Zabolo atara Jésus

Na peko ti so a batize Jésus, yingo vulu ague na lo na yâ ti benyama. A sara lango 40 awe la lo te ye ape so, na nzara asara lo sioni. Mo ye ti bâ, Zabolo aga ti tara Jésus, lo tene na lo: ‘Tongana mo yeke vrai Molenge ti Nzapa, tene na atênë so ti ga mapa.’ Me Jésus asara kua na mbeni versê ti Bible ti kiri tënë na lo, lo tene: ‘Mbeti ti Nzapa atene zo ayeke gï na bezoin ti kobe ti ngbâ na fini ape. Zo ayeke nga na bezoin ti mä atënë kue so Jéhovah atene.’

Zabolo akiri atara Jésus, lo tene: ‘Tongana mo yeke vrai Molenge ti Nzapa, londo na li ti yongoro temple so mo tï na sese e bâ. Mbeti ti Nzapa atene lo yeke tokua a-ange ti lo ti gbu mo.’ Me Jésus akiri asara kua na versê ti Bible ti kiri tënë na lo, lo tene: ‘Mbeti ti Nzapa atene so mo doit ti zia Jéhovah na tara ape.’

Na pekoni, Satan afa na Jésus aroyaume kue so ayeke na ndö ti sese na amosoro nga na gloire ti ala, na lo tene: ‘Mbi yeke mû na mo aroyaume so kue nga na gloire ni gï tongana mo voro mbi gï fani oko.’ Me Jésus atene na lo: ‘Hon kâ Satan! Mbeti ti Nzapa atene so mo doit ti voro gï Jéhovah oko awe.’

Na pekoni Zabolo ahon, na a-ange aga na ala mû na Jésus kobe ti tene lo te. Ti londo na ngoi ni so ti gue na ni, Jésus akomanse ti fa nzoni tënë ti Royaume ti Nzapa. A yeke kua so a tokua lo ti sara na sese la. Azo aye atënë so Jésus ayeke fa na ala, nga ala yeke mû peko ti lo na ndo kue so lo yeke gue dä.