Azo so mo ye ala so akui apeut ti kiri na fini

Kuâ asara zo vundu mingi. Ndani la Bible atene a yeke mbeni wato (1 aCorinthien 15:26). Na ye ti manda 27, mo manda lani so Jéhovah ayeke futi ande wato so. Me nyen la ayeke si ande na azo so akui awe? Na yâ ti ye ti manda so, mo yeke manda ye mingi na ndö ti mbeni zendo so Jéhovah amû: lo yeke kiri ande na fini azo milliard mingi ti tene ala ngbâ na fini lakue lakue. Lo yeke zingo ande ala na kuâ. Ye so apeut ti si biani? A yeke zingo ala ti duti na yayu wala na ndö ti sese?

1. Nyen la Jéhovah aye ti sara ndali ti azo so e ye ala so akui?

Jéhovah ayeke ku kungo ti kiri na azo so akui na fini. Job, mbeni koli so ayeke na mabe, ayeke lani na confiance so Nzapa ayeke girisa lo ape na ngoi so lo kui. Lo tene na Nzapa, lo tene: “Mo yeke iri ndo, na mbi yeke yeda [na yâ ti Dû ti kuâ].”—Diko Job 14:13-15.

2. E hinga tongana nyen so a peut ti zingo azo so akui awe?

Na ngoi so Jésus ayeke lani na sese, Nzapa amû na lo ngangu ti zingo azo na kuâ. Jésus akiri lani na fini mbeni molenge-wali ti ngu 12 nga na molenge-koli ti mbeni wali-mua (Marc 5:41, 42; Luc 7:12-15). Na pekoni, kamarade ti Jésus, Lazare, akui. Atâa so Lazare akui a lu lo a sara lango osio, Jésus akiri lani na lo na fini. Jésus asambela Nzapa, na pekoni lo dekongo, lo tene: “Lazare, mo sigi!” Na “koli so akui awe so asigi.” Lo kiri na fini (Jean 11:43, 44). Imaginé tongana nyen la terê ti afami nga na akamarade ti Lazare anzere lani.

3. Beku wa la ayeke dä ndali ti azo so mo ye ala so akui?

Bible atene: ‘A yeke zingo ande azo na kuâ.’ (Kusala 24:15). Azo so Jésus azingo ala ândö na kuâ ague lani na yayu ape (Jean 3:13). Ala yeke lani na ngia so a kiri na ala na fini ge na ndö ti sese. Legeoko nga, fafadeso Jésus ayeke zingo na kuâ azo milliard mingi ti ngbâ na fini lakue lakue na yâ ti Paradis na ndö ti sese. Lo tene so azo kue so Nzapa adabe ti lo na ala ayeke zingo ande na kuâ, atâa so zo oko adabe ti lo ape so ala yeke lani na fini.—Jean 5:28, 29.

GI TI HINGA AYE MINGI

4. Jésus afa lani so lo peut ti zingo akuâ

Manda ambeni ye na ndö ti ye so Jésus asara lani ndali ti kamarade ti lo Lazare. Diko Jean 11:14, 38-44, na pekoni kiri tënë na ahunda so:

• E hinga tongana nyen so Lazare akui lani biani?—Bâ versê 39.

• Tongana Lazare ague lani na yayu, mo pensé so Jésus ayeke kiri na lo na fini na ndö ti sese?

Zia VIDÉO ni.

VIDÉO: Jésus azingo Lazare na kuâ (1:16)

5. A yeke zingo ande azo mingi na kuâ

Diko Psaume 37:29, na pekoni kiri tënë na hunda so:

• Azo milliard mingi so a yeke zingo ande ala na kuâ ayeke vivre ande na ndo wa?

Jésus ayeke zingo ande na kuâ azo mingi, même azo so avoro lani Jéhovah ape. Diko Kusala 24:15, na pekoni kiri tënë na hunda so:

• Azo wa la mo ye ti tene a kiri na ala na fini?

Gbu li na ndö ti ye so si: A yeke ngangu ape na Jésus ti zingo mbeni zo na kuâ tongana ti so a yeke ngangu ape na mbeni babâ ti zingo molenge ti lo so alango

6. Zingongo ti akuâ apeut ti dë bê ti mo nga amû na mo beku

Mbaï ti Bible na ndö ti molenge ti Jaïrus adë bê ti azo mingi so ayeke na vundu nga akpengba ala. Diko ye na ndö ti vrai ye so asi so na Luc 8:40-42, 49-56.

Kozo ti tene Jésus azingo molenge ti Jaïrus, lo tene na babâ ti lo: “Sara mbeto pëpe. Duti gï na mabe awe.” (Bâ versê  50.) Tongana nyen la beku ti zingongo ti akuâ apeut ti mû maboko na mo . . .

• na ngoi so mbeni zo so mo ye lo akui?

• na ngoi so fini ti mo ayeke na yâ ti kpale?

Zia VIDÉO ni, na pekoni kiri tënë na hunda so:

VIDÉO: Beku ti zingongo ti akuâ amû lege ti sara ye na mbeto pëpe: Na lege wa? (3:21)

• Tongana nyen la beku ti zingongo ti akuâ adë bê ti babâ na mama ti Phelicity nga akpengba ala?

NA NDURU TËNË

Bible atene so a yeke zingo na kuâ azo milliard mingi so akui awe. Jéhovah aye ti tene ala kiri na fini, na lo mû na Jésus ngangu ti zingo ala na kuâ.

Dango bê

• Tënë ti bê ti Jéhovah na Jésus na ndö ti kiringo na azo so akui na fini ayeke so wa?

• Azo milliard mingi so a yeke zingo ande ala na kuâ ayeke vivre na ndo wa: na yayu wala na sese? Mo tene tongaso ngbanga ti nyen?

• Nyen la asara si mo yeda so azo so mo ye ala apeut ti kiri na fini?

GI NDA TI YE

Gi ti hinga anzoni ye so mo peut ti sara ti hon ndö ti vundu so asara mo.

“Aye so apeut ti aidé azo so ayeke na vundu” (Zingo na lango! N° 3 2018)

Eskê amama-ndia ti Bible apeut biani ti aidé mbeni zo so ayeke na vundu?

Tongana mbeni zo so mo ye lo akui (5:06)

Tongana nyen la amolenge apeut ti hon ndö ti vundu so asara ala ndali ti kuâ ti mbeni zo so ala ye lo?

Ye so a futa ti zi azo (2:07)

Eskê a yeke zingo ande ambeni zo ti gue na yayu? Azo wa la a yeke zingo ande ala ape?

“Zingongo ti akuâ ayeke nyen?” (Article na ndö ti site)