Chapitre 79

Ake mbeni mara, me mara ni kue pepee

JÉSUS asala tene fade na azo so abungbi na gbele da ti mbeni Farizien. Ambeni zo afa na Jésus “tene ti azo ti Galilée so [mbeni mokonzi ti Rome Ponce] Pilate abungbi mene ti ala na sadaka ti ala”. Peut-être afa azo ti Galilée so na ngoi so aJuif saki mingi mingi asala wuluwulu ti ke salango fini lege ti ga na ngu na ya Jérusalem. Ala ke teti so Pilate akamata nginza ti sala kusala so na sanduku ti nginza ti temple. Azo so afa tene so na Jésus, peut-être ala ye ti tene so azo ti Galilée ahu pono ngbanga ti sioni kusala ti ala mveni.

Jésus aleke tene ni tongana lo hunda na ala: “Be ti i atene azo ti Galilée so ayeke na siokpari ahon ambeni zo kue ti Galilée? teti ala hu pono ti ye so. Mbi tene na i, pepee.” Jésus amu ngoi so ti mu kpengba wango so na aJuif: “Tongana i gbian be ti i pepee, fade i kue i kui lege-oko tongana ala.”

Na pekoni, Jésus adabe ala na mbeni ye ti vundu so asi na kodoro ti ala, peut-être kpale so asi nga na ngoi so asala fini lege ti ngu. Lo hunda na ala: “Wala azo bale oko na ndoni miombe so tour ti Siloam ati na ndo ala na afa ala, be ti i atene ala yeke na siokpari ahon ambeni zo kue so aduti na Jérusalem?” Jésus atene so azo so akui ngbanga ti sioni ti ala mveni pepee. Me, nde na so, “la na pasa” ayeke mingi aye so aga na aye ti vundu tongaso. Jésus akiri amu ngoi so nga ti zingo na azo ni: “Tongana i gbian be ti i pepee, fade i kue i kui lege-oko tongana ala.”

Jésus amu na pekoni mbeni tapande so alingbi na ngoi ti ala, lo tene: “Mbeni zo ayeke na keke ti figue so alu na yaka ti vigne ti lo, lo ga ti gi le ni, na lo wara le ni pepee. Tongaso, lo tene na zo ti bata vigne ni: ‘Mo baa, ngu ota so mbi ga ti gi le ni na keke ti figue so, na mbi wara pepee. Fa keke so na sese! Teti nyen a zia keke so ti futi sese?’ Zo ti bata vigne akiri tene na lo: ‘Maître, zia keke ni angba na ngu so nga, juska mbi de sese na gere ni, na mbi zia puru ti nyama da; peut-être fade a le na pekoni; me, tongana a le pepee, fade mo fa keke so na sese.’ ”

Teti ahon ngu ota Jésus agi lege ti sala si mabe amaï na popo ti mara ti aJuif. Me kusala ti lo ale mingi pepee, a le gi ambeni disciple so asi même ngbangbo mingi pepee. Fadeso, na ngu osio ni ti kusala ti fango tene ti lo, lo sala kua ngangu mingi ahon, a yeke lege-oko tongana lo de sese na lo zia puru ti nyama na tele ti “keke ti figue” so ayeke mara ti aJuif tongana lo fa tene na lo fa nda ti tene na wa na Judée na Pérée. Me lo sala kua ngangu senge senge! Mara ni ake ti gbian be ti lo na tongaso a lingbi na futingo ni. Gi mbeni kete tanga ti azo ti mara so ayeda na fango tene ti lo.

Ngoi kete na pekoni, Jésus afa nda ti tene na ya mbeni synagogue na la ti sabbat. Jésus abaa so mbeni wali ayeke so tele ti lo abaa mingi na so alingbi ti luti mbilimbili pepee teti ngu bale oko na miombe teti so mbeni yingo sioni asala lo pasi. Jésus abaa mawa ti lo, lo tene na lo: “Wali, kobela ti mo awe.” Lo zia maboko ti lo na ndo wali ni. Fade fade wali ni aluti mbilimbili na lo tonda ti sepela Nzapa.

Be ti mokonzi ti synagogue aso. Lo ke, lo tene: “La omene ayeke so azo alingbi sala kusala ti ala; tongaso, i ga na la ni so, si lo lungula kobela ti i, na i ga na la ti sabbat pepee.” Koli ni ayeda so Jésus ayeke na ngangu ti lungula kobela, me lo suku na azo so aga na lo ti lungula kobela ti ala na la ti sabbat!

Jésus akiri tene na lo: “I awandendia, i oko oko kue, i zi bagara wala lele ti i na sanduku ti kobe na la ti sabbat pepee? si i gue na ala na ngu. Wali so, lo yeke molenge ti Abraham na Satan akanga lo ngu bale oko na ndoni miombe, tongaso, a lingbi zi lo na ya ye so na la ti sabbat pepee?”

Tongana awato ti Jésus ama tene so, kamela asala ala, me azo mingi so aga na lo ayeke na ngia teti ye ti kpene kue so Jésus asala na gbele ala. Jésus akiri afa na ala mbeni tapande use so ayeke aprophétie na lege ti Royaume ti Nzapa, atapande so lo fa ngu oko kozoni na ndo mbeni mangboko na le ti ngu ti Galilée. Luc 13:1-21; Zo-ti-fa-tene 9:11; Matthieu 13:31-33.

▪ A sala tene ti akota ye ti vundu wa ge? Jésus afa ye nyen na azo na lege ti akpale so?

▪ E lingbi ti manda nyen na lege ti keke ti figue so ale pepee na nga kusala so asala ni ti gi lege ti sala si keke ni ale?

▪ Na lege wa si mokonzi ti synagogue afa so lo hinga Jésus ayeke na ngangu ti lungula kobela? Na tene wa Jésus afa na gigi ndendia ti koli so?