Mbage 4
Nzapa afa na e ye so lo leke na be ti lo ti sala
1, 2. E hinga tongana nyen so Nzapa amu akiringo tene na ala so ayeke hunda tele ti ala na be ti ala biani?
BIANI mbeni Nzapa so asi na ndoyee ayeke fa ye na ndo aye so lo leke na be ti lo ti sala na ala so agi lo na be biani. Lo kiri tene na azo so ahunda tele ti ala ngbanga ti nyen lo zia lege na ye ti vundu.
2 Mbeti ti Nzapa atene: “Tongana mo gi [Nzapa], fade lo zia lege na mo ti wara lo.” “Na yayu Nzapa oko ayeke so afa tene ti lingo na gigi.” “Biani Gbia Seigneur Jéhovah asala ye oko pepee tongana lo fa tene ti lingo ti be ti lo na awakua ti lo aprophète kozoni pepee.” — 1 aChronique 28:9; Daniel 2:28; Amos 3:7.
Akiringo tene ni ayeke na ndo wa?
3. E wara na ndo wa ye so asala si Nzapa azia lege na sana?
3 Akiringo tene na ahundango tene tongana ti so andu ndani so Nzapa azia lege na vundu ti si nga na lege so lo ga ti leke ni ayeke na ya mbaï so lo mu ni teti nzoni ti e. Mbaï so ayeke Tene ti lo, Bible so ayeke Nzoni Kue. “Ambeti kue ti Bible alondo na yanga ti Nzapa, na a yeke nzoni ti fa nda ti ye, ti zingo na azo, ti leke ye na lege ni na ti fa na azo lege ti mbilimbili si zo ti Nzapa alingbi kue, na lo wara ye kue alingbi na nzoni kusala kue.” — 2 Timothée 3:16, 17.
4, 5. Aye wa asala si Mbeti ti Nzapa ayeke mbeni buku so ayeke nde mingi?
4 Mbeti ti Nzapa ayeke biani mbeni buku so ayeke ti lo nde mingi. Na ya ni, lo yeke na taa mbaï ti zo, lo si na ngoi ti lekengo azo na lo ndu nga ngoi so aga kozoni na lekengo azo. Atene ti lo andu nga aye ti fadeso, teti aprophétie ti lo andu aye so ayeke si na ngoi ti e nga na ye so ayeke si na ya ngoi kete so ayeke ga.
5 Mbeni buku oko ayeke pepee so tene ti lo ayeke taa tene na lege ti mbaï na so gunda ni aluti mbilimbili. Na tapande, e yeke gi na akugbe-mbeti kete ti awasalango mbeti ti Giriri. Nde na so, e yeke na akugbe-mbeti ndulu na saki omene ti mbage ti Mbeti ti Nzapa so asala na yanga ti hébreu (abuku bale ota na gumbaya ti “Ngbele Testament”), kue wala mbage ni, na ndulu na akugbe-mbeti saki bale oko na ndoni saki ota ti mbage ti Mbeti ti Nzapa so achrétien asala na yanga ti grec (abuku bale use na ndoni mbasambala ti “Fini Testament”).
6. Ngbanga ti nyen e lingbi ti tene biani so Mbeti ti Nzapa ti laso ayeke mbilimbili lege-oko na kozo tene so alondo na Nzapa?
6 Nzapa ti Ngangu Ahon Kue, so apusu azo ti sala Bible, abata si atene ti lo kue angba na ya akugbe-mbeti so. Tongaso, aBible ti e ti laso ayeke lege-oko na ambeti ti Nzapa so asala ni kozoni. Mbeni ye so asala si e duti na taa beku na ndo tene so ayeke so asala ambeni kugbe-mbeti ti mbage ti Mbeti ti Nzapa so achrétien asala na yanga ti grec gi ndulu na ngu ngbangbo oko na peko ti so awasalango ni asu ni na maboko ti ala mveni. A sala akete wungo ti akugbe-mbeti ti abuku ti asenge wasungo mbeti ti giriri so asi na e ngu ngbangbo mingi na peko ti so wasungo ni asala ala.
Matabisi ti Nzapa
7. Wungo ti Mbeti ti Nzapa so akangbi ni ayeke oke?
7 Mbeti ti Nzapa ayeke buku so akangbi ni mingi ahon na ya Mbaï. Apete na mbeti ndulu na ngbundangbu ota. Mbeni buku nde aga ndulu na wungo so pepee. Na mbage, asala Mbeti ti Nzapa, kue wala mbage ni, na ya ayanga ahon saki oko na ndoni ngbangbo gumbaya. Tongaso, abaa so azo bale gumbaya na ndoni miombe na ndo ti azo ngbangbo oko na ndo le sese awara mbeti so.
8-10. Fa ambeni ye so asala si a yeke nzoni ti manda Mbeti ti Nzapa.
8 Mbeni buku so atene lo londo na Nzapa na so afa na alege nde nde so lo tene taa tene alingbi biani ti tene e manda loa. Mbeti ti Nzapa afa nda ti fini, nda ti aye ti sese nga na ye so ayeke ku e. Mbeni buku oko alingbi ti sala tongaso pepee.
9 Taa tene, Mbeti ti Nzapa ayeke tokua so Nzapa amu na asewa ti azo. Lo fa lege si asu ni na lege ti ngangu ti kusala ti lo, yingo ti lo, na azo bale osio azia ni na mbeti. Tongaso, Nzapa asala tene na e na lege ti Tene ti lo, Bible ti Nzoni Kue. Bazengele Paul asu na mbeti: “Tongana i kamata tene ti Nzapa so e mu na i, i kamata tene ni tongana tene ti azo pepee, me, tongana tene ti Nzapa, na a yeke so biani.” — 1 aThessalonicien 2:13.
10 Abraham Lincoln, gbia ti fani bale oko na omene ni ti Amerika, asala giriri tene ti Mbeti ti Nzapa tongana “matabisi ti ngele ngangu mingi so Nzapa amu na zo (...). Tongana lo yeke da pepee, e lingbi pepee ti hinga nzoni na sioni.” Tongaso, zia e baa, na lege ti matabisi so alingbi ti haka ni pepee, tongana nyen vundu abaa gigi, ngbanga ti nyen Nzapa azia lege na ni, nga na ye so lo yeke sala ande ti leke ni.
[Kete tene na gbe ni]
a Fade mo wara ambeni tene mingi na ndo taa tene ti Mbeti ti Nzapa na ya buku La Bible: Parole de Dieu ou des hommes? so Watchtower Bible and Tract Society of New York, Inc., asala ni.
[Foto na lembeti 10]
Bible, so alondo na Nzapa, ayeke tokua so lo to na sewa ti azo.