Adémon atene mvene ti fa so azo so akui awe angbâ na fini

Bible atene so Satan ayeke “handa azo na ndö ti sese kue”. (Apocalypse 12:9). Satan na adémon ti lo aye ti tene e mä na bê na atënë ti Bible ape. Ala tara ti sara si azo amä na bê so azo so akui awe ayeke na fini na mbeni ndo ti ayingo. Zia e bâ tongana nyen la ala yeke handa azo.

Abungbi ti nzapa ti wataka

Abungbi ti nzapa mingi afa so tongana zo akui âme ti lo ayeke gue na ndo ti ayingo. Ala tene so terê ti zo ni la akui, me âme ti lo ape. Ala tene nga so âme apeut ti kui ape, a yeke ngbâ na fini lakue lakue.

Me a yeke ye so Bible afa la ape. Bible afa so âme ayeke zo, me pëpe mbeni ye so ayeke na yâ ti zo ni. Na tapande, ti fa crééngo Adam, Bible atene: “Jéhovah Nzapa asara zo na fuku ti sese. Lo wu na dû ti hôn ti lo pupu so ayeke sara si zo ni aduti na fini; na pekoni zo ni aga [âme] so ayeke na fini.” (Genèse 2:7, kete tënë na gbe ni). Tongaso, a mû pëpe na Adam mbeni âme; lo yeke âme.

Anyama, asusu na andeke nga kue ayeke a-âme.​—Genèse 1:20, 21, 24, 30.

Ndali ti so Bible atene “âme” ayeke zo ni wani, li ti e adoit ti kpe ape ti mä so âme ayeke kui. Mbeti ti Nzapa atene:

• “Âme so asara siokpari: a yeke lo la lo yeke kui.”​—Ézéchiel 18:4.

• “[Samson a]dekongo, lo tene: ‘Zia mbi [wala “âme ti mbi”] na aPhilistin kue e kui.’”​—aJuge 16:30, kete tënë na gbe ni.

• “Na lâ ti Sabbat, ndia amû lege na zo ti sara ye ti nzoni wala ti sara ye ti sioni na zo? ti sö [âme] wala ti fâ [âme]?”​—Marc 3:4, kete tënë na gbe ni.

Ambeni versê ti Bible afa so a peut ti futi âme (Genèse 17:14), a peut ti fâ âme na épée (Josué 10:37), mbeni ye apeut ti gbu go ti lo si lo kui (Job 7:15) nga âme apeut ti kui na yâ ti ngu (Jonas 2:5). Tongaso, âme ayeke kui.

Tongana mo diko Bible na Genèse ti si na Apocalypse, mo yeke wara ape mbeni tënë so a tene “âme ayeke kui ape”. Âme ayeke yingo ape. Tënë so a tene âme ayeke kui ape so ayeke fango ye ti Bible ape. Satan na asioni yingo ti lo la afa ni. Jéhovah ake abungbi ti nzapa kue so ayeke fa atënë ti mvene na azo.​—aProverbe 6:16-19; 1 Timothée 4:1, 2.

Azo ti sarango tënë na yingo ti akuâ

Mbeni lege so Satan ayeke handa na azo ayeke na lege ti azo ti sarango tënë na yingo ti akuâ. Zo ti sarango tënë na yingo ti akuâ ayeke mbeni zo so adémon ayeke sara tënë na lo. Mingi ti azo, même azo ti sarango tënë na yingo ti akuâ ni, amä na bê so azo so akui awe la ayeke sara atënë ni so. Me, tongana ti so e bâ fade na yâ ti Bible, a yeke vrai ape.​—Zo-ti-fa-tene 9:5, 6, 10.

Tongaso, atënë ni so alondo na azo wa? Alondo na ambeni zo nde ape, gï na adémon. Asioni yingo apeut ti bâ sarango ye ti mbeni zo na ngoi so zo ni angbâ na fini; ala hinga fason lo yeke sara lani na tënë, lo yeke tongana nyen, lo sara kua ti nyen nga nyen la lo hinga. Tongaso, a yeke ngangu na ala ape ti haka azo so akui awe.​—1 Samuel 28:3-19.

Ambaï ti mvene

Mbeni ye so Satan ayeke sara kua na ni ti tene azo ayeda na mvene so andu tënë ti azo so akui awe, ayeke ambaï ti mvene. Mingi ni, ambaï ni so asara si azo amä na bê na Bible ape.​—2 Timothée 4:4.

