MBAGE 8

Ke bungbi ti nzapa ti wataka ga na yâ ti tâ bungbi ti Nzapa

1. Na ndö ti tënë ti vorongo Nzapa, laso azo adoit ti soro na popo ti aye wa?

MBENI lâ Jésus atene: “Zo so ayeke na mbage ti mbi pëpe ake mbi.” (Matthieu 12:30). Tongana e yeke na mbage ti Jéhovah ape e yeke na mbage ti Satan. Mingi ti azo apensé so ala yeke voro Nzapa na lege ni, me Bible atene so Satan ayeke “handa azo na ndö ti sese kue”. (Apocalypse 12:9). Azo kutu mingi apensé so ala yeke voro Nzapa, me ti tâ tënë ni ala yeke voro Satan Zabolo! Laso azo adoit ti soro na popo ti aye so: Ala voro Jéhovah, “Nzapa ti tâ tënë” wala ala voro Satan, “babâ ti mvene.”—Psaume 31:6; Jean 8:44.

Zi terê ti mo na bungbi ti nzapa ti wataka

2. Mbeni kode so Satan ayeke mû ni ti tara ti kanga lege na azo ti voro Jéhovah ayeke so wa?

² Ti soro ti voro Jéhovah ayeke lege ti ndara, a yeke ni la ayeke sara si e nzere na lê ti Nzapa. Me, a nzere na Satan ape ti bâ mbeni zo avoro Nzapa; lo yeke ga na kpale na azo so aye ti voro Nzapa. Na tapande, lo yeke sara si ambeni zo wala même akamarade ti azo ni wala afami ti ala ahe ala wala asara ye ti ngangu na ala. Jésus agboto lani mê ti e, lo tene: “Biani, awato ti zo ayeke duti ande azo ti da ti lo wani.”—Matthieu 10:36.

3. Tongana afami ti mo wala akamarade ti mo aye ti kanga lege na mo ti voro Nzapa, mo yeke sara nyen?

³ Tongana ye tongaso asi na mo, mo yeke sara nyen? Mingi ti azo ahinga so lege so ala yeke voro na Nzapa ayeke nzoni ape, me a yeke ngangu na ala ti zia ni. Ti ala, tongana ala zia ni, a fa so ala yeke be-ta-zo na afami ti ala ape. Mais eskê a yeke na lege ni? Na tapande, mo mä so afami ti mo ayeke nyon drogue, eskê mo yeke sara tënë na ala na ndö ni ape? Mo yeke bungbi ande na ala ti nyon ni? Ên-ën?

4. Josué atene lani nyen na azo ti Israël na ndö ti vorongo Nzapa na ngoi ni kâ?

⁴ Josué awa lani azo ti Israël ti tene ala zia lege ti asioni sarango ye ti abungbi ti nzapa ti akotara ti ala so ayeke na lege ni ape. Lo tene: “Ala sara mbeto ti Jéhovah na ala voro lo na bê ti ala kue nga na lege ti tâ tënë, ala zia lege ti anzapa so akotara ti ala avoro lani na mbage ti Ngu ni nga na Égypte, na ala voro gï Jéhovah.” (Josué 24:14). Josué angbâ lani be-ta-zo na Nzapa, na Jéhovah asara tufa na ndö ti lo. Tongana e duti be-ta-zo na Jéhovah, lo yeke sara tufa na ndö ti e.—2 Samuel 22:26.

Atënë ti Nzapa so a fa na azo: Mvene wala tâ tënë

Trinité: Abungbi ti Nzapa mingi afa tënë ti trinité. Ala tene “Nzapa Babâ, Nzapa Molenge [Jésus], na Nzapa Yingo Vulu; ala yeke ota ape, me gï Nzapa oko.”

Mo yeke wara même tënë “trinité” na yâ ti Bible ape, na Bible atene nga ape so Jéhovah ayeke azo ota na yâ ti zo oko. Gï Jéhovah oko la, ayeke Nzapa. Kozo mbeti na aCorinthien 8:6 atene: “Ti e, Nzapa ayeke biani gï oko, Babâ ni.” Jéhovah ayeke kota ahon aye kue. Jésus ayeke Nzapa ape, me “Molenge ti Nzapa”. (1 Jean 4:15). Legeoko nga, yingo vulu ayeke Nzapa ape. Yingo vulu ayeke même nga zo ape. A yeke ngangu ti Nzapa ti sara na kua.—Kusala 1:8; aÉphésien 5:18.
Âme: Abungbi ti Nzapa mingi afa so âme ayeke mbeni ye so ayeke na yâ ti terê ti zo na so apeut ti kui lâ oko ape. Me Bible afa so âme ayeke zo wani, na zo apeut ti kui.—Genèse 2:7; Ézéchiel 18:4.
Enfer: Abungbi ti nzapa ti wataka afa so âme ti awasiokpari ayeke bâ pasi lakue lakue na yâ ti enfer. Bible atene akuâ “ahinga ti ala ye oko pëpe”. (Zo-ti-fa-tene 9:5). Bible afa nga so “Nzapa ayeke Ndoye.” (1 Jean 4:8). Jéhovah, Nzapa ti ndoye, ayeke sara pasi lâ oko pëpe na ambeni zo na yâ ti wâ.

