A zingo Jésus na kuâ

Na peko ti so Jésus akui, mbeni koli so ayeke na mosoro mingi, so iri ti lo ayeke Joseph, ahunda na Pilate ti zia lege na lo ti descend kuâ ti Jésus na ndö ti keke. Joseph akanga terê ti kuâ ni na mbeni pendere bongo ti lin legeoko na a-épice, na lo zia kuâ ni na yâ ti mbeni dû ti kuâ so a zi ni fini fini. Lo zia mbeni kota tênë na yanga ti dû ti kuâ ni. Aprêtre-mokonzi atene na Pilate, atene: ‘E sara mbeto ti tene ambeni disciple ti Jésus ague amû kuâ ni na ala tene so lo zingo na kuâ awe.’ Tongaso Pilate atene na ala: ‘Ala kanga yanga ti dû ti kuâ ni nzoni na ala bata ni nzoni.’

Lango ota na pekoni, na yanga ti ndapre, ambeni wali ague na dû ti kuâ ni na ala bâ so a pusu tênë so a zia lani na yanga ti dû ti kuâ ni so a zia ni nde. Tongana ala lï na yâ ti dû ti kuâ ni, mbeni ange asara tënë na ala, lo tene: ‘Ala sara mbeto ape. A zingo Jésus na kuâ awe. Ala gue ala tene na adisciple ti lo ti wara lo na Galilée.’

Marie ti Magdala ague hio lo wara Pierre na Jean. Lo tene na ala: ‘Mbeni zo amû kuâ ti Jésus ahon na ni!’ Pierre na Jean amû loro ala gue na dû ti kuâ ni. Na ngoi so ala bâ so yâ ti dû ti kuâ ni ayeke senge, ala kiri na yanga-da ti ala.

Na ngoi so Marie akiri ague na dû ti kuâ ni, lo bâ a-ange use na yâ ni na lo tene na ala: ‘Mbi hinga ndo so ala gue na Seigneur ti mbi dä ape.’ Na pekoni, lo bâ mbeni koli, lo pensé ti lo atene a yeke zo ti lekengo yâ ti yaka ni la, lo tene na lo, lo tene: ‘Kota zo, pardon, fa na mbi ndo so mo zia lo dä.’ Me na ngoi so koli ni atene na lo atene: “Marie!” lo hinga so ayeke Jésus la. Lo dekongo, lo tene: “Maître!” na Marie agbu lo ngangu. Jésus atene na lo: ‘Gue mo tene na aita ti mbi so mo bâ mbi.’ Droit, Marie amû loro lo wara adisciple ni na lo tene na ala so lo bâ Jésus.

Ngoi kete na pekoni, gï na yâ ti lango ni, adisciple use alondo na Jérusalem ti gue na Emmaüs. Mbeni koli awara ala na lege na lo hunda na ala ti fa na lo ye so ala ngbâ ti sara tënë na ndö ni so. Ala tene: ‘Mo hinga ape? A sara lango use awe la, aprêtre-mokonzi asara si a fâ Jésus. Fadeso ambeni wali atene so lo zingo awe!’ Koli ni ahunda ala, atene: ‘Ala mä na bê na tënë ti aprophète ape? Ala tene so Christ ayeke kui ande na pekoni a yeke zingo lo.’ Koli ni angbâ ti fa nda ti Mbeti ti Nzapa na ala. Tongana ala si na Emmaüs, adisciple ni atene na koli ni ti ngbâ na ala. Na ngoi ti tengo kobe, na peko ti so lo sambela na ndö ti mapa, ala ga ti bâ so zo ni ayeke Jésus. Mo ye ti bâ, lo girisa.

Adisciple use so akiri hio na Jérusalem na da so abazengele abungbi dä, na adisciple ni afa na ala ye so asi so. Na ngoi so ala yeke na yâ ti da ni so, Jésus asigi na lê ti ala kue. Na tongo nda ni, abazengele amä na bê ape so a yeke Jésus. Jésus angbâ atene: ‘Ala bâ maboko ti mbi, ala ndu mbi. Mbeti ti Nzapa atene so a yeke zingo ande Christ na kuâ.’