YE TI MANDA 52
Ndani so tënë ti yungo bongo nga na lekengo terê pendere ayeke kota ye
E kue e ye ti soro abongo so e yeke yü nga na fason so e yeke leke na terê ti e pendere. Tongana e sara ye alingbi na ambeni mama-ndia ti Bible so ayeke simple, e peut ti soro abongo so e ye nga ti zia ngia na bê ti Jéhovah. Zia e bâ ambeni mama-ndia ni.
1. A yeke nzoni amama-ndia wa la afa lege na e na ngoi so e yeke soro bongo nga na fason so e yeke leke na terê ti e pendere?
A yeke nzoni e soro “bongo so ayeke nzoni, na sarango ye ahon ndö ni pëpe nga na hange” nga e duti lakue propre tongaso si azo abâ so e “yeke voro Nzapa”. (1 Timothée 2:9, 10). Zia e bâ amama-ndia osio so: (1) A yeke nzoni abongo ti e aduti “nzoni”. Tongana ti so mo bâ na ngoi ti abungbi, awakua ti Jéhovah ayeke yü abongo nde nde. Me yungo bongo ti ala nga fason ti lekengo kuä ti li ti ala afa so ala ne Nzapa so ala yeke voro lo. (2) Ti yü bongo “na sarango ye ahon ndö ni pëpe” aye ti tene so fason so e yeke leke na terê ti e pendere adoit ti zia nzara ti e na yâ ti mbeni zo ape nga a yeke nzoni agboto lê mingi na ndö ti e ape. (3) E yeke fa so e “sara ye na hange” tongana e mû pëpe peko ti fason ti yungo bongo nga na lekengo terê pendere ti mingi ti azo ti dunia so. (4) Fason ti lekengo terê ti e pendere adoit lakue ti lingbi na azo so ‘ayeke voro Nzapa’ tongaso si azo abâ hio so e yeke voro tâ Nzapa.—1 aCorinthien 10:31.
2. Ngbanga ti nyen la a yeke nzoni e pensé na aita ti e na ngoi so e yeke soro bongo so e ye ti yü?
Atâa so e yeke na liberté ti soro bongo so e ye ti yü, a yeke nzoni e gbu li na ndö ti ye so yungo bongo ti e ayeke sara na ndö ti amba ti e. E yeke sara kue ti son bê ti mbeni zo ape, me e yeke gi ‘ti nzere na amba ti e na yâ ti ye so ayeke nzoni ti kpengba ala’.—Diko aRomain 15:1, 2.
3. Tongana nyen la lekengo terê ti e pendere apeut ti gboto azo na yâ ti tâ vorongo Nzapa?
Atâa so e yeke gi ti yü bongo nzoni na ngoi kue, e yeke sara hange mingi na bongo so e yeke yü ti gue na abungbi nga na fango tënë. E ye pëpe ti tene yungo bongo ti e asara si li ti azo ayeke pëpe na ndö ti kota tënë so e yeke fa na ala. Me e ye si yungo bongo ti e apusu azo ti hinga ye mingi na ndö ti Nzapa so e yeke sara na lo nga ‘asara pendere ti fango ye ti Sauveur ti e.’—Tite 2:10.
GI TI HINGA AYE MINGI
Bâ tongana nyen la e peut ti sara kue ti tene yungo bongo ti e nga na lekengo terê ti e pendere a-aidé azo ti hinga so e yeke aChrétien.
Lekengo terê ti e apeut ti fa wala e ne azo so ayeke na komandema. Atâa so Jéhovah ayeke bâ ye so ayeke na yâ ti bê ti e, fason so e yeke leke terê ti e na ni adoit ti fa nga so e ne lo
4. Tongana e leke terê ti e pendere e fa so e ne Jéhovah
Kota raison so ndali ni e yeke leke terê ti e pendere ayeke so wa? Diko Psaume 47:2, na pekoni kiri tënë na ahunda so:
So e hinga so e yeke sara kua na iri ti Jéhovah, a yeke nzoni a sara nyen na ndö ti fason ti yungo bongo ti e?
Eskê mo pensé so a yeke na lege ni ti tene e gi bê ti e na ndö ti fason so e yeke leke na terê ti e pendere ti gue na abungbi nga na fango tënë? Ngbanga ti nyen?
5. Lege ti soro nzoni bongo so e ye ti yü nga na fason so e ye ti leke na terê ti e pendere
Atâa bongo ti e ayeke ti nginza mingi wala pëpe, a yeke nzoni a duti propre nga a lingbi na ambilimbili ye so e yeke sara. Diko 1 aCorinthien 10:24 nga na 1 Timothée 2:9, 10. Na pekoni, fa ndani so e yeke yü pëpe . . .
bongo so ayeke gï tongaso nga ayeke propre ape.
bongo so agbu zo gbungo, a bâ terê ti zo na yâ ni wala azia nzara ti koli wala wali na yâ ti zo.
Atâa so aChrétien ayeke na gbe ti Ndia ti Moïse ape, andia ni afa apensé ti Jéhovah. Diko Deutéronome 22:5, na pekoni kiri tënë na hunda so:
Ngbanga ti nyen la a yeke nzoni e yü pëpe abongo nga e leke terê ti e pëpe na fason so asara si koli akpa wali wala wali akpa koli?
Diko 1 aCorinthien 10:32, 33 nga na 1 Jean 2:15, 16, na pekoni kiri tënë na ahunda so:
Ngbanga ti nyen la a yeke nzoni e gi ti bâ wala lekengo terê ti e pendere ason bê ti ambeni zo na ndo so e yeke dä wala ambeni ita na yâ ti congrégation?
Na ndo so mo yeke dä, mingi ni azo ayeke yü bongo tongana nyen nga ala yeke leke terê ti ala tongana nyen?
Mo pensé so ambeni bongo so ala yeke yü alingbi na Chrétien ape? Ngbanga ti nyen?
E peut ti yü bongo na e leke terê ti e na afason nde nde nga e zia ngia na bê ti Jéhovah
AMBENI ZO ATENE: “Mbi yeke na droit ti yü bongo so mbi ye ti yü.”
Mo yeda na ni? Ngbanga ti nyen?
NA NDURU TËNË
Tongana e soro nzoni bongo so e ye ti yü nga na fason so e ye ti leke na terê ti e pendere, e fa so e ne Jéhovah nga na amba ti e.
Dango bê
Ngbanga ti nyen la yungo bongo nga na lekengo terê ti e pendere ayeke kota ye na lê ti Jéhovah?
Ambeni mama-ndia wa la adoit ti fa lege na e na ngoi so e yeke mû desizion na ndö ti fason so e yeke leke na terê ti e pendere?
Lekengo terê ti e pendere apeut ti sara si azo abâ tâ vorongo Nzapa tongana nyen?
GI NDA TI YE
Bâ ye so azo apeut ti pensé na ndö ti mo tongana ala bâ yungo bongo ti mo.
“Fason ti yungo bongo ti mbi afa nyen na ndö ti mbi?” (Article na ndö ti site)
Gi ti hinga ndani so a yeke na lege ti ndara ti gbu li kozo si mo sara tatouage.
“Bible atene nyen na ndö ti tatouage?” (Article na ndö ti site)
Bâ ambeni mama-ndia so apeut ti aidé e ti mû adesizion.
“Fason ti yungo bongo ti mo amû gloire na Nzapa?” (Tour ti Ba Ndo ti septembre 2016)
Tongana nyen la mbeni wali so aye ti zia ngia na bê ti Nzapa amanda ti yeda na fason so amba ti lo ayeke yü na bongo?