Totongo ti go so alingbi

TONGANA mbeni wamungo diskur asala tënë na mbeni go so alingbi pëpe, ambeni zo so ayeke mä lo alingbi ti to nda ni ti lango na nduzu. Tongana mbeni wafango tënë asala tënë na kete go mingi na fango tënë, lo lingbi pëpe ti sala si zo so lo yeke fa tënë na lo angbâ ti mä lo. Tongana, na ngoi ti abungbi, akiringo tënë ti azo atoto alingbi na ni pëpe, aita ayeke wara pëpe ngangu so a lingbi ala wara fade (aHéb. 10:24, 25). Na mbeni mbage nde, tongana wamungo diskur ni akono go ti lo na mbeni mbilimbili ngoi pëpe, a lingbi ti sala azo ni nzoni pëpe na a lingbi même ti so bê ti ala.​—aProv. 27:14.

Gi ti hinga azo so ayeke mä mo. Mo yeke sala tënë na zo wa? na zo oko? na mbeni sewa? na mbeni kete bungbi ti azo so ayeke leke tele ti gue na fango tënë? na kongregation ni kue? wala na mbeni kota bungbi? A yeke polele so mbeni totongo ti go so alingbi na mbeni ngoi ayeke lingbi pëpe na mbeni ngoi nde.

Awakua ti Nzapa asala tënë na gbâ ti azo na yâ aye nde nde. Na ndembe ti zingo yanga ti temple na Jérusalem na ngoi ti Salomon, masini ti kono totongo ti go ti zo ayeke lani dä pëpe. Tongaso, Salomon aluti na ndo mbeni estrade so ayeke na nduzu na lo hiri deba nzoni na ndo azo ni “na yanga ngangu” wala na kota go (1 aGbia 8:55; 2 Chron. 6:13). Angu mingi mingi na pekoni, tongana a sa yingo vulu awe na Pentecôte ti ngu 33, gbâ ti azo (ambeni asala nzara ti tënë ni, ambeni ayeke he gi ndo) abungbi na tele ti kete bungbi ti aChrétien na Jérusalem. Na fango na gigi tâ ndara, Pierre “aluti . . . na lo tene [tënë] na azo ni na kongo”. (Kus. 2:14). Na tongaso, a fa kpengba tënë ti témoin na azo ni.

Mo lingbi ti hinga tongana nyen so totongo ti go ti mo alingbi na ngoi ni? Salango ye ti azo so ayeke mä mo ayeke ye so ayeke nzoni ahon atanga ni kue ti fa ni na mo. Tongana mo bâ so ambeni zo ni ayeke yôro mê ti ala yorongo ti mä mo, a lingbi mo sala kue ti leke totongo ti go ti mo.

Atâa mo yeke sala tënë na zo oko wala na mbeni bungbi ti azo, a yeke lege ti ndara ti hinga azo wa la ayeke mä mo. Tongana mbeni zo ayeke mä ndo nzoni pëpe, a lingbi peut-être mo tene tënë na kota go. Me ti dekongo ayeke sala ande pëpe si mo nzere na bê ti azo so ane peut-être na yâ ti salango ye ti ala, ndali ti so ala yeke mbakoro. A lingbi même ti bâ ni tongana salango ye na ngangu. Na yâ ti ambeni kodoro, tongana zo asala tënë na kota go mingi, azo ayeke bâ ni tongana salango ngonzo wala kangango bê gbä.

Bâ totongo ti aye so ayeke gboto lê. Tongana mo yeke na fango tënë, aye so asi ayeke sala biani ngangu na ndo totongo ti go ti mo so a lingbi mo fa na tënë. A lingbi peut-être mo sala tënë na ngoi so akutukutu ayeke hon, amolenge wala ambo ayeke dekongo, mozoko wala télévizion ayeke toto. Na mbeni mbage nde, na ando so ada ayeke ndulu na tele ti mba mingi, kamene alingbi ti sala zo so mo yeke sala lisoro na lo tongana mo sala tënë na nduzu mingi si a gboto lê ti azo so ayeke ndulu na lo.

A lingbi aita-koli so ayeke mû diskur na kongregation wala na akota bungbi aluti nga na gbele ti aye nde nde. Salango tënë na azo na gigi ayeke nde mingi na mungo diskur na yâ ti da so zo ayeke mä ndo nzoni mingi dä. Na Amerika ti Mbongo, amissionnaire use ayeke mû mbeni diskur na yâ ti da ti mbeni zo so asala nzara ti tâ tënë. Na ngoi so ala yeke mû diskur ni na mbage ti da ni so li ni ayeke senge, a yeke mä totongo ti mbeni matanga so azo ayeke sala a yo na ndo ni pëpe, nga mbeni koli-kondo so ayeke ndulu na ala ayeke dë gi kongo!

Na ngoi so mbeni diskur angbâ ti gue na li ni, mbeni ye alingbi ti si so a yeke hunda ti luti kete juska totongo ti ye akaï, wala a yeke hunda ti kono totongo ti go. Na tapande, tongana a yeke sala bungbi na yâ ti mbeni da ti tôle, ngu-nzapa so alondo ti pika alingbi ti sala si lege ayeke dä pëpe ti tene azo ni amä zo so ayeke sala tënë ni. Mbeni molenge so ayeke toto wala azo so aga na pekoni so bungbi ato nda ni awe alingbi ti duti ande biani mbeni kpale. Manda ti hon ndo ti totongo ti aye so agboto lê si azo so ayeke mä mo alingbi ti wara ye ti nzoni kue na lege ti asango so mo yeke fa na ala.

Aye so ayeke kono totongo ti go, tongana a yeke dä, alingbi ti mû maboko. Me so aye ti tene pëpe so a hunda pëpe na mbeni zo so ayeke sala devoir ti kono totongo ti go ti lo tongana aye so asi ahunda ti sala tongaso. Na aplace so a yeke fâ wâ dä mingi, a lingbi zo so ayeke sala devoir ni azia micro yamba, na lo ngbâ ti mû diskur ti lo.

Bâ ye so a yeke sala tënë na ndo ni. Ye so ayeke na yâ ti diskur wala devoir ti mo alingbi ti sala ngangu na ndo totongo ti go ti mo. Tongana tënë ni ahunda ngangu, woko fango ye ti mo pëpe na salango tënë na kete go mingi. Na tapande, tongana mo yeke diko afango ngbanga na li ti azo na yâ ti Bible, a lingbi go ti mo atoto ngangu ahon ti so mo yeke diko mbeni wango na ndo fango na gigi ndoye. Zia go ti mo atoto alingbi na tënë ti devoir ti mo, me sala hange ti sala ni pëpe na mbeni lege so agboto lê na ndo mo.

Bâ ye so mo zia na gbele mo ti si dä. Tongana mo ye ti pusu azo ni ti duti na wâ na yâ kusala, zia go ti mo atoto ngangu. Tongana mo ye ti gbian bango ndo ti ala, tomba ala pëpe na salango tënë na kota go mingi. Tongana mo yeke sala kue ti dë bê ti zo, mingi ni go so atoto yeke ayeke nzoni mingi.

Konongo totongo ti go so aga na nzoni ye. Tongana mo yeke gi ti gboto lê ti mbeni zo so ayeke na kua mingi ti sala, mingi ni, tongana mo kono totongo ti go ti mo, ye so ayeke mû maboko. Ababâ na mama ahinga ye so nzoni, na tongaso ala yeke yä go ti ala na nduzu ti hiri amolenge ti ala tongana ngoi alingbi awe ti tene ala zia ngia ti kiri. Zo so ayeke mû li ni na mbeni bungbi wala kota bungbi alingbi ti kono totongo ti go ti lo ti tene azo ni aduti kpô. Na ngoi so awafango tënë ayeke fa tënë, ala lingbi ti bala ndo na kota go tongana ala yeke ga ndulu na azo so ayeke sala kua na gigi.

Même tongana mo gboto lê ti zo ni awe, a yeke kota ye ti ngbâ ti sala tënë na go so atoto alingbi na ni. Tongana mbeni zo so ayeke sala tënë atene tënë na kete go, azo alingbi ti bâ so lo leke tele ti lo nzoni pëpe wala lo hinga biani pëpe tënë so lo yeke tene.

Tongana a gue oko na mbeni komandema, go so zo ayä ni na nduzu alingbi ti pusu azo ti sala ye (Kus. 14:9, 10). Legeoko nga, komandema so a mû na kota go alingbi ti kanga lege na kpale. Na kodoro ti Philippes, mbeni zo ti batango azo ti kanga aye lani ti fâ tele ti lo ndali ti so lo bâ ti lo so azo ti kanga ni akpe awe. “Paul atene na kongo, Mo sala tele ti mo sioni pëpe, teti e kue ayeke na ndo so.” Na lege so, a kanga lege na mbeni zo ti fâ tele ti lo. Na pekoni, Paul na Silas afa tënë na zo ti batango azo ti kanga ni nga na azo ti da ti lo, na ala kue ayeda na tâ tënë.​—Kus. 16:27-33.

Lege ti kono totongo ti go ti mo ahon ti kozo. Ti ambeni zo, a lingbi ala sala ngangu ahon ambeni ti manda tongana nyen ti sala kusala na totongo ti go so alingbi. Go ti mbeni zo alingbi ti toto alingbi na ni pëpe ngbanga ti so go ti lo ayeke kete. Ye oko, tongana lo sala ngangu, lege ayeke dä ti tene lo maï, atâa so lo lingbi ti duti lakue na kete go. Bâ nzoni hungo pupu ti mo na lutingo ti mo. Manda ti duti na ti luti na bango ni pëpe. Yô kate ti mo na nduzu, na hu pupu ngangu. Sala kue ti zia si pupu alï na yâ fufu ti mo ti gbe ni. A yeke pupu so, so mo sala kusala na ni nzoni, si ayeke sala si mo lingbi ti fa lege na totongo ti go ti mo tongana mo yeke sala tënë.

Ti ambeni zo nde, kpale ti ala ayeke so ala yeke sala tënë na nduzu mingi. Peut-être ala wara kode so na lege ti so ala yeke sala kusala na gigi wala na mbeni ndo so aye ayeke toto ngangu dä. Nga, ala lingbi ti londo na ndo so zo oko oko kue ayeke dekongo na ayeke fâ tënë na yanga ti mba mingi. Ye so asala si ala bâ ti ala so oko lege ti bi tele na yâ ti lisoro ayeke ti sala tënë na kota go ahon tanga ti azo kue. Na ngoi so yeke yeke ala yeke bata wango ti Bible ti yü “be-ti-ndoye, nzobe, be-kota-pepe, tâ be-ti-molenge, be-nze-pepe,” ala yeke gbian ande totongo ti go ti ala tongana ala yeke sala lisoro na azo.​—aCol. 3:12.

Nzoni lekengo tele, salango kusala na kode so mo wara na fango tënë lakue nga sambelango Jéhovah ayeke mû ande maboko na mo ti sala tënë na mbeni go so alingbi. Atâa mo yeke sala tënë na ndo ti estrade wala na mbeni zo na fango tënë, sala kue ti gbu li na ndo lege so zo ni alingbi ti wara mungo maboko na mango ye so mo yeke tene.​—aProv. 18:21.