Fa tâ nzoni ti tënë ni

ATÂA mo yeke sala tënë na zo oko wala na mbeni bungbi ti azo, a yeke lege ti ndara pëpe ti tene na bê ti mo so azo so ayeke mä mo ayeke sala ande nzara ti tënë ti mo gi ngbanga ti so a nzere na mo. Tënë ti mo ni ayeke kota ye, me tongana mo fa polele pëpe tâ nzoni ti tënë ni, peut-être mo yeke sala ande si azo amä mo a ninga pëpe.

Ye so ayeke tâ tënë même teti azo so ayeke mä mo na yâ mbeni Da ti Royaume. Tongana mo sala kusala na mbeni tapande wala mo fa mbeni ye so asi, so ala de ti mä tënë ni pëpe, ala lingbi ti dengi mê ti ala na mo. Me tongana diskur ti mo ayeke na ndo aye so ala hinga awe, mbilimbili tongana mo fa ambeni ye na ndo ni pëpe, ala lingbi ti zia lege ti mä mo. A lingbi mo mû maboko na ala ti bâ ngbanga ti nyen nga tongana nyen ye so mo yeke tene ayeke ga biani na ye ti nzoni na ala.

Bible awa e ti gi ti bâ ye tâ na lege ni (aProv. 3:21). Jéhovah amû Jean Wabatizengo zo ti gue na azo ti wara tâ “ndara ti azo ti mbilimbili”. (Luc 1:17). Ndara so aluti na ndo kpengo mbito ti Jéhovah so ayeke na lege ni (Ps. 111:10). A yeke mû maboko na azo so abâ na nene ni ndara so ti hon ndo ti akpale ti gigi ti laso nzoni, na ala yeke gbu tâ fini, fini ti lakue lakue.​—1 Tim. 4:8; 6:19.

Salango si mbeni diskur wala devoir alingbi tâ na azo ni. Tongana mo ye ti tene diskur wala devoir ti mo alingbi tâ na azo ni, zia li ti mo aduti gi pëpe na ndo aye so mo yeke sala na kusala, me zia a duti nga na ndo azo ni. Bâ ala pëpe gi tongana mbeni bungbi ti azo. A yeke azo nde nde na asewa nde nde si ayeke na yâ ni. A lingbi ti duti azo so ade maseka mingi, azo so ngu ti ala ague na li ni na ambeni so ayeke mbakoro mingi. A lingbi ti duti afini zo so asala nzara ti tâ tënë nga azo so ato nda ti sala na Jéhovah kozo ti tene a dü mo. Ambeni alingbi ti duti azo so akpengba na lege ti yingo; ambeni nde alingbi ti duti azo so abango ndo na asalango ye ti sese so angbâ ti sala ngangu na ndo ti ala. Ni la, hunda tele ti mo, mo tene: ‘Ye so mbi yeke sala ande tënë na ndo ni alingbi ti ga na ye ti nzoni na azo ni tongana nyen? Mbi lingbi ti mû maboko na ala tongana nyen ti gbu nda ti tënë ni?’ Mo lingbi ti bâ so a yeke nzoni mo bi bê mbilimbili na ndo bungbi oko wala use ti azo so e sala tënë ti ala ge. Me girisa biaku nga pëpe tanga ti azo ni.

Ka tongana diskur wala devoir ti mo ayeke na ndo ti mbeni kozo fango ye ti Bible? Tongana nyen mo lingbi ti sala si mara ti diskur tongaso aga na ye ti nzoni na azo ni so amä na bê awe na fango ye ni? Sala kue ti tene mabe ti ala na ndo fango ye so akiri akpengba. Tongana nyen? A yeke na fango nda ti ambeni ye na yâ ti Mbeti ti Nzapa so amû ngangu na ni. Mo lingbi nga ti sala si ala kiri abâ na nene ni fango ye ti Bible so. Mo lingbi ti sala tongaso tongana mo fa na ala tongana nyen fango ye so ague oko na ambeni tâ tënë ti Bible nga na salango ye ti Jéhovah. Sala kusala na atapande ti fa tongana nyen gbungo nda ti fango ye so aga na ye ti nzoni na azo nga asala ngangu na ndo lege so ala yeke bâ na gigi ti kekereke.

Fa tâ nzoni ti tënë ni gi pëpe na lege ti ambeni ndulu tënë na hunzingo ti diskur ti mo. Me sala si gi na tongo nda ni, zo oko oko na popo ti ala atene: “Ye so andu mbi.” Tongana mo zia ye so na sese awe, ngbâ ti fa tâ nzoni ti atënë ni na ngoi so mo yeke sala tënë na ndo angbongboro tënë oko oko ti diskur ni nga na hunzingo ni.