Na Afrique a yeke wara gbâ ti ambaï so atene azo abâ ambeni zo so akui awe na fini na peko ti kuâ ti ala. Mingi ni, azo ni ayeke bâ azo ni so na mbeni ndo nde na ndo so zo ni avivre dä lani. Me, hunda terê ti mo na atënë so: ‘Tongana mbeni zo apeut ti kiri na fini na peko ti kuâ ti lo, eskê a yeke na lege ni ti tene lo kiri na fini na mbeni ndo so ayo na afami nga na akamarade ti lo?’

Nga, zo so ala bâ lo so, peut-être lo kpa zo ni so akui so kpango. Na tapande, aTémoin ti Jéhovah use ayeke fa tënë na yâ ti mbeni kete kodro, na ala bâ mbeni mbakoro-koli so ayeke mû peko ti ala aninga. Ala hunda lo ngbanga ti nyen la lo mû peko ti ala? Lo tene na ala so lo pensé so oko ti aita ni ayeke ita ti lo ti koli so akui asara angu mingi awe so la. Biani, lê ti lo la ahanda lo, me so kue lo ke ti yeda. Ni la, imaginé tënë so mbakoro-koli so ayeke tene ande na akamarade ti lo nga na avoisin ti lo ma!

Avision, abango li nga na ago so zo amä

Peut-être mo mä awe atënë ti ambeni zo so atene ala bâ ambeni ye so ahon gbungo li ala, wala amä ambeni go wala abâ ambeni vision ti aye so ahon gbungo li ala. Azo so abâ mara ti ye tongaso asara mbeto mingi. Marein, so ayeke na Ouest ti Afrique, ayeke mä lakue na bï, go ti âta ti lo ti wali so akui awe ayeke iri lo. Mbeto agbu Marein lo dekongo lo zingo azo ti da ti lo kue. Na nda ni terê ti lo ason.

Ni la, tongana azo so kui angbâ ti vivre, eskê a yeke na lege ni ti tene ala zia mbeto na yâ ti azo so ala ye ala? Ên-ën. Asioni tënë so alondo na adémon.

Ka ti atënë so na bango ni akpa atënë so apeut ti aidé zo wala ti dë bê ti zo? Na tapande, na Sierra Leone, terê ti Gbassay ason. Lo bâ li ti lo na babâ ti lo so akui awe. Lo fa na lo ti gue na gbe ti mbeni keke, ti fâ kugbe ni, ti sara na yâ ti ngu, ti nyon. Me kozo ti tene lo sara ni, lo doit ti sara tënë ni na zo ape. Lo sara ye alingbi na ni na terê ti lo akaï.

Mbeni wali so koli ti lo akui awe, atene so mbeni lâ na bï koli ni asi na lo. Lo tene so koli ni ayeke pendere nga lo yü apendere bongo.

Atënë ni nga na avision ni so akpa nzoni ye na apeut ti aidé zo. Me eskê alondo na Nzapa? Ên-ën. Jéhovah ayeke “Nzapa ti tâ tënë”. (Psaume 31:5). Lo yeke yeda ti handa e lâ oko ape. Gï adémon la apeut ti sara ye tongaso.

Me eskê anzoni démon ayeke dä? Ên-ën. Atâa so na ambeni ngoi, azo apeut ti bâ so adémon a-aidé ala, ala kue ayeke sioni. Na ngoi so Zabolo asara tënë na Ève, lo sara tënë na Ève mo bâ mo tene kamarade ti lo (Genèse 3:1). Me nyen la asi na peko ti so lo mä lo na lo sara ye so lo hunda? Ève akui lani.

Mingi ni mbeni sioni zo ayeke sara ye nzoni na mbage ti mbeni zo, na pekoni lo handa zo ni. Mbeni proverbe na Afrique atene: “Pembe avuru, bê avuko.” Na Bible atene: “Satan wani ayeke sara terê ti lo lakue tongana mbeni ange ti lumière.”​—2 aCorinthien 11:14.

Nzapa ayeke sara tënë encore na azo ape na lege ti abango li, avision wala ti sara si azo amä ago so alondo na ndo ti ayingo. Lo yeke fa lege na azo nga lo yeke fa ye na ala na lege ti Bible so alingbi ti sara si zo ‘awara aye kue so lo yeke na bezoin ni ti sara na nzoni kusala kue.’​—2 Timothée 3:17.

Ni la, tongana Jéhovah atene na e ti sara hange na aye so Zabolo ayeke sara kua na ni ti handa e, a yeke ngbanga ti so lo ye e. Lo hinga so adémon ayeke awato ti e na ala yeke sioni mingi.