Nyen la ayeke si ande na abungbi ti vorongo Nzapa?

1. Abungbi ti vorongo Nzapa kue la ayeke nzoni?

Na yâ ti abungbi ti vorongo Nzapa kue, azo so aye tënë ti Nzapa ayeke na popo ni. A yeke mbeni nzoni tënë ti hinga so Nzapa ayeke bâ ala na lo yeke bi bê ti lo na ala. Me mawa ni ayeke so azo so atene ala yeke voro Nzapa ayeke sara aye ti sioni mingi (2 aCorinthien 4:3, 4; 11:13-15). Ambeni mbeti-sango afa so ambeni bungbi ti vorongo Nzapa ayeke bi tere ti ala na yâ ti akua ti aterroriste, ti fango azo ti ambeni mara, ti bira nga na ti langongo na akete molenge. Aye so ayeke son bê ti azo so aye tënë ti Nzapa!​—Diko Matthieu 24:3-5, 11, 12.

Na ngoi so tâ bungbi ti vorongo Nzapa ayeke mû gonda na Nzapa, bungbi ti vorongo nzapa ti wataka ayeke mû ti lo vundu na Nzapa. Lo yeke fa ye so ayeke na yâ ti Bible pëpe, so na popo ni a yeke wara afango ye ti wataka na ndo ti Nzapa nga na ndo ti tënë ti akuâ. Me Jéhovah aye si azo ahinga tâ tënë na ndo ti lo.​—Diko Ézéchiel 18:4; 1 Timothée 2:3-5.

2. Nyen la ayeke si ande na abungbi ti vorongo Nzapa?

Me, Nzapa azia pëpe si abungbi ti vorongo nzapa ti wataka ahanda lo. Ala tene so ala ye lo andâ a yeke dunia ti Satan la ala ye (Jacques 4:4). Bible airi abungbi ti vorongo nzapa ti wataka kue “Babylone, Ngangu gbata”. Babylone ayeke iri ti ngbene gbata so abungbi ti vorongo nzapa ti wataka abâ gigi na yâ ni na peko ti kota ngu so apika na ngoi ti Noé. Na yâ ti kete ngoi, gi hio tongaso Nzapa ayeke futi abungbi ti vorongo kue so ayeke handa azo na ayeke sara pasi na ala.​—Diko Apocalypse 17:1, 2, 5, 16, 17; 18:8.

Me, Jéhovah agirisa pëpe azo kue so aye lo biani so ayeke na yâ ti abungbi ti vorongo nzapa ti wataka. Lo yeke bungbi mara ti azo tongaso ti fa na ala tâ tënë.​—Diko Michée 4:2, 5.

3. Azo so aye Nzapa, a lingbi ala sara nyen?

Jéhovah ayeke bi bê ti lo na ndo ti azo so aye tâ tënë nga so aye ye so ayeke nzoni. Lo tene na ala ti sigigi na yâ ti bungbi ti vorongo nzapa ti wataka. Azo so aye Nzapa ayeke nduru ti changé lege ti ala ti mû ngia na lo.​—Diko Apocalypse 18:4.

Na ngoi ti akozo Chrétien, azo so aye biani Nzapa amä nzoni tënë so abazengele afa, ala yeda na ni na ngia na bê. Ala manda na mbage ti Jéhovah fini lege ti sarango ye so amû ngia mingi na ala nga a sara si ala yeke na beku na ala hinga ndani so ala yeke na fini. Ala yeke mbeni nzoni tapande teti e laso ngbanga ti so ala yeda na nzoni tënë na lege so ala zia Jéhovah kozoni na yâ ti fini ti ala.​—Diko 1 aThessalonicien 1:8, 9; 2:13.

Jéhovah ayeke yamba azo so asigigi na yâ ti bungbi ti vorongo nzapa ti wataka ti ga na popo ti awavorongo lo. Tongana mo yeda na tisango ndo ti Jéhovah, mo yeke ga ande kamarade ti lo, mo yeke wara afini kamarade so aye mo, so ayeke amba ti mo awavorongo Jéhovah nga mo yeke wara fini ti lakue lakue.​—Diko Marc 10:29, 30; 2 aCorinthien 6:17, 18.

4. Nzapa ayeke sara tongana nyen ti tene ngia aduti na ndo ti sese kue?

So a yeke fâ ande ngbanga na ndo ti abungbi ti vorongo nzapa ti wataka a yeke nzoni tënë la. A yeke sara ande si sarango sioni na zo ahunzi na yâ ti dunia kue. Abungbi ti vorongo nzapa ti wataka ayeke handa azo mbeni pëpe nga ala yeke kangbi ala mbeni pëpe. Azo kue so ayeke na fini ayeke bungbi oko ti voro gi tâ Nzapa.​—Diko Apocalypse 18:20, 21; 21:3, 4.