Chapitre 100

Parabole ti amine

JÉSUS angba peut-être ti duti na da ti Zachée, ndo so lo luti da na ngoi so lo yeke gue na Jérusalem. Adisciple ti lo ama na be so tongana ala si na Jérusalem, fade lo tene na gbele azo kue so lo yeke Messie na lo tonda ti komande na ya Royaume ti lo. Ti leke bibe so na ti fa so Royaume ayeke ndulu pepee, Jésus amu mbeni parabole.

Lo tene: “Mbeni zo so azo ayaa iri ti lo mingi ague na mbeni kodoro yongoro ti wara royaume teti lo mveni, na ti kiri.” “Zo so azo ayaa iri ti lo mingi” ayeke Jésus, na mbeni “kodoro yongoro” ayeke yayu. Fade Baba ti lo amu na lo ngangu ti komande na la ni so lo si ka.

Me kozoni si lo gue, zo so azo ayaa iri ti lo mingi ahiri angbaa bale oko, na lo mu na ala oko oko kue mine ti argent, lo tene: “I gi faïda na nginza so juska mbi kiri.” Na kozo ngoi so parabole ni aga taa tene, angbaa bale oko aduti fa ti akozo disciple ti Jésus. Na use ngoi so parabole ni aga taa tene, angbaa aduti fa ti azo kue so ayeke na beku ti ga ahéritier ti Royaume ti yayu lege-oko na Jésus.

Mine ti argent so ayeke nginza ti ngere ngangu, mine oko ayeke nginza so alingbi futa na zo ti fango yaka teti kua ti nze ota. Me mine so ayeke fa ti nyen? Mara ti faïda wa angbaa ni alingbi gi na nginza so?

Amine so ayeke fa ti ambeni ye so adisciple so asa yingo na ndo ti ala alingbi sala kusala na ni si wungo ti azo so ayeke ahéritier ti Royaume so ayeke na yayu alingbi gue na li ni juska Jésus asi tongana Gbia na ya Royaume ti zendo ni. Na peko ti londongo ti lo na du-kua na singo ti lo nga na adisciple ti lo, Jésus amu na ala mine ti parabole si ala lingbi sala ambeni disciple mingi si ala li nga na ya bungbi ti Royaume ti yayu.

Jésus akiri atene: “Me azo ti sese ti lo ake [koli so azo ayaa iri ti lo mingi], ala tokua awalembe na peko ti lo ala tene: ‘E ye zo so akomande e pepee.’ ” Azo ti sese ni ayeke aIsraélite, wala aJuif, me adisciple ti lo pepee. Na peko ti kiringo ti Jésus na yayu, tongana aJuif so asala ye ti ngangu na adisciple ti lo ala fa na gigi so ala ye pepee si Jésus aga gbia ti ala. A yeke na lege so si ala sala ye lege-oko tongana azo ti sese so atokua awalembe.

Angbaa bale oko so asala nyen na amine so amu na ala? Jésus atene: “Tongana lo wara royaume ni awe, lo kiri; na lo komande angbaa so lo kangbi nginza na ala ti ga na lo, si lo lingbi ti hinga faïda so ala wara. Kozo ngbaa ni aga na gbele lo, lo tene: ‘Seigneur, mine ti mo oko awara mbeni mine bale oko.’ Seigneur atene na lo: ‘Mo sala nzoni! Mo yeke ngbaa ti nzoni! Teti mo yeke be-taa-zo na ya ye kete kete, mbi mu na mo ti komande kodoro bale oko.’ Ngbaa use ni aga, lo tene: ‘Seigneur, mine ti mo oko awara mbeni mine oku.’ Seigneur atene na lo nga: ‘Mbi mu na mo ti komande kodoro oku nga.’ ”

Ngbaa so awara mine bale oko aduti fa ti mbeni bungbi ti adisciple, na abazengele ayeke na popo ti ala nga, so ayeke na fini atonda ni na la ti Pentecôte ti ngu 33 juska laso. Ngbaa so awara mine oku ayeke fa nga ti mbeni bungbi ti azo so asala kusala na ngoi oko so nga ti gi aye ti mosoro na ndo sese so teti gbia ti ala, na ala sala ye so alingbi na lege so azi na gbele ala na ngangu ti ala nga. Abungbi use ti azo so afa nzo tene na wa, na ye so asala si azo mingi so ayeke na nzoni be aga achrétien. Angbaa gumbaya agi faïda mingi na ala sala si mosoro so amu ni na ala awu.

Jésus akiri atene: “Mbeni ngbaa aga, lo tene: ‘Seigneur, mo baa, mine ti mo ayeke so. Mbi bata mine ti mo na ya mbeni bongo. Mbito ti mo asala mbi, teti mo yeke zo so akpengba mingi. Mo kamata ye so mo zia na sese pepee, na mo fa kobe na ndo so mo lu ye da pepee.’ Lo tene na lo: ‘Fade mbi fa ngbanga ti mo na lege ti tene ti yanga ti mo mveni, mo ngbaa ti sioni. Mo hinga mbi yeke zo so mbi kpengba mingi, na mbi kamata ye so mbi zia na sese pepee, na mbi fa kobe na ndo so mbi lu ye da pepee? Tongaso teti nyen mo zia nginza ti mbi na da ti bata nginza pepee? Si tongana mbi kiri, mbi lingbi wara nginza ti mbi na mbeni na ndoni.’ Lo tene na azo so aluti na tele ti lo: ‘I lungula mine oko so na ti ti lo, na i mu mine so na lo so ayeke na mine bale oko.’ ”

Lungulango mine ti parabole so aye ti tene teti ngbaa ti sioni so lo glisa mbeni ndo na ya Royaume ti yayu. Biani, lo glisa matabisi ti komande na ndo ye so ayeke tongana akodoro bale oko wala akodoro oku. A lingbi e dabe e so adiko ngbaa ni tongana zo ti sioni teti so lo sala siokpari pepee, me teti so lo sala kusala pepee ti sala si mosoro ti Royaume ti mveni ti lo awu.

Tongana alungula mine ti ngbaa so ayeke sioni ti mu na kozo ngbaa ni, mbeni zo ake atene: “Seigneur, lo yeke na mine bale oko!” Me Jésus akiri tene lo tene: “Azo kue so ayeke na ye, fade amu mbeni na ala; me zo so ayeke na ye pepee, fade akamata même ye so ayeke na lo. Me awato ti mbi so, ala so aye mbi ga gbia ti ala pepee, i ga na ala na ndo so, i fa ala na gbele mbi.” Luc 19:11-27; Matthieu 28:19, 20.

▪ Ye nyen apusu Jésus ti mu parabole ti amine?

▪ Zo so azo ayaa iri ti lo mingi ayeke zo nyen? Na kodoro so lo gue da ayeke na ndo wa?

▪ Angbaa so ayeke azo nyen? Amine so aduti fa ti nyen?

▪ Azo ti sese ni ayeke azo nyen? Na lege wa ala fa na gigi so ala ke lo?

▪ Ngbanga ti nyen adiko mbeni ngbaa so tongana zo ti sioni? Tongana alungula mine ti lo a ye ti tene nyen?