Tongana mo yeke fa tâ nzoni ti mbeni tënë, bâ si mo sala ni na mbeni lege so ague oko na akpengba-ndia ti Bible. So aye ti tene nyen? A ye ti tene so mo sala ni na ndoye nga mo zia tele ti mo na place ti azo (1 Pi. 3:8; 1 Jean 4:8). Atâa so lo yeke leke lani angangu kpale na Thessalonique, bazengele Paul asala kue ti gboto lê na ndo anzoni ye so aita ti lo Chrétien ti koli na ti wali ayeke sala kâ na yâ guengo na li ni ti ala na lege ti yingo. Lo fa nga so lo hinga na bê kue so na yâ ye so lo yeke sala tënë na ndo ni, ala yeke ye ande ti sala ye so ayeke mbilimbili (1 aThes. 4:1-12). So mbeni pendere tapande ti mû pekoni!

Diskur wala devoir ti mo ni ayeke ti pusu azo ti fa nzo tënë nga ti fa ye na azo na ndo ni? Sala si wâ nga na singila ti ala ndali ti matabisi so akiri akono. Ye oko, na salango tongaso, girisa pëpe so ye so azo alingbi ti sala na yâ kusala so ayeke nde nde, na Bible abâ nene ti ye so (Mat. 13:23). Sala pëpe si aita ti mo akiri abâ so ala sala kua nzoni pëpe. A-Hébreu 10:24 awa e ti pusu aita “si ala ndoye azo, na ala sala kusala nzoni”. Tongana e pusu aita ti ndoye amba ti ala, bê ti ala ayeke pusu ala ti sala kusala. Ahon ti gi ti gbu azo na ngangu ti sala aye kue oko, hinga so Jéhovah aye si e gue na azo ‘ti tene ala mä na bê si ala mä yanga’. (aRom. 16:26, Fini Mbuki, 2001). Na ye so na li, e yeke gi ti kpengba mabe ti e nga na ti aita ti e.

Mungo maboko na azo ti bâ tâ nzoni ti tënë ni. Na ngoi so mo yeke fa tënë na azo, sala kue ti gboto lê ti ala na ndo tâ nzoni ti nzo tënë ni. Ti sala tongaso ahunda ti hinga ye so ayeke na yâ ti li ti azo ti territoire ti mo. Mo lingbi ti hinga ni tongana nyen? Mä asango na fonono wala na télévizion. Bâ kozo lembeti ti ambeti-sango. Nga, sala kue ti yôro azo na yâ ti lisoro, na dengi mê na tënë ti ala. Mo lingbi ti bâ so ala yeke tiri na angangu kpale. A lingbi ti duti aye tongaso: kua ayeke mbeni pëpe, futango da ti luema, kuâ ti mbeni zo ti sewa ti ala, sioni ti kpengo ndia pëpe, salango ye ti kirikiri ti mbeni zo ti komande, yâ ti mariage so afâ, batango akete molenge nzoni nga na ambeni ye tongaso. Bible alingbi ti mû maboko na ala? Biani.

Na tongo nda ti mbeni lisoro, peut-être mo yeke na mbeni tënë ti tene na yâ ti li ti mo. Ye oko, tongana zo ni afa so mbeni tënë nde agbu bê ti lo ngangu, ku kete pëpe ti sala lisoro na ndo ni, tongana mo lingbi ti sala tongaso. Mo lingbi nga ti tene na lo so mo yeke kiri ti mû na lo asango so alingbi na lo. Tâ tënë, e yeke kpe ti ‘yôro yanga ti e na yâ ti atënë ti azo’, me e yeke na ngia ti fa na ala wango ti Bible so alingbi tâ na ala (2 aThes. 3:11, FM 01). A yeke polele, ye so ayeke sala ngangu mingi ahon atanga ni kue na ndo azo ayeke wango ti Bible so andu fini ti ala.

Tongana azo alingbi pëpe ti bâ tongana nyen tokua so e ga na ni andu tâ fini ti ala mveni, ala lingbi ti kaï lisoro ni hio. Atâa tongana ala zia e sala tënë, tongana e fa pëpe tâ nzoni ti ye so e yeke sala tënë na ndo ni, tënë ti e ni alingbi ti sala ye mingi pëpe na ndo fini ti ala. Nde na so, tongana e sala si tâ nzoni ti tokua so e ga na ni asigigi polele, lisoro ti e alingbi ti duti ye so agbian fini ti ala ngangu mingi.

Tongana mo yeke manda Bible na azo, ngbâ lakue ti gboto lê na ndo tâ nzoni ti tënë ni (aProv. 4:7). Mû maboko na awamandango ye ni ti gbu nda ti awango, akpengba-ndia nga na atapande ti Bible so afa na ala tongana nyen ti tambela na ndo alege ti Jéhovah. Gboto lê na ndo aye ti nzoni so ayeke ga tongana ala sala tongaso (Es. 48:17, 18). Ye so ayeke pusu ande awamandango ye ni ti gbian aye so a hunda na yâ fini ti ala. Kono na yâ ti ala ndoye so ala yeke na ni na mbage ti Jéhovah nga nzara ti nzere na lo. Sala nga si nzara ti sala ye alingbi na awango ti Tënë ti Nzapa alondo na bê ti ala mveni.