Chapitre 117

Kota vundu na yaka

TONGANA Jésus ahunzi ti sambela, lo na abazengele ti lo bale oko na ndoni oko so angba be-taa-zo ahe bia ti sepela na Jéhovah. Na pekoni ala zia da ti nduzu so ala duti da, ala sigigi na de ti bi, na ala hon na Popo-hoto ti Cédron ti gue na mbage ti Béthanie. Na lege, ala luti na ndo so azo aye tene ni mingi, yaka ti Gethsémané, so ayeke na ndo hoto ti Oliviers wala na tele ni. Fani mingi Jésus na abazengele ti lo abungbi tele na ndo so, na popo ti akeke ti olive.

Lo zia abazengele ti lo miombe​—wala na tele ti yanga ti yaka ni​—lo tene na ala: “I duti ge, mbi gue ti sambela ka.” Na pekoni lo mu na tele ti lo abazengele ota​—Pierre, Jacques na Jean​—na lo li na yaka ni. Vundu agbu Jésus na mawa asala lo mingi. Lo tene na ala: “Ame ti mbi ayeke na vundu mingi ahon, même ndulu na kui. I duti na ndo so, i lango pepee.”

Tongana lo gue yongoro kete, Jésus ati na sese, lo zuku le ti lo na sese na lo sambela na be ti lo kue: “Baba ti mbi, tongana lege ayeke, zia kopo so ague yongoro na mbi! Ye oko, mo sala tongana mbi ye pepee, me tongana so mo ye.” Lo ye ti tene nyen? Ngbanga ti nyen ‘vundu agbu lo, même ndulu na kui’? Lo ye ti ke ti kui na ti mu kota ngere?

Oko pepee! Jésus ahunda pepee ti kpe kui. Gi ti bi be ti lo ti tene lo kpe kui ti sadaka, tongana Pierre ahunda na lo mbeni la, aso be ti lo. Nde na so, vundu agbu lo teti so mara ti kua so lo yeke wara​—tongana mbeni wakengo ndia​—alingbi ti bi zonga na ndo iri ti Baba ti lo. Lo hinga fadeso, so gi na ya kete ngbonga senge, a yeke kanga lo na ndo keke tongana kota zo ti sioni—zo so azonga Nzapa! Baa ye so amu vundu na lo mingi.

Na peko ti yongoro sambela ti lo, Jésus akiri na lo wara abazengele ota so ayeke lango. Lo tene na Pierre: “I lingbi pepee ti bata ngbonga oko na mbi? I bata nzoni, na i zia ti sambela pepee, si i lingbi li na ya tara pepee.” Tongana lo bi be ti lo so ala wara aye ti tara mingi, nga so bi ayo mingi, lo kiri lo tene: “A yeke taa tene, yingo ayeke na wa, me mitele awoko.”

Jésus akiri ague ti fani use ni na lo hunda na Baba ti lo ti zi “kopo so”, so aduti mbage ti ye so Jéhovah amu na lo ti sala, ye so be ti lo aye na mbage ti lo. Tongana lo kiri, lo wara mbeni abazengele ota na lango ahon ti tene ala sambela ti li na tara pepee. Tongana Jésus asala tene na ala, ala hinga tene ti kiri na lo pepee.

Na ndani, ti fani ota ni, lo gue yongoro na ala kete, lo zuku likuni ti lo, na lo sambela Nzapa na kota kongo nga na ngule: “Baba, tongana mo ye, zi kopo so na tele ti mbi.” Vundu agbu Jésus mingi ngbanga ti zonga so ayeke ti na ndo iri ti Baba ti lo teti lo yeke kui ande tongana wakengo ndia. Tongana lo bi be ti lo so afa ngbanga ti wazonga na ndo ti lo​—zo so ahiri tene sioni na ndo Nzapa​—aso lo mingi!

Ye oko, Jésus angba ti sambela, lo tene: “Tongana so mbi ye pepee, me tongana mo ye.” So lo yeke wamango yanga, lo zia ye so be ti lo aye na gbe ti ye so Nzapa aye. Na ngoi ni so, mbeni ange ti yayu asi na lo na amu ngangu na lo na lege ti atene ti kpengba be. Ange ni atene na lo so Baba ti lo ayeda na lo.

Me, so taa kota kungba na ndo go ti Jésus! Fini ti lakue lakue ti lo na ti azo kue ayeke na ya ye so. Ye ni ayeke ngangu mingi. Tongaso, Jésus akiri asambela ngangu mingi ahon, na gbiki ti lo aga tongana ngu ti mene so ati na sese. Mbeni mbeti-sango ti awakaïngo kobela (Journal de l’Association des médecins américains), atene: “Ataa a yeke ye so asi fani mingi pepee, gbiki ti zo alingbi sigigi mene (...) tongana mbeni kota vundu agbu be.”

Na pekoni, Jésus akiri ti fani ota ni na tele ti abazengele ti lo, na lo kiri lo wara ala na lango. Ala nze na lege ti kota vundu. Jésus atene: “Na mara ti ngoi tongaso, ala lango na ala wo tele ti ala! A lingbi tongaso! Ngoi asi awe! Baa! A zia Molenge ti zo na ti ti awasiokpari. I londo. Ala ga e gue. Baa! Lo so ayeke ka mbi aga ndulu.”

Na ngoi so lo ngba ti sala tene, Judas Iscariote aga ndulu, na azo mingi amu peko ti lo, ambeni agbu keke, wa na aye ti bira. Matthieu 26:30, 36-47; 16:21-23; Marc 14:26, 32-43; Luc 22:39-47; Jean 18:1-3; aHébreu 5:7.

▪ Na pekoni so ala londo na da ti nduzu, Jésus ague na abazengele ti lo na ndo wa, na lo gue ti sala nyen ka?

▪ Na ngoi so Jésus ayeke sambela, abazengele ti lo asala nyen?

▪ Ngbanga ti nyen Jésus ayeke na kota vundu, na lo hunda nyen na Nzapa?

▪ So gbiki ti Jésus aga tongana mene aye ti tene nyen?