Chapitre 82

Jésus akiri amu lege ti Jérusalem

FADE FADE Jésus amu lege mbeni, na lo fa nda ti tene na kota kodoro na kete kodoro. Lo yeke peut-être na sese ti Pérée, so ayeke na gbe Judée na tele ti Jourdain. Me lo ye ti gue na Jérusalem.

A yeke peut-être ngbanga ti so tene ti ndara ti aJuif afa so azo so wungo ti ala ayeke gi kete ayeke wara salut si mbeni koli ahunda: “Seigneur, a yeke gi azo oko oko so ayeke wara salut?” Na ya kiringo tene ti lo, Jésus amu lege na awamango lo ti gbu li ti ala na ndo ye so ala lingbi ti sala si ala wara salut. Lo tene na ala: “I gi lege na ngangu [wala: i tiri ngangu, i sala na ngangu ti i kue] ti li na ya ni na lege ti kete yanga ni.”

A yeke ngoi ti sala ye fade fade na ngangu, teti Jésus atene na pekoni: “Fade azo mingi agi lege ti li na ya ni, na ala lingbi li pepee.” Ngbanga ti nyen? Jésus atene: ‘Tongana mveni ti da alondo, na lo kanga yanga ni awe, fade i luti na gigi, i tonda ti pika yanga ni, na i tene: “Seigneur, lungula yanga ni na e!” na fade lo kiri tene na ala: “Mbi hinga ndo so i londo da pepee, i zia mbi, i kue so i sala ye ti kirikiri!” ’

Biani, azo so angba na gigi aga na yanga ni na ngoi so be ti ala mveni aye. Me yanga ti da so ala lingbi ti li da kozoni akanga awe. Ti li na yanga ni, a lingbi ala ga hio, kamême so ngbonga ni ayeke na ngoi so ala ye pepee. Biani, ye ti vundu aku azo kue so ake ti zia fade fade taa lege ti vorongo Jéhovah na kozo ndo na ya fini ti ala!

Ambeni Juif mingi so ato Jésus na mbage ti ala ti sala kusala ti lo ti fango tene, akamata lege pepee ti yeda na aye so Nzapa aleke ti mu na ala salut. Teti so, Jésus atene so fade ala toto na ala te pembe ti ala tongana abi ala na gigi. Me, “fade ala so alondo na mbage ti to, ti do, ti banga na ti mbongo”, biani, azo na popo ti amara kue, “ala duti na table na royaume ti Nzapa”.

Jésus asala mbeni tene, lo tene: “Baa, ambeni zo so ayeke na ndani [azo so ayeke Juif pepee so ake ala, na nga aJuif so asala ngangu na ala] fade ala ga azo ti kozoni, na ambeni zo so ayeke azo ti kozoni [aJuif so ayeke wara ye ti nzoni na lege ti mitele nga na lege ti vorongo nzapa] fade ala ga azo ti ndani.” Azo so ayeke azo ti goigoi na azo so akiri singila pepee ayeke duti azo ti ndani na lege so fade ala yeke li la oko pepee na ya Royaume ti Nzapa.

A-Farizien aga na Jésus fadeso na ala tene na lo: “Sigigi mo gue na mbeni ndo nde, teti Hérode [Antipas] aye ti fa mo.” A yeke peut-être Hérode lo mveni si asala si wuluwulu so alondo ti tene Jésus azia sese ni. Peut-être mbito asala Hérode ti tene adiko lo nga na popo ti azo so afa mbeni prophète ti Nzapa, lege-oko tongana azo atene na ndo lo na ngoi so afa Jean Wabatizengo zo. Me, Jésus atene na aFarizien: “I gue i tene na mbako so: ‘Baa! Mbi yeke tomba ayingo sioni, na mbi yeke lungula kobela laso na kekereke, na la ota ni, fade mbi si na nda ti lege ti mbi.’ ”

Na pekoni so lo hunzi kusala ti lo na ya kodoro so, lo gue na mbage ti Jérusalem, teti, lo tene: “Prophète alingbi kui na mbeni ndo nde pepee, gi na Jérusalem.” Ngbanga ti nyen Jésus ayeke wara kui gi na Jérusalem? Ngbanga ti so Jérusalem ayeke kota kodoro ni, na ndo so e lingbi ti wara Sanhédrin da. Sanhédrin ayeke kota ndo ti fango ngbanga so ayeke na amembre bale mbasambala na ndoni oko, na a yeke nga ndo so ayeke mu sadaka ti anyama da. Tongaso, “Molenge ti Ngasangbaga ti Nzapa” alingbi pepee ti wara kui na mbeni ndo nde na gigi ti Jérusalem.

“Jérusalem, Jérusalem, mo so mo fa aprophète, na mo bolo na tene azo so Nzapa ato ala na mo, atoto Jésus, lege mingi mbi ye ti bungbi amolenge ti mo, lege-oko tongana mama ti kondo abungbi amolenge ti lo na gbe ti kpangbi ti lo, na i ye pepee! Baa! Azia da ti i na i awe.” A fa ngbanga ti sioni na ndo mara ni teti so lo ke Molenge ti Nzapa!

Na ngoi so Jésus amu lege ti gue na Jérusalem, mbeni mokonzi ti aFarizien ahiri lo ti te kobe na da ti lo. Azo ayeke baa lo mingi, teti a yeke la ti sabbat, na mbeni zo ayeke na gbele lo so ayeke na kobela so asala si tele ti lo asuku, tele ti lo abata ngu, peut-être na ya maboko na gere ti lo. Jésus ahunda na amaître ti ndia na aFarizien so ayeke da, lo tene: “Ndia amu lege na zo ti lungula kobela na la ti sabbat? wala pepee?”

Zo oko asala tene pepee. Tongaso, Jésus asava kobela ti koli ni, na lo zia lo, na lo gue. Na ndani, lo hunda tene so: “Tongana i yeke na molenge wala bagara so ati na du ti ngu, fade zo nyen na popo ti i agboto lo na gigi na la ti sabbat pepee?” Na ngoi so nga, zo oko alingbi kiri tene da pepee. Luc 13:22–14:6; Jean 1:29.

▪ Na lege ti tene ti Jésus, ye nyen alingbi mu lege na zo ti wara salut? Na ngbanga ti nyen azia azo mingi na gigi?

▪ Azo nyen ayeke “azo ti ndani” so aga “azo ti kozoni”? Azo nyen ayeke “azo ti kozoni” so aga “azo ti ndani”?

▪ Ngbanga ti nyen azo atene so Hérode agi lege ti fa Jésus?

▪ Ngbanga ti nyen a yeke na lege ni oko pepee ti fa mbeni prophète na gigi ti Jérusalem?