Ala dü molenge!

Abraham na Sara asara mariage asara angu mingi awe. Ala zia pendere da ti ala so ayeke na kodro ti Ur na ala yeke lango gï na gbe ti atente. Me, Sara adema terê ti lo ape, ndali ti so lo yeke na confiance na Jéhovah.

Sara asara nzara mingi ti dü molenge, ni la lo tene na Abraham, lo tene: ‘Tongana Agar zo ti kua ti mbi adü mbeni molenge, andâ a yeke mbi la mbi dü so.’ Ambeni ngoi na pekoni, Agar adü mbeni molenge-koli. Iri ti lo ayeke Ismaël.

Angu mingi na pekoni, na ngoi so Abraham ayeke na ngu 99 nga Sara ayeke na ngu 89, ambeni koli ota aga ti bâ ala. Abraham atisa ala ti wu terê na gbe ti mbeni keke nga lo mû kobe na ala. Mo hinga azo so aga ti bâ ala so? A yeke a-ange. Ala tene na Abraham: ‘Na ngu ti peko na oko ngoi ni so, mo yeke dü ande mbeni molenge-koli na wali ti mo.’ Sara ayeke mä ala na gbe ti tente ni. Lo he ngia yeke na lo tene: ‘So mbi ga mbakoro awe so, mbi yeke dü biani?’

Na ngu ti pekoni, Sara adü molenge-koli gï tongana ti so ange ti Jéhovah atene. Abraham airi lo Isaac, nda ti iri ni aye ti tene “He ngia.”

Na ngoi so Isaac awara ngu oku tongaso, Sara abâ so Ismaël ayeke he lo. Lo ye ti bata molenge ti lo ti koli so nzoni, tongaso lo hunda na Abraham ti tomba Agar na Ismaël. Gï na mango tënë ni so, Abraham ayeda pëpe ti sara ye so Sara ahunda so. Me Jéhovah atene na Abraham: ‘Mä Sara. Mbi yeke bata ande Ismaël. Me, a yeke na lege ti Isaac si azendo ti mbi ayeke ga ande tâ tënë.’