Adémon ayeke azo ti fango zo!
Satan na adémon ti lo angbâ lakue sioni mingi. Lani, Satan afâ anyama nga na azo ti kua ti Job, wakua ti Nzapa. Na pekoni, lo fâ amolenge ti Job bale-oko na lege so lo sara si “mbeni kota pupu” aga akungbi da so ala duti na yâ ni. Na pekoni, lo sara si “furoncle so ason mingi amû terê ti Job kue, a komanse na gbe ti gere ti lo juska na li ti lo.”—Job 1:7-19; 2:7.
Na ngoi ti Jésus, adémon asara lani si azo asara tënë ape nga ala bâ ndo ape (Matthieu 9:32, 33; 12:22). Ala sara pasi lani na mbeni koli na ala pusu lo ti mû atênë ti suru terê ti lo na akä (Marc 5:5). Ala sara nga pasi na mbeni maseka-koli na lege so ala sara si lo yeke dekongo, ala bi lo na sese nga lo yeke ‘gboto ngangu’.—Luc 9:42.
Giriri, adémon ayeke sara si terê ti zo ayeke son nga ala yeke sara si ambeni zo ayeke gboto
Laso, Satan na adémon asara sioni mingi na azo, me sioni ti ala ni akiri aga mingi na peko ti so a tomba ala na yayu. Aye so asi na yâ ti dunia afa so adémon ayeke sara asioni ye mingi. Ala yeke bi kobela na terê ti ambeni zo, ala sara ye ti ngangu na ambeni na bï, na lege so ala sara si azo ni alango gba nga ala bâ asioni bango-li, ti ambeni zo ni adémon ni alango na ala na ngangu, ti ambeni ala bi fou na li ti ala, ala pusu ala ti fâ zo wala ti fâ terê ti ala.
Laso adémon ayeke pusu ambeni zo ti sara ye na ngangu; ala yeke zia mbeto na yâ ti ambeni zo na bï, na lege so azo ni ayeke bâ asioni bango li
Lintina, mbeni wali ti kodro ti Surinam, atene so mbeni démon, wala mbeni sioni yingo afâ azo 16 na yâ ti sewa ti lo nga teti ngu 18 démon ni asara pasi mingi na lo. Na ndö ti ye so lo vivre ni, lo tene: “A nzere mingi na adémon ti sara pasi na zo so asara kpengba-li na ala, ti sara pasi na lo juska ala fâ lo.”
Me, Jéhovah ayeke na ngangu ti bata awakua ti lo si Satan asara ye na ala pëpe.—aProverbe 18:10.