Encadré: Bible atene nyen na ndö ti trinité, âme nga na enfer?

Zi aye kue so andu vorongo nzapa ti wataka

5. Ngbanga ti nyen la e doit ti bi aye ti magie kue?

⁵ Ti zi terê ti mo biani biani na abungbi ti vorongo nzapa ti wataka, a yeke nzoni mo futi aye ti magie kue so mo yeke na ni, aye tongana awaraga, akamba, abague nga abracelet ti magie na ambeni ye tongaso. A yeke kota ye ti sara ni ndali ti so a fa so e sara confiance kue na Jéhovah la.

6. Akozo Chrétien asara lani nyen na ambeti ti ala ti magie?

⁶ Bâ ye so ambeni kozo Chrétien asara na ngoi so ala yeda ti mû tâ lege ti vorongo Nzapa. Bible atene: “Gbâ ti azo so ayeke sara lani aye ti magie aga na ambeti ti ala legeoko, ala zö ni na lê ti azo kue.”—Kusala 19:19.

7. Nyen la e peut ti sara tongana adémon asara ye ti ngangu na e?

⁷ Ambeni zo so kozo ala yeke sara yorö wala magie, na ngoi so ala komanse ti voro Jéhovah, adémon apeut ti sara ye ti ngangu na ala. Tongana ye tongaso asi na mo, sambela Jéhovah na kota go nga di iri ti lo na lo yeke aidé mo.—aProverbe 18:10; Jacques 4:7.

8. A-Chrétien ayeke bâ ayanda, a-image, wala afoto so ayeke ti abungbi ti vorongo nzapa ti wataka tongana nyen?

⁸ Ala so aye ti voro Jéhovah adoit ti bata pëpe ayanda, a-image, wala afoto so ayeke ti abungbi ti vorongo ti wataka, nga ala yeke voro aye ni so ape. Atâ Chrétien ayeke “tambela na lege ti mabe, me pëpe na lege ti ye so lê abâ.” (2 aCorinthien 5:7). Ala yeke kpe ndia ti Nzapa so ake ti tene a voro lo na lege ti yanda.—Exode 20:4, 5.

Bungbi legeoko na azo ti Jéhovah

Mbeni mama na kete molenge ti lo ti wali ayeke to kobe

9. Wango wa la Bible amû ti tene zo aga zo ti ndara?

⁹ Bible atene: “Zo so atambela na azo ti ndara, lo yeke ga zo ti ndara.” (aProverbe 13:20). Tongana e ye ti ga zo ti ndara, e doit ti tambela, wala e bungbi legeoko, na aTémoin ti Jéhovah. Ala yeke azo so ayeke tambela na ndö ti lege so ague na fini.—Matthieu 7:14.

10. Tongana nyen la aTémoin ti Jéhovah apeut ti aidé mo ti voro Nzapa?

¹⁰ A-Témoin ayeke pensé na azo. Kua ti ala ayeke ti aidé azo ti nzoni bê ti mä yâ ti atâ tënë ti Bible so ague na zo na fini ti lakue lakue. Ala peut ti aidé mo na lege so ala manda Bible na mo senge senge. Ala yeke kiri tënë na ahunda ti mo nga ala yeke fa na mo ti sara ye alingbi na ye so Bible afa na yâ ti fini ti mo.—Jean 17:3.

11. Abungbi ti aTémoin ti Jéhovah apeut ti aidé mo tongana nyen?

¹¹ Na ngoi ti abungbi ti ala, so mingi ni ala yeke sara ni na yâ ti Da ti Royaume, mo yeke manda ye mingi na ndö ti ye so bê ti Jéhovah aye. A yeke sara si mo yeke duti encore na nzara mingi ti voro Nzapa na lege ni. A yeke fa na mo nga tongana nyen ti fa atâ tënë ti Bible na ambeni zo.—aHébreu 10:24, 25.

Mbeni bungbi ti congrégation na yâ ti mbeni Da ti Royaume

12. Tongana nyen la sambela apeut ti aidé mo ti voro Nzapa?

¹² Tongana mo manda ye mingi na ndö ti ye so bê ti Jéhovah aye nga na aye so lo leke na bê ti lo ti sara, a yeke pusu mo ti kiri singila mingi na lo ndali ti ndoye so lo fa na mbage ti mo. A yeke pusu mo nga ti duti na nzara ti sara ye so anzere na lo na ti kpe ye so lo ke. Girisa ape so mo peut ti ga nduru na Jéhovah na lege ti sambela ti hunda lo ti aidé mo ti sara ye ti nzoni na ti kpe ye ti sioni.—1 aCorinthien 6:9, 10; aPhilippien 4:6.

Mbeni sewa ayeke diko Bible place oko — Mo peut ti mu mbage ti tâ bungbi ti Nzapa tongana nyen?

13. Mo peut ti zia ngia na bê ti Jéhovah tongana nyen?

¹³ Na ndani, so mo maï na lege ti yingo awe, mo yeke bâ ande so mo doit ti mû terê ti mo na Jéhovah nga ti wara batême ti ga mbeni Témoin ti lo. Tongana mo ga na popo ti azo ti Jéhovah, mo yeke zia ngia na bê ti lo (aProverbe 27:11). Mo yeke duti na popo ti azo so ayeke na ngia, so Nzapa asara tënë ti ala, lo tene: “Mbi yeke sara ande kodro na popo ti ala na mbi yeke tambela na popo ti ala, mbi yeke ga Nzapa ti ala na ala yeke ga azo ti mbi.”—2 aCorinthien 6:16.

Mbi sigi na gbe ti ngangu ti adémon

Na mbeni bï so mbi yeke lango na terê ti koli ti mbi na ndö ti gbogbo, mbi mä mbeni go airi mbi fani ota. Mbi zingo, mbi bâ plafond asuru, mo ye ti bâ mbeni boule ti wâ atï na ndö ti yâ ti mbi. Koli ti mbi abâ ye ni so ape. Me, anze mingi na pekoni terê ti mbi angbâ ti chauffé ngangu.

Nze omene na pekoni, go ni akiri airi mbi. Gï hio tongaso mbi bâ so da ni kue ayeke na yâ ti mbeni ngu so alï mingi. Mbeni kota kuma asigi na yâ ti ngu ni, lo roulé na terê ti maboko ti mbi. Mbi tara ti zi lo gbä. Mbeto ahon ndö ti mbi. Na pekoni ngu na ngbo ni agirisa, na a bi mbi na sese na ngangu. Mbi évanouir asara angbonga mingi. Go ni asara tënë na mbi atene mbi gue na yâ ti temple ti kete kodro ni, ndo so ayeke sava akobela na miracle dä. Tongana mbi hunda na yingo ni, mbi tene iri ti lo ayeke nyen, lo fa mbeni iri so ndani ayeke “zo ti mosoro me sân molenge.” Lo mû zendo ti sara si mbi ga zo ti mosoro grâce na pouvoir so lo mû na mbi ti sava akobela.

Azo ti kobela ayeke londo na ando kue ti ga na mbi. Kozo si ala si na yanga-da ti mbi, mbi yeke bâ ala na yâ ti mbeni tatara ti mbi ti magie. Tongaso, tongana zo ni aga, mbi yeke mû maboko ti mbi, mbi pika yâ ti maboko ti lo, na hio a fa na mbi ye so ason lo wala kpale so lo wara nga na yorö ni. Yingo ni so ayeke fa na mbi nga wungo ti nginza so azo ni adoit ti futa.

Mbi yeke wara lani nginza na matabisi mingi ngbanga ti so azo abâ so yorö ti mbi ason. Mbi ga “zo ti mosoro”, me mbi hinga nga nda ti mbage ti iri ni so atene “sân molenge” so. Lakue tongana mbi dü fini molenge, yaya ti lo ayeke kui. A yeke lani ye ti vundu mingi. Mbi sara kua na yingo so ngu 12, na amolenge ti mbi omene akui.

Mbi komanse ti sambela Nzapa ti mû maboko na mbi. Mbi sambela tâ na bê ti mbi kue. Mbeni lâ, aTémoin ti Jéhovah asi na yanga-da ti mbi. Atâa so mbi yeke tomba ka ala lakue, ti so ni so mbi yeda ti mä ala. Na pekoni, na yâ ti alisoro so mbi na ala e sara, mbi ga ti hinga so mbi yeke voro adémon la! Mbi mû desizion ti zia lege ti sarango yorö.

Na ngoi so mbi sara tënë ni na démon ni, lo gboto mê ti mbi ndali ni. Me, mbi tene: “Ti mbi na mo ahunzi awe.”

Mbi gbi aye ti yorö ti mbi kue. Mbi manda Bible na aTémoin, mbi ga mbeni wakua ti Jéhovah na mbi wara batême na ngu 1973. Fadeso mbi yeke na amolenge oku so ayeke na nzoni seni. Koli ti mbi nga aga Témoin.—Tënë ti Joséphine Ikezu.

Encadré: Tongana nyen la mbeni wali asigi na gbe ti adémon?