Tâ Tene na ndo Âme Ayeke Kota Ye
“Fade i hinga tâ tene, na fade tâ tene azi i.”—JEAN 8:32, NW.
1. Ngbanga ti nyen a yeke kota ye ti ba atene ti mabe ti e na ndo âme nga na ndo kuâ?
YE SO mbeni zo ayeke mä na bê na ni na ndo kui nga na ndo ye so asi na peko ti kuâ aga mingi na lege ti aye so lo manda na yâ vorongo ti lo nga na yâ dutingo ti lo. Tongana ti so e ba, atene ti mabe ni alondo na yengo na bê kue so âme ayeke si na kota nda ni ti lo gi na peko ti akiringo fani mingi na fini, ti si na tene so atene, gi fini oko si ayeke fa ye so ayeke si ande na zo ni na nda ni. Tongaso, mbeni zo ayeke mä ande na bê ti sala beoko na kota ye ti nda ni na la ti kuâ ti lo, mbeni ti si na Nirvana, na mbeni nde ti wara matabisi ti yayu. Na yâ ti ye so kue, tâ tene ayeke so wa? Teti so atene ti mabe ti e asala ye na ndo bango ndo ti e, akusala ti e, na alege so e yeke mu, a lingbi pepe e gi kiringo tene na hundango tene so?
2, 3. (a) Ngbanga ti nyen e lingbi ti zia bê na ye so Bible atene na ndo âme? (b) Na lege ti Bible, tâ tene na ndo ti âme ayeke so wa?
2 Buku so ayeke ngbele ni ahon atanga ni kue na sese, Bible, afa mbaï ti zo juska na lekengo kozo âme. Afango ye ti lo abuba pepe na lege ti atene ti ndara na apande ti azo. Bible afa polele tâ tene na ndo âme: Âme ti mo ayeke mo, akinda ayeke na fini oko pepe, na fade a yeke kiri na fini ala so ayeke na yâ mongoli ti Nzapa na ngoi so lo diko. Nene ti hingango ye so ayeke tongana nyen teti mo?
3 Jésus Christ atene na adisciple ti lo giriri: “Fade i hinga tâ tene, na fade tâ tene azi i.” (Jean 8:32, NW ) Biani, tâ tene ayeke zi zo. Me tâ tene na ndo âme ayeke zi mo na yâ ti aye wa?
Azi Zo na yâ Mbito nga na Kota Vundu
4, 5. (a) Mbito wa tâ tene na ndo âme ayeke tomba ni? (b) Ngangu wa beku ti londongo ti awakinda amu ni na mbeni pendere so kobela ti kuâ agbu lo?
4 Kota bakari (The World Book Encyclopedia) atene: “Mingi ti azo asala mbito ti kuâ na akpe ti bi bê na ndo ala.” Mbeni wasungo tene ti mbaï atene: “Na Poto, gi tene ti ‘kuâ’ lo mveni aga ye so zo ayeke di ni pepe.” Na yâ ti ambeni mara ayeke mu atene tongana “guengo ni“ wala “aglisa” ti sala na tene ti kuâ ti mbeni zo. Mbito ti kuâ so ayeke biani mbito ti ye so zo ahinga pepe, teti so ti mingi ti azo kuâ ayeke mbeni ye ti ndima. Na hingango tâ tene na ndo ye so asi tongana e kui, mbito so ayeke yapu.
5 Zia e ba na tapande, bibe ti Michèle so ayeke na ngu 15. Lo yeke giriri na kobela ti mene na lo yeke na gbele mbeni kuâ ti ngangu. Mama ti lo, Paula, adabe lo: “Michèle atene giriri so ti kui asala ye oko na lo pepe teti so lo hinga so kuâ ayeke gi teti kete ngoi. E yeke sala la ni tene mingi na ndo fini sese ti Nzapa na ti ala kue so ayeke zingo ande ala na ndo ni. Michèle ayeke giriri na kota mabe mingi na Jéhovah Nzapa nga na londongo na popo ti akinda, lo yeke na kite oko pepe.” Beku ti londongo ti awakinda azi kpengba molenge-wali so na yâ mbito ti kuâ so ayeke kanga lege na zo.
6, 7. Tâ tene na ndo âme azi e na yâ kota vundu wa? Mu tapande.
6 Ye nyen tâ tene asala na ndo ababâ na mama ti Michèle? Gérard, babâ ti lo, atene: “Kuâ ti kete molenge-wali ti e aduti ye ti vundu mingi so ade asi na e la oko pepe. Me e mä na bê biani na zendo ti londongo ti awakinda so Jéhovah amu, na e yeke ku na dongo bê la ni so e yeke kamata ande mbeni na yâ maboko ti e Michèle ti e so e ndoye lo mingi. A yeke duti ande tâ ngangu tingbingo tele!”
7 Biani, tâ tene na ndo âme azi zo na yâ kota vundu so kuâ ti mbeni zo so e ndoye lo mingi ayeke ga na ni. Tâ tene, ye oko pepe alingbi ti lungula biaku vundu na kota mawa so zo ayeke wara tongana mbeni zo so lo ndoye lo akui. Ye oko, beku ti londongo ti awakinda adë kota vundu ni na a mu maboko mingi ti kanga bê.
8, 9. Tâ tene na ndo ye so asi na akuâ azi e na yâ mbito wa?
8 Tâ tene ti Bible na ndo ye so ayeke si na akuâ ayeke zi nga e na gbe ti mbito ti akuâ. Ngbele ye so ala manda tâ tene so, azo mingi so kozoni aduti angba ti salango ye ti akotara so andu tene ti akuâ ayeke bi bê ti ala mbeni pepe na atene ti dengo ba, aye so afa atene ayeke si, awaraga wala ayorö, na ala mu mbeni pepe sadaka ti ngele ngangu ti dë na bê ti akotara ti ala na ti kanga lege na ala ti kiri ti sala sana na ala so angbâ na fini. Biani, teti so akinda “ahinga ye oko pepe,” asalango ye tongaso ayeke senge senge.—Zo-ti-fa-tene 9:5.
9 Tâ tene na ndo âme, so ayeke na yâ ti Bible, azi biani zo, a lingbi ti zia bê na ni. Me ba nga mbeni beku so ayeke nde so Bible azia na gbele mo.
[Akete tene na lembeti 29]
Tâ tene na ndo âme azi mo na yâ mbito ti kui, mbito ti akuâ, ti kota vundu so kuâ ti mbeni zo so mo ndoye lo aga na ni