Lettre ti Bebungbi

Aita ti e aChrétien:

E so e yeke awakua ti Jéhovah, e ye Bible so ayeke Tënë ti lo. E hinga biani so Bible afa ambaï so ayeke tâ tënë, amû anzoni wango ndali ti gigi ti e, nga afa na e biani so Jéhovah aye azo (Psaume 119:105; Luc 1:3; 1 Jean 4:19). E ye mingi ti mû maboko na amba ti e ti hinga atâ tënë so ayeke na yâ ti Bible. Tongaso, e yeke na ngia ti sigi na buku, “Aye so mo lingbi ti manda na lege ti Bible”. Zia e sara tënë kete na ndö ni.

A sara mingi ti ambage ti mbeti so ndali ti amolenge. Me, a lingbi nga ti mû maboko na akota zo so ayeke na nzara ti hinga atënë mingi na ndö ti Bible. Nga, so Bible ayeke mbeni mbeti so a sara ni ndali ti azo kue, kite ayeke dä ape so e kue e yeke wara ande aye ti nzoni na yâ ti aye ti manda so a kiri a leke yâ ti atënë ni, so a lingbi ti mû maboko na e ti duti biani na ngia.

Mbeti so afa ambaï ti Bible. A sara tënë na ndö ti azo, a komanse na ngoi so Nzapa acréé aye juska ti ga na ni. A sara kue ti fa peko ti ambaï ti Bible ni so polele, na mbeni lege so akpengba ape nga na molongo so aye ni asi na ni.

Mbeti so afa gï ambaï ti Bible ape, me a leke atënë nga na afoto so ayeke na yâ ni na mbeni lege so alingbi ti sara si zo abâ aye ni na yâ ti li ti lo nga lo zia terê ti lo na place ti azo so asara tënë ti ala na yâ ti mbaï ni.

Mbeti so amû maboko na e ti bâ tongana nyen la Bible ayeke mbeni mbeti so asara tënë na ndö ti azo so amä yanga ti Jéhovah nga na azo so ake yanga ti lo. Ye so apusu e ti manda ye na ndö ti atapande ti ala (aRomain 15:4; 1 aCorinthien 10:6). A kangbi yâ ti mbeti so na ambage 14. Na tongo nda ti ambage ni oko na oko, a sara mbeni nduru tënë na ndö ti ambeni ye ti manda so ayeke na yâ ti mbage ni.

Tongana mo yeke mbeni babâ wala mama, mo lingbi ti diko mbeni mbaï ni na molenge ti mo nga mo sara lisoro na lo na ndö ti afoto ni. Na pekoni, ala use kue alingbi ti diko aversê ti Bible so agboto mbaï ni na yâ ni. Mû maboko na molenge ti mo ti tingbi aye so lo diko na yâ ti Bible na aye ti manda so ayeke na yâ ti mbeti ni. Mo lingbi nga ti sara tongaso na ngoi so mo yeke mû maboko na mbeni kota zo ti hinga akota tënë so ayeke na yâ ti Bible.

E yeke na beku so mbeti so ayeke mû ande maboko na azo kue so ayeke na nzara ti hinga ye, atâa a yeke maseka wala kota zo, ti manda Bible na ti sara ye alingbi na aye so ala manda na yâ ni. Ye ti peko ni ayeke so ala nga kue alingbi ti voro Nzapa tongana amembre ti sewa ti lo so lo ye ala mingi.