Tâ salango ye ti mo mveni

SALANGO tënë ti mo, tongana ti so mo yeke sala ka, ayeke mû maboko na mo ti tene azo ni azia bê ti ala na tënë ti mo. Mo yeke zia bê ti mo na tënë ti mbeni zo so ahonde lê ti lo na mbeni ye na ngoi so lo yeke sala tënë na mo? Ziango bê ti mo na lo ni ayeke kiri ti kono tongana ye so lo honde na lê ti lo ayeke pendere ahon lo mveni? Oko pëpe. Ni la, ahon ti handa lê ti azo, sala ye tongana mo mveni.

A lingbi a bâ pëpe tâ salango ye ti zo mveni tongana salango ye gi tongaso. Salango tënë so alingbi pëpe na ndia ti yanga ti kodoro ni, atënë so a diko pekoni na lege ni pëpe wala asigigi nzoni pëpe ayeke na lege ni pëpe. A lingbi e kpe salango tënë ti agodobe. E ye ti sala ye lakue na nengo tele na yâ ti salango tënë ti e nga na yâ ti salango ye ti e. Zo so ayeke na mara ti tâ salango ye ti lo tongaso ayeke sala ye tâ na lege ni ahon ndo ni pëpe wala lo yeke gi bê ti lo ahon ndo ni pëpe ti pika bê ti azo.

Na fango tënë. Tongana mo yeke ga ndulu na mbeni da wala na mbeni zo na ndo so azo ayeke dä mingi ti fa tënë, mo yeke gi bê ti mo? Mingi ti e ayeke sala tongaso. Me ti ambeni, gingo bê ti ala ahon ti amba ti ala. Gingo bê alingbi ti sala si go ti mo atoto nde wala ayeke dö dongo. A lingbi ti sigigi polele na yâ salango maboko wala li ti mo kirikiri.

Mbeni wafango tënë alingbi ti wara kpale so ndali ti aye mingi. Peut-être li ti lo ayeke na ndo tongana nyen azo ni ayeke bâ lo ande, wala lo yeke hunda tele ti lo wala fango tënë ti lo ni ayeke lë lengo ande. Aye so kue ayeke si ka mingi, me akpale ayeke londo tongana zo azia bê ti lo mingi na ndo mara ti aye tongaso. Tongana kozoni ti fa tënë bê ti mo ayeke gi mo mingi, nyen la alingbi ti mû maboko na mo? A yeke lekengo tele nzoni nga sambela so mo tene na bê kue na Jéhovah (Kus. 4:29). Gbu li na ndo kota be-nzoni so Jéhovah afa na hiringo azo ti wara nzoni tele so ayeke mbilimbili-kue nga na fini ti lakue lakue na yâ ti Paradis. Gbu li na ndo azo so mo yeke sala ngangu ti mû maboko na ala nga na ndo nene ti tene ala mä nzo tënë.

Dabe mo nga so azo ayeke na liberté ti yeda wala ti ke tokua so mo yeke ga na ni na ala. A yeke lani tongaso na ngoi so Jésus afa tënë na Israël ti giriri. Kungba ti mo ayeke ti fa gi tënë (Mat. 24:14). Atâa tongana azo amû lege na mo pëpe ti sala tënë, gi gango ti mo ayeke duti ande mbeni tënë ti témoin. Mo sala ye nzoni awe, teti mo zia Jéhovah amû mo ti sala ye so bê ti lo aye. Tongana na angoi tongaso lege azi biani na mo ti sala tënë, tënë ti mo ayeke duti ande tongana nyen? Tongana li ti mo ayeke mingi na ndo aye so atia azo, fade tënë ti yanga ti mo ayeke nzere na ayeke duti tâ salango ye ti mo mveni.

Tongana, na fango tënë, mo sala ye na mo sala tënë tongana ti so mo yeke sala ka lâ na lâ, ye so ayeke sala ande si azo so ayeke mä mo ayeke gi bê ti ala pëpe. Ala lingbi même ti duti ndulu ti yeda na atënë so alondo na Mbeti ti Nzapa, so mo ye ti tene mo na ala akangbi ni. Ahon ti mû na ala mbeni diskur, sala lisoro na ala. Sala ye na nzoni bê. Fa so bê ti mo ayeke na ala, duti ndulu ti mä ala. Biani, na ando so asalango ye ti kodoro ni nga na yanga ti kodoro ni ahunda ti sala ambeni ye ti fa so zo ayeke yekia amba ti lo, a yeke nzoni mo nga kue mo sala tongaso. Me mo lingbi lakue ti duti ndulu na ngia na yanga.

Na ndo ti estrade. Mingi ni, tongana mo yeke sala tënë na mbeni bungbi ti azo, salango tënë tongana ti lisoro ayeke nzoni kode mingi. Biani, tongana azo ni ayeke mingi, a lingbi go ti mo akiri atoto ngangu. Tongana mo gi ti hinga diskur wala devoir ti mo ni kue na li wala tongana mo sû anzene nzene ye mingi na mbeti, peut-être mo yeke zia bê ti mo mingi na ndo salango atënë ni tâ na lege ni. A yeke kota ye ti tene tënë tâ na lege ni, me tongana zo azia bê ti lo dä mingi, diskur ni ayeke ne nengo; tâ salango ye ti mo mveni ayeke dä mbeni pëpe. A lingbi mo gbu li nzoni na ndo atënë so ayeke na yâ ti li ti mo, zia lê ti mo mingi na ndo ni, me pëpe na ndo tâ lege ti tenengo ni.

A yeke legeoko tongaso tongana a yeke hunda na mo tënë na ngoi ti mbeni bungbi. Leke tele ti mo nzoni, me diko akiringo tënë ti mo dikongo pëpe wala hinga ni kue na li pëpe. Gbian totongo ti go ti mo tongana ti so mo yeke sala ka, si atënë ti mo agboto azo teti so atënë ni aga gi na bê ti ala mveni.

Tongana zo asala ye ahon ndo ni na akode ti salango tënë so même ayeke pendere mingi, azo alingbi ti bâ ni tongana tâ salango ye ti zo ni pëpe. Na tapande, a lingbi lê ti salango tënë ti mo avulu nzoni na mo diko peko ti atënë tâ na lege ni. Me sala ni pëpe na mbeni lege so asala si salango tënë ti mo ane nengo wala akpa salango ye ti mo mveni pëpe. Asalango maboko ti gboto lê ti zo na ndo mbeni ye wala ti fa peko ti ye, tongana mo sala ni nzoni, alingbi ti mû wâ na diskur wala devoir ti mo. Me tongana mo sala maboko gi tongaso wala ahon ndo ni, ye so ayeke gboto ande lê ti azo pëpe na ndo tënë ti mo. Zia go ti mo atoto alingbi na ni, zia si a hon ndo ni mingi pëpe. Ngoi na ngoi, a yeke nzoni ti sala tënë na wâ na yâ ti devoir ti mo, me kpe ti sala ye na baba. Gbiango totongo ti go, salango tënë na wâ nga na fango atënë ti bê ayeke akode ti salango tënë. A lingbi mo sala kusala na ni na mbeni lege so agboto lê pëpe na ndo mo mveni wala so asala si tele ti azo so ayeke mä mo anzere pëpe.

Ti ambeni zo, na yâ salango ye ti ala, ala yeke sala tënë tâ gi na lege ni, atâa tongana ala yeke mû diskur pëpe. Ti ambeni nde, ala yeke sala tongana lisoro. Kota ye ni ayeke ti sala tënë nzoni lâ na lâ nga ti sala ye na nengo tele ti Chrétien. Tongaso, tongana mo yeke na ndo ti estrade, mo yeke sala ande tënë na mo yeke sala ye tongana ti so mo yeke sala ka.

Tongana mo yeke diko mbeti na gbele azo. A hunda na mo ti sala ngangu ti sala ye na gbele azo tongana ti so mo yeke sala ka. Ti sala ni, gi ti hinga angbongboro tënë ni na yâ mbeti so mo yeke diko ande, nga bâ tongana nyen a fa nda ni. Zia si atënë so aduti polele na yâ ti li ti mo; tongaso pëpe, mo yeke diko ande gi atënë ni. Gi ti hinga tâ totongo ti atënë so mo hinga ni nzoni pëpe. Tara peko ti dikongo ye ni na kota go juska ti hinga wala go ti mo agbian alingbi na ni nga ti bungbi atënë oko ti fa abibe polele. Sala ni fani mingi juska ti tene dikongo ye ti mo asua nzoni. Gi ti hinga mbeti ni nzoni si tongana mo yeke diko ni na kota go, a yeke duti tongana lisoro so a sala na wâ. So tâ salango ye ti zo mveni la.

Biani, mingi ti aye so e yeke diko na gbele azo ayeke ambeti ti e so aluti na ndo ti Bible. Nde na adevoir ti dikongo ye na Ekole ti Kusala ti aChrétien, e yeke diko aversê na fango tënë nga tongana e yeke mû diskur na ndo ti estrade. A yeke hunda na aita-koli ti diko ye so e yeke bâ na Mandango Tour ti Ba Ndo nga na Mandango Buku ti Kongregation. Ambeni ita so alingbi ayeke wara devoir ti diko amanuscrit na akota bungbi. Atâa mo yeke diko Bible wala ambeni ye nde, diko ambage so na yâ ni atënë ti azo nde nde ayeke dä na mbeni lege so asala si dikongo mbeti ni aduti na wâ. Tongana a fa peko ti atënë ti azo nde nde, gbian go ti mo ti lingbi na zo oko oko. Hange: sala ni ahon ndo ni pëpe, me zia wâ na yâ dikongo ye ni na lege ti tâ salango ye ti mo mveni.

Dikongo ye tongana ti so a yeke tâ salango ye ti zo mveni ayeke tongana lisoro. A kpa pëpe mbeni ye so a haka pekoni hakango, me mbeni ye so aga na zo ti yeda na tënë.