Chapitre 86

Toli ti molenge so aglisa

JÉSUS asala tene fade na aFarizien ti atoli use so andu tene ti mbeni ngasangbaga na mbeni nginza so aglisa, na amveni awara ala. Fadeso lo sala tene ti mbeni toli nde. Toli so afa tongana nyen mbeni baba so ayeke na ndoyee mingi asala na amolenge ti lo ti koli use, so ala use kue asala sioni ye mingi.

Toli so asala tene mingi na ndo ngambe molenge ni. Mbeni la lo hunda na baba ti lo ye ti héritier so ayeke ti lo, na baba ni amu ni na lo fade fade. Na pekoni, lo zia da ti baba na mama ti lo na lo tonda ti tambela kirikiri. Me zia Jésus afa na e toli so, na zia e tara ti hinga azo so azo ti toli so aduti fa ti ala.

“Mbeni zo, atene Jésus, ayeke na amolenge ti koli use. Ngambe ni atene na baba ti lo: ‘Baba, mo mu na mbi ye ti héritier so ayeke ti mbi.’ Lo [baba ni] kangbi ye ti lo na popo ti ala.” Ngambe molenge so asala nyen na ye so lo wara?

“Na nda ni lango mingi pepee, Jésus atene na e, ngambe molenge ni abungbi ye ti lo kue, lo gue na mbeni sese yongoro, na lo futi ye ti lo kue ka na lege ti sioni.” So aye ti tene, lo futi nginza ti lo kue na awali ti pitan. Na pekoni, lege-oko tongana Jésus afa, aye ti ngangu asi.

“Tongana lo hunzi ye ti lo kue awe, kota nzala ti kobe asi na kodoro so, na nzinga atonda ti sala lo. Lo gue ti duti na mbeni oko ti azo ti kodoro ka, na zo so ato lo na yaka ti lo ti bata acochon. Na lo ye ti te kobe so acochon ate si ya ti lo asi, na zo oko amu ye na lo pepee.”

Ti bata acochon ayeke ye ti kamela mingi teti mbeni Juif! Na lege ti Ndia anyama so ayeke sioni. Me, ye so amu vundu mingi ahon na molenge koli so ayeke so nzala apusu lo ti ye ti te kobe so amu ni na anyama so. Na ya ye ti kota vundu so, Jésus atene, “lo hinga ye so lo sala awe”.

Jésus atene na pekoni: “Lo tene [na lo mveni]: ‘Awakua ti baba ti mbi ayeke mingi so ayeke na kobe alingbi na ala, na ahon ala, na nzala ayeke fa mbi na ndo so! Fade mbi londo mbi gue na baba ti mbi, na mbi tene lo: “Baba, mbi sala sioni so ake yayu na ake mo. A lingbi mo hiri mbi molenge ti mo mbeni pepee. Mo kamata mbi tongana boi ti mo.” ’ Na lo londo, lo gue na baba ti lo.”

E gbu li ti e kete. Tongana baba ti lo asala ngonzo na lo suku mingi na ngoi so lo zia da ti lo, e lingbi ti tene so lo lingbi pepee ti hinga ye so lo sala fadeso. Peut-être lo lingbi ti leke na be ti lo ti kiri na kodoro na ti gi kusala na mbeni ndo nde na da ti baba ti lo, si lo lingbi ti wara baba ti lo pepee. Me, mara ti pensé tongaso aga na bibe ti lo pepee. Lo ye ti kiri na da ti lo.

Biani, na ya toli so, baba ni aduti fa ti Baba ti e so ayeke na yayu, Jéhovah Nzapa, so ayeke na ndoyee na asala be-nzoni mingi. Peut-être mo baa nga so molenge so aglisa, wala molenge so aka mosoro ti lo, aduti fa ti akota wasiokpari. A-Farizien so Jésus asala tene na ala akasa lo kozoni teti lo te kobe na azo so. Me kozo molenge ni aduti fa ti zo wa?

Tongana awara molenge so aglisa

Na ya toli ti Jésus, na lege wa ayamba molenge so aglisa, ahiri lo nga molenge so aka mosoro ti lo, na ngoi so lo kiri na da ti baba ti lo? Zia e ma tene so Jésus atene:

“Me, tongana lo de na lege yongoro, baba ti lo abaa lo, lo ye ti sala be-nzoni na lo, lo kpe, lo mu lo, na lo hunu yanga ti lo.” Baba so asala be-nzoni na ayamba molenge ti lo na ngia aduti fa biani ti Baba ti e so ayeke na yayu, Jéhovah.

Peut-être baba so ama so molenge ti lo atambela kirikiri. Me, ahon ti hunda na lo ahundango tene mingi mingi, lo yamba lo nzoni. Jésus aduti na mara ti bibe tongaso nga, teti lo gue fade ti baa awasiokpari na azo ti kamata lapo so, na ya toli ni, molenge so aka mosoro ti lo aduti fa ti ala.

Biani, tongana lo baa le ti molenge ti lo so ayeke na vundu, baba so ayeke na ndara so Jésus asala tene ti lo na ya toli so ahinga molenge ti lo agbian be ti lo awe. Me, ndoyee so baba ti lo ayeke na ni amu maboko na molenge ni ti hinga siokpari ti lo. Jésus akiri atene: “Na molenge ni atene na lo: ‘Baba, mbi sala siokpari so ake yayu na ake mo. A lingbi mo hiri mbi molenge ti mo mbeni pepee, sala na mbi tongana oko ti awakua ti mo.’”

Tongana molenge ni asala tene tongaso awe, baba ni atene na angbaa ti lo: “I ga fade na mbeni bongo ti nzoni so ahon ambeni bongo kue, i yu lo na ni, i zia kati na maboko ti lo, na poro na gere ti lo. Na i ga na molenge ti bagara ti mafuta, i fa lo, zia e te kobe na e sala ngia, teti molenge ti mbi so akui awe, lo kiri na fini; lo glisa awe, na awara lo.” Na pekoni ala tonda “ti sala ngia”.

Na ngoi so, “kozo molenge” ti baba ni “ayeke na yaka”. A lingbi e ma fadeso nda ti toli ni, na e gi ti hinga zo so kozo molenge ni aduti fa ti lo. Jésus atene tongaso na ndo lo: “Na tongana lo ga ndulu na da, lo ma mozoko na dodo. Lo hiri mbeni wakua, na lo hunda lo na nda ti ye so. Wakua so atene na lo: ‘Ita ti mo akiri awe, na baba ti mo afa molenge ti bagara ti mafuta teti lo wara lo mbeni na nzo sava ti tele.’ Tongaso ngonzo agbu kozo molenge ni na lo ke ti li na ya da ni. Tongaso baba ti lo asigigi, na lo hunda lo mingi. Me lo kiri tene na baba ti lo: ‘Baa, mbi sala kusala ti mo ngu mingi, na mbi ke tene ti yanga ti mo la oko pepee, me mo mu na mbi même molenge ti ngasa la oko pepee, si mbi lingbi sala ngia na andeko ti mbi. Me tongana molenge ti mo so aga, lo so afuti ye ti mo awe na lege ti awali ti pitan, mo fa molenge ti bagara ti mafuta teti lo.’”

Zo nyen, lege-oko tongana kozo molenge ni, alondo ti ke abe-nzoni so asala teti awasiokpari? A yeke pepee amaître ti ndia na aFarizien? A yeke ala so azingo na Jésus teti so lo yamba na lege ti nzobe awasiokpari, ye so apusu lo ti mu toli so biani, tongaso kozo molenge ni aduti fa ti ala.

Jésus akonda ti tene ti lo na lege ti tene so baba ni atene na kozo molenge na nzobe: “Molenge, mo yeke na mbi lakue, na ye ti mbi kue ayeke ti mo. Me a yeke nzoni e sala ngia, e duti na ngia, teti ita ti mo ti koli so akui awe, lo kiri na fini; lo glisa awe, na a wara lo.”

Jésus afa na gigi pepee ye so kozo molenge asala na ndani. E hinga so na peko ti kui ti Jésus na londongo ti lo na du ti kua, ‘aprêtre mingi ama na be’, peut-être na popo ti ala, e lingbi wara ambeni zo so ama Jésus giriri na so ala yeke na ya bungbi ti “kozo molenge ni”.

Amolenge use so aduti fa ti zo wa na ngoi ti e? Ala lingbi ti duti gi fa ti azo so ahinga ye mingi na ndo ye so Jéhovah aleke na be ti lo ti sala na so awara lege ti duti na songo na lo. Kozo molenge ni aduti fa ti ambeni membre ti “kete kundu”, wala “kongrégation ti akozo molenge so iri ti ala ayeke na mbeti na yayu”. Achrétien so asala kusala lege-oko tongana kozo molenge ni. Ala yeke pepee na nzala ti yamba bungbi ti “ambeni ngasangbaga” so ayeke duti na ndo sese, teti ala bi be ti ala so peut-être angasangbaga ni alingbi ti kamata ndo ti ala.

Molenge so aka mosoro ti lo, lo duti fa ti ambeni zo so azia mara ti Nzapa ti sala ngia so sese aye ti mu na ala. Na pekoni, azo so agbian be ti ala, ala kiri na Nzapa na ala ga awakua ti Nzapa so asala kusala ti lo mbeni. Biani, Baba ni aduti na ndoyee na be-nzoni mingi na mbage ti azo so ahinga a lingbi ala wara pardon ti lo na ala kiri na lo! Luc 15:11-32; Lévitique 11:7, 8; Kusala 6:7; Luc 12:32; aHébreu 12:23; Jean 10:16.

▪ Jésus afa toli so na azo wa? Ngbanga ti nyen?

▪ Toli so asala tene mingi na ndo zo wa? Ye nyen asi na lo?

▪ Na ngoi ti Jésus baba ni na ngambe ni aduti fa ti azo wa?

▪ Na lege wa Jésus amu tapande ti baba so asala be-nzoni na ya toli ti lo?

▪ Kozo molenge ni abaa lege so ayamba ita ti lo tongana nyen? Na lege wa aFarizien asala kusala lege-oko tongana lo?

▪ Na ngoi ti e, ye nyen so asi alingbi na toli ti Jésus?