oko ti lingo ayeke pepee, teti fade a si na gigi.”
Jésus akiri asala tene ti wango so lo mu na ala bale oko na use na la ni so lo to ala ti fa tene na sese ti Galilée. Lo tene: “I zia mbito ti ala so afa tele ti zo asala i pepee, ala so alingbi ti sala mbeni ye na pekoni pepee.” Nzapa aglisa mbeni oko ti akete ndeke pepee, tongaso Jésus atene na adisciple ti lo so fade Nzapa aglisa ala nga pepee. Lo tene: “Tongana ala gue na i na gbele azo, na amokonzi, na azo ti komande, (...) fade yingo ti nzoni-kue afa na i tene so alingbi i tene.”
Mbeni koli na popo ti azo mingi so asala tene. Lo hunda: “Maître, mo sala tene na ita ti mbi si lo kangbi ye ti héritier, na lo mu mbeni mbage na mbi.” Ndia ti Moïse atene so kozo molenge ti koli ayeke wara mbage use ti ye ti héritier, tongaso tene alingbi londo pepee. Me koli so aye ti wara ye mingi ahon ye so ndia amu lege na lo ti kamata.
Na lege ni, Jésus ake ti li na ya tene so. Lo tene: “Koli, zo nyen azia mbi wafango ngbanga wala zo ti kangbi ye ti i?” Na pekoni, lo mu kpengba wango so na azo ni: “I bata nzoni si tene ti be asala i pepee, teti fini ti zo ayeke pepee na ye mingi mingi so ayeke na lo.” Taa tene, même tongana zo awara nginza mingi mingi, fade lo kui na lo zia ni kue na peko ti lo. Ti fa nda ti tene so, na ti fa nga so a yeke ye ti buba ti gi pepee nzoni iri na gbele Nzapa, Jésus amu mbeni tapande. Lo tene:
“Yaka ti mbeni zo ti mosoro ale kobe mingi. Na lo sala tene na be ti lo, lo tene: ‘Fade mbi sala nyen? teti gogoro ti mbi alingbi na kobe ti mbi pepee.’ Na lo tene: ‘Fade mbi sala ye so: fade mbi fa gogoro ti mbi na sese, mbi sala mbeni gogoro ti kota ahon, na fade mbi zia le kobe na ye ti mbi kue na ya ni. Fade mbi tene na âme ti mbi: “Ame, mo yeke na ye mingi na ya gogoro alingbi na ngu mingi; mo duti nzoni, mo te, mo nyon, na mo sala ngia.” ’ Me Nzapa atene na lo: ‘Mo buba zo, na bi so fade ahunda âme ti mo. Na ye so mo leke awe, fade a yeke ti zo nyen?’ ”
Na ndani, Jésus atene: “Tongaso, zo so abungbi mosoro teti lo mveni, me lo yeke na mosoro na gbele Nzapa pepee, lo yeke tongana zo so.” Gbanda ti gingo mosoro ayeke mu adisciple pepee, me peut-être atene ti fini ti la na la alingbi ti pusu ala ti zia ti sala kusala na Jéhovah na âme ti ala kue. Tongaso, Jésus amu ngoi so ti kiri ti fa na ala nzoni wango so lo mu ngu oko na nze omene kozoni na Tene na ndo Hoto ni. Lo tene na adisciple ti lo:
“Tongaso, mbi tene na i: I gi be ti i tene ti fini ti i pepee, fade i te nyen, wala i yu bongo ti nyen. (...) I baa andeke, ala lu le kobe pepee, na ala fa le kobe pepee, na ala yeke na magasin wala gogoro pepee, me Nzapa amu kobe na ala. (...) I baa langa; i baa lege so ala maï; ala sala kusala pepee, na ala tina pepee; me mbi tene na i, même Salomon, na ya gloire ti lo kue, ayu bongo ti pendere alingbi na oko ti ala pepee. (...)
“I hunda pepee tene ti ye so fade i te, wala i nyon, na i zia be ti i agi i pepee; teti amara ti sese so agi ye so kue, na Baba ti i ahinga i ye ye so. Me i gi royaume ti Nzapa na fade amu ye so na i nga.”
A yeke nzoni ti gbu li ti e na ndo tene ti Jésus tongana tene ti nginza aga ngangu. Zo so agi be ti lo ahon ndoni teti aye ti mitele so lo ye ala na lo kiri na peko na lege ti gingo aye ti yingo, afa na gigi so lo ma na be pepee so Nzapa ayeke na ngangu ti mu ye so na awakua ti lo. Luc 12:1-31; Deutéronome 21:17.
▪ Koli ni ahunda tene na ndo ti ye ti héritier ngbanga ti nyen? Jésus amu wango wa?
▪ Jésus amu tapande wa? A ye ti tene nyen?
▪ Jésus akiri amu wango wa? Ngbanga ti nyen a lingbi na ngoi